Satse, "tras constatar numerosas situacións de falta do material de protección adecuado", está a dirixirse á Inspeccións de Traballo e Seguridade Social a través das súas secretarías territoriais para reclamar que se investiguen os feitos denunciados en cada caso e que se adopten con urxencia as medidas pertinentes para garantir os dereitos dos equipos profesionais, así como do resto da poboación.
Nos seus escritos de denuncia, subliña que a falta do material de protección supón un "claro incumprimento" das normas ditadas até o momento polas Autoridades estatais e territoriais, así como un "grave atentado" contra o dereito á saúde e a integridade física e psíquica das profesionais e doutras persoas da súa contorna, como pacientes, familiares ou persoas do contorno laboral.
O sindicato avanza ademais que está estudandoa posibilidade de recorrer á Fiscalía para que investigue en cada territorio as posíbeis responsabilidades penais no caso de que o "grave problema da falta de material de protección" non se solucione de maneira inmediata.
A organización lembra que as profesionais sanitarias atenden todas as alertas de persoas con sospeita de infección pola COVID-19, xa sexa nos hospitais, en centros de saúde, noutros centros sanitarios e sociosanitarios e en domicilios particulares, polo que consideran que é "obrigatorio" que conten cos equipos de protección individual necesarios e suficientes a fin de mininizar "ao máximo" o risco para a súa saúde e de terceiras persoas en contacto e de evitar expandir o virus.
Como advirte o sindicato, a falta deste material causou até o momento perto de 6.500 contaxios entre profesionais da sanidade a nivel estatal. Neste sentido, Satse reclama ao Ministerio de Sanidade que ofreza datos de contaxios por categorías profesionais, ao ter "fundadas sospeitas" que a maior parte de casos corresponden con prefesionais da enfermaría.
Como sinala, a porcentaxe de profesionais contaxiados (13%) supera aos casos de Italia (8%) ou da China (4%), o que, aos seus ollos, constata "unha menor protección e seguridade que noutros países tamén gravemente afectados pola pandemia".
Neste sentido, considera "absolutamente imprescindíbel" que se fagan as probas ao conxunto de profesionais da sanidade.
