Seymour Hersh e a destrución do Nord Stream 2

Seymour Hersh é o mellor xornalista de investigación dos Estados Unidos. Revelou moitísimos escándalos das políticas imperiais estadounidenses desde a guerra do Vietnam até os nosos días. O seu último artigo foi tan impactante como silenciado. Os medios de desinformación masiva ignorárono. Para os que non o leran, leva por título Así eliminaron os Estados Unidos os gasodutos Nord Stream. Trátase dunha investigación exhaustiva acerca de quen voou os oleodutos do Nord Stream que pertencen a Alemaña e Rusia. Aí provese evidencia detallada acerca da participación de Estados Unidos nos bombazos que destruíron o Nord Stream 2 no mar Báltico. A investigación é tan sólida que Rusia convocou unha reunión de emerxencia no Consello de Seguridade da ONU. Trátase dun acto terrorista contra non soamente Rusia senón contra Alemaña e a Unión Europa. Ao achegárense Alemaña a Rusia o pasado mes de agosto para negociar volver comprar gas ruso de cara ao inverno, os Estados Unidos xunto con Noruega, procederon ao acto terrorista de voar os gasodutos. Todo acto criminal ten actores con motivacións e o máis motivado foi sempre o imperialismo estadounidense que viu o Nord Stream como unha ameaza xeopolítica aos seus intereses estratéxicos. Afastar Alemaña de Rusia Estados Unidos busca afastar Alemaña de Rusia. O acercamento de Alemaña e Europa con Rusia vía o Nord Stream veno como un enfraquecemento do poder dos Estado Unidos sobre Europa e o mundo. As Administracións estadounidenses desde Bush até hoxe veñen desde hai máis de 15 anos opoñéndose á construción do Nord Stream 2. O aplauso de Blinken No mes febreiro de 2022 nunha conferencia de prensa na Casa Branca uns días antes da intervención rusa en Ucraína, o presidente Biden dixo publicamente que se Putin invade Ucraína destruiría o Nord Stream 2. Xusto despois de destruílo o secretario de Estado Anthony J. Blinken, aplaudiu o acto terrorista. Hai unhas semanas a subsecretaria de Estado dos Estados Unidos, Vitoria Nuland, en vistas públicas no Congreso estadounidense a finais de xaneiro, falou favorabelmente da destrución do Nord Stream. E para maior descaro, o mesmo día en que o voaron abriuse por "casualidade" un novo gasoduto desde Noruega a Europa para vender gas estadounidense e noruegués. O plan da Casa Branca Estes datos xa eran, de seu, evidencia contundente de que os responsábeis do devandito acto terrorista son Estados Unidos coa axuda de Noruega. Pero a investigación de Seymour Hersh prové detalles con nome e apelidos sobre quen e como o fixeron. O acto terrorista foi planeado desde a Casa Branca liderando as reunións o propio presidente Biden. Como un insulto á intelixencia dos pobos, o primeiro que dixo Biden despois dos bombazos que destruíron o Nord Stream en setembro pasado foi acusar Rusia de voar os seus propios gasodutos que lle custaron tanto a eles como a Alemaña miles de millóns de euros construílos. Na hipotética posibilidade de que Rusia tivese algunha motivación para arruinar os gasodutos que con tanto esforzo e a un custo enorme lle custou construír, o único que tería que facer é fechar a chave dos gasodutos en Moscova. Rusia non ten ningunha motivación para destruílos. Se a motivación de Rusia é vender gas e desbloquear as sancións de occidente, non só non ten ningún sentido que eles fosen destruír os seus propios gasodutos, nin sequera fechalos movendo a chave que os abre e cerra desde Moscova. O que buscan os rusos é mantelos abertos para vender o seu gas. Pero o que temos coas fake news é o absurdo de ver os lobos acusando as ovellas de comer ás ovellas. A pregunta que nos facemos é: sendo un acto terrorista que afecta seriamente á economía europea, por que a Unión Europea e sobre todo Alemaña non só gardan silencio cómplice xunto cos medios de comunicación, senón por que non fixeron ningunha investigación seria sobre este ataque terrorista contra os pobos europeos? O custo do gas estadounidense que vén agora do novo gasoduto desde Noruega é de lonxe moitísimo máis caro que o gas ruso. Son os pobos europeos os que están a pagar co diñeiro do seu peto os custos exhorbitantes da hiperinflación provocada por esta guerra sucia de Estados Unidos contra Rusia vía Ucraína fabricada desde as oficinas da CIA e o Pentágono en Washington.