Situación "crítica" en Avdiivka mentres os aliados de Kíiv estudan en Múnic o seu futuro

Para Ucraína, a situación en Avdiivka, na rexión de Donetsk, é “extremadamente crítica”, recoñeceu hoxe Oleksandr Tarnavski, que dirixe o grupo operativo-estratéxico Tavria das Forzas Armadas ucraínas. Kíiv “está a utilizar todas as forzas e medios á súa disposición para conter o inimigo” entre “duros combates dentro da cidade”, sostivo o xeneral de brigada, insistindo en que a situación está “baixo control”. 24 horas antes, o seu Exército comunicara a despregadura na localidade dunha brigada de asalto. Non obstante, fontes ucraínas admiten a retirada das tropas de varias posicións defensivas e os militares rusos estiman que controlan máis de 17% do termo municipal. Ademais, medios especializados reportaron nas últimas xornadas avances diarios das Forzas Armadas rusas tanto no interior da cidade como na tentativa de cercar completamente as tropas de Kíiv que quedan, rodeadas por tres lados, e o pro occidental Instituto para o Estudo da Guerra divulgou que Moscova cortou a última ruta principal de subministración ucraína á urbe. A entidade explica que Avdiivka é un “bastión” defensivo ucraíno desde o comezo da guerra interna en 2014, polo que Kíiv “fortificou durante moito tempo moitos dos asentamentos circundantes”. Se Rusia acaba por facerse con Avdiivka, contra a que lanzou unha operación ofensiva en outubro de 2023, permitiríalle afastar os combates da próxima cidade de Donetsk, capital do oblast homónimo, e consolidar o seu control na zona, unha das máis disputadas até a invasión rusa de 2022. Sobre todo após facerse con Marinka, outra localidade achegada á capital rexional. Con todo, malia que os combates se concentren en Avdiivka, as tropas de Moscova están a avanzar ao longo da liña da fronte despois do fracaso da contraofensiva ucraína que comezou en xuño de 2023. “Neste momento perdemos batallas, os ataques aumentan, pero todo o mundo aférrase. Os que combaten desde hai dous anos xa están fatigados mentalmente”, sinalou á axencia AFP un soldado ucraíno do ultradereitista Batallón Azov desde Kramatorsk, tamén en Donetsk. A falta de recrutas e as vías para conseguilos foron un dos eixos do choque entre o presidente ucraíno, Volodimir Zelenski, e o xa ex xefe das Forzas Armadas, Valeri Zaluzhni, após ser despedido polo mandatario. Á vez, só a popularidade de Zaluzhni no país pode competir coa de Zelenski no marco da intensificación das críticas internas ao presidente. O líder ucraíno estivo hoxe en Alemaña e Francia, onde asinou acordos bilaterais de seguridade e se reuniu cos seus homólogos Olaf Scholz e Emmanuel Macron respectivamente, aos que reclamou máis armamento, un aspecto esencial para Kíiv pola fin da asistencia estadounidense, bloqueada no Congreso pola falta de entendemento ao respecto de republicanos e demócratas. Desde febreiro de 2022, os compromisos con Kíiv de Estados membros ou achegados á Organización do Tratado do Atlántico Norte (OTAN) comprenderon máis de 250.000 millóns de euros, deles máis de 100.000 millóns de euros só en armamento e material militar. Conferencia de Seguridade de Múnic O secretario xeral da alianza militar liderada polos Estados Unidos, Jens Stoltenberg, é un dos participantes na Conferencia de Seguridade de Múnic, que inaugurou hoxe a súa 60º edición, un foro de política exterior relacionado co Estado alemán. Prevese a asistencia até o domingo de case 30 xefas e xefes de Estado e de Goberno, 56 titulares de Exteriores, 20 de Defensa e 36 de servizos de Intelixencia. Ademais da vicepresidenta, Kamala Harris, e outros cargos estadounidenses, acude o líder da diplomacia chinesa, Wang Yi, e india, Subrahmanyam Jaishankar, a presidenta da Comisión Europea, Ursula von der Leyen, ou o secretario xeral da Organización das Nacións Unidas (ONU), António Guterres. “Incluso a época da Guerra Fría foi, en certo modo, menos perigosa”, subliñou Guterres antes de asegurar que o “noso mundo enfronta desafíos existenciais”, pedindo “multipolaridade” para superar a división da comunidade internacional e “un novo liderado no escenario global”. “A orde global actual non funciona para todos, de feito, iría máis alá e diría: Non funciona para ninguén”, advertiu. Para os países integrados ou da contorna da OTAN, determinar “que facer” con Rusia e Ucraína será “un tema clave” da reunión, detalla a revista Foreign Policy, incidindo no temor “silencioso” a que o apoio deste grupo a Kíiv estea “a cambalearse”. Marcar a liña a seguir con Kíiv, unha vez estabelecido que non se aceptará polo de agora a súa adhesión á OTAN, urxe cada vez máis a Washington fronte á hipotética volta á Casa Branca de Donald Trump, que prometeu a fin da guerra “nun día”. Eses comicios estarán a debate en Múnic no tocante ao futuro da OTAN, da que Trump chegou a ameazar con sacar os Estados Unidos, do mesmo xeito que as relacións coa China e a agresión militar israelí a Gaza, que está a reducir o apoio global a Washington. Zelenski e o presidente sionista, Isaac Herzog, participan no foro alemán. González, dous anos de prisión sen xuízo Por oitava vez, a Xustiza polaca decretou unha prórroga na prisión provisoria ao xornalista vasco Pablo González, detido en febreiro de 2022 entre acusacións de espiar para Rusia. A extensión de tres meses causará que se manteña máis de dous anos en prisión sen xuízo ou probas na súa contra.