Sheinbaum comprométese a traballar por un México máis xusto e soberano

O trunfo de Claudia Sheinbaum é incontestábel. A candidata nacionalista alcanza 58,9% dos votos, convértese na primeira muller en presidir México e consegue unha maioría cualificada nas Cámaras lexislativas que a permitirán acometer algunhas das reformas constitucionais recollidas na súa proposta electoral. Ao tempo, marca unha distancia de duns 30 puntos contra a súa máis directa competidora, a conservadora Xóchitl Gálvez. Sheinbaum agradeceu na súa primeira comparecencia pública tras coñecer a vitoria o apoio de millóns de mexicanos e mexicanas que “decidiron votar por nós para avanzar na cuarta transformación. É o recoñecemento do pobo de México á nosa historia, pero sobre todo ao noso proxecto de nación”, A presidenta electa asegurou que “imos seguir facendo de México cada día un país máis xusto, democrático, libre, soberano, para seguir construíndo a grandeza da nosa patria. Teñan por seguro que estaremos á altura da nosa historia e do xeneroso pobo de México”. Unha contundente vitoria da coalición de Sheinbaum convértea na primeira muller presidenta de México A dirixente nacionalista expresou o seu compromiso de “garantir todos os programas de benestar iniciados polo presidente Andrés Manuel López Obrador, e tamén todos os programas nos que nos comprometemos”. Nesta dirección, indicou que “sempre defenderemos e traballaremos polo interese supremo do pobo de México e da nación, e actuaremos apegados ás leis e ao dereito”. A inapelábel vitoria de Sheinbaum levou os seus competidores a recoñecer a derrota nas primeiras horas do reconto. Así, a candidata conservadora, Xóchitl Gálvez, expresou que “sempre fun unha demócrata. Recoñezo que as tendencias para a elección presidencial non me favorecen” e destacou como “gran fito histórico que o noso país vaia ter á súa primeira muller presidenta”. Gálvez, que fica en 28,0% dos sufraxios, avanzou nas súas primeiras declaracións unha dura oposición á nova presidenta. Neste punto, afirmou que “sairemos á rúa as veces que teñamos que saír para defender a república e á democracia” e denunciou que “estamos competindo contra o autoritarismo e o poder e son capaces de todo”. Sheinbaum vs Gálvez: dúas mulleres disputarán por primeira vez a Presidencia de México O terceiro aspirante en discordia, o socioliberal Jorge Álvarez Máynez, fica con 10,5% dos votos. A este respecto, na súa valoración dos resultados, apuntou que “alcanzamos o resultado histórico máis importante desde a fundación deste movemento, que duplica o número de votos, o resultado que até 2021 fora o máis grande, e que se constrúe con moitos triunfos locais”. A maioría no lexislativo A ampla vitoria da coalición encabeza por Sheinbaum na Cámara de Deputados e no Senado favorecerá a acción de goberno da nova presidenta. Así, a súa fórmula electoral, Sigamos facendo historia, unha agrupación de carácter patriótico e antiimperialista, conformada polo nacionalista Movemento de Renovación Nacional (Morena), polo marxista Partido do Traballo e Os Verdes, alcanzaría ao feche desta edición entre 345 e 380 congresistas e entre 76 e 88 senadores. A agrupación liderada por Gálvez, Forza e Corazón por México, un conglomerado electoral articulado ao redor do demócrata cristiá PAN, o neoliberal Partido Revolucionario Institucional (PRI) e o noutrora antiimperialista e actualmente socioliberal Partido da Revolución Democrática (PRD), sumaría entre 94 e 122 deputados e entre 34 e 43 senadores. Sheinbaum e a consolidación do cambio en México A formación de Jorge Álvarez Máynez, o Movemento Cidadán, unha organización socioliberal, cunha proposta reformista no ámbito dos dereitos civís e unha axenda neoliberal no terreo económico, lograría entre 22 e 33 deputados e entre catro e oito senadores. Os resultados electorais danlle a Sigamos facendo historia maioría cualificada na Cámara de Deputados ao superar os dous terzos de representación, o que lle permitiría acometer as reformas constitucionais anunciadas en campaña. Nesta sentido, a formación levaba no seu programa electoral a modificación de 18 apartados da constitución, para prohibir o fracking, a minaría a ceo aberto ou fixar que a suba do salario mínimo non poida ser inferior á inflación. O poder territorial Sigamos facendo historia é tamén a gran gañadora do proceso de elección dos Gobernos rexionais desenvolvida este domingo en México. Neste caso, a formación nacionalista queda con sete dos nove Estados en disputa, logrando a vitoria en Chiapas, Cidade de México, Morelos, Puebla, Tabasco, Veracruz e Iucatán. Pola a súa parte, Forza e Corazón por México retén a gobernación de Guanajuato e o Movemento Cidadán mantén a de Xalisco. Cidade de México é a xoia da coroa do poder territorial no país. Neste caso, a nova gobernadora é Clara Brugada, que na súa primeira comparecencia sinalou que “temos un gran compromiso co pobo. Esta cidade de México vai mellorar co traballo que facemos. Esta cidade votou para que continúe a transformación e iso é o que imos facer”. As derivadas internacionais do trunfo de Sheinbaum As eleccións deste domingo en México tiñan unhas importantes derivadas internacionais. O país azteca é unha das principais potencias de América Latina cos seus máis de 127 millóns de habitantes, xogando una papel moi activo no continente en defensa de políticas progresistas. Ao tempo, o proceso dáse no marco dun ciclo electoral desfavorábel para as organizacións de esquerda en toda a rexión, do que os comicios en Arxentina foron a súa última expresión. López Obrador confirma que non asistirá ao Cumio das Américas A vitoria Sheinbaum en México foi asumida como un trunfo propio polo conxunto das forzas progresistas do continente americano. Neste contexto explícanse as reaccións que chegaron de todos os dirixentes de esquerda da rexión. Algúns deles, como o ex presidente arxentino Alberto Fernández e o ex mandario boliviano Evo Morales, desprazáronse á capital azteca para seguir o proceso electoral e celebrar o trunfo cos dirixentes da coalición Sigamos facendo historia. Os parabéns á presidenta electa de México chegaron de referencias do progresismo americano como o presidente boliviano, Luís Arce; o mandatario guatemalteco, Bernardo Arévalo, a presidenta hondureña, Xiomara Castro; o xefe de Estado venezolano, Nicolás Maduro; o líder colombiano, Gustavo Petro ou o dirixente cubano, Díaz Canel.