O réxime israelí convoca 60.000 reservistas e ignora a tregua aceptada por Hamás

O Exército israelí emitiu a cuarta feira arredor de 60.000 ordes a reservistas para que se unan á ocupación da Cidade de Gaza, enmarcada no xenocidio que o réxime sionista perpetra desde outubro de 2023 na Faixa. Ademais, 20.000 reservistas que xa foron chamados a filas recibirán un aviso “que estende as súas ordes actuais”, subliñaron os militares. Pouco antes, o ministro de Defensa do Executivo ultradereitista, Israel Katz, aprobou os plans bélicos para unha operación que o Exército xa deu por comezada con “ofensivas na periferia da cidade”, que "xa controlan" os seus efectivos. Ao feche desta edición os soldados xa cercaban a localidade, a máis grande da Faixa e onde se refuxian máis dun millón de persoas, moitas delas chegadas desde diferentes cidades que Israel ordenou evacuar. O groso do que os sionistas denominan “ofensivas” son ataques aéreos indiscriminados contra a poboación civil. Os equipos da canle Al Jazeera indicaron que os barrios residenciais da urbe “están a ser obxecto dalgúns dos ataques israelís máis feroces que vimos nas últimas semanas”. Un dos seus xornalistas, Tareq Abu Azzoum, citou testemuños que corroboran que “Israel está a destruír bloques de pisos alí, asegurándose de que esas áreas se convertan nun páramo sen vida que será inhabitábel”, a pesar do que unha gran parte da poboación se nega a marchar. Antes do anuncio, o presidente dos Estados Unidos –principal aliado e provedor armamentístico israelí–, Donald Trump, deixou claro o seu aval a profundar o xenocidio, ao cualificar o primeiro ministro israelí, Benjamin Netanyahu, de “heroe de guerra”. Israel asasina nun ataque selectivo seis xornalistas mentres prosegue coa ocupación de Gaza Netanyahu, quen ten unha orde de arresto por crimes contra a humanidade do Tribunal Penal Internacional (TPI) –a cuxos xuíces e fiscais volveu sancionar a cuarta feira Washington–, está a ignorar publicamente a proposta de tregua que xa aceptou Hamás. Despois do anuncio, as críticas emitidas por algúns países occidentais non foron acompañadas de ningunha medida de presión real para frear o xenocidio. Pola súa parte, Australia, a cuxo primeiro ministro, Anthony Albanese, definiu como “débil” Netanyahu logo de transmitir que recoñecería o Estado de Palestina, contestou por medio de Tony Burke, titular de Interior, que a “fortaleza non se mide pola cantidade de xente que podes matar ou polo número de crianzas ás que podes facer pasar fame”. No interior de Israel, o líder da oposición, Yair Lapid, criticou o chamamento a filas e salientou que busca “facer realidade a ilusión de conquistar Gaza”, e as familias dos israelís detidos na Faixa destacaron que aprobar o plan e ignorar a proposta de tregua é “unha puñalada no corazón das familias”. Medran as ausencias entre os reservistas “Os sentimentos e as emocións están a flor de pel", incidiu Yossi Mekelberg, consultor de Chatham House, "porque cando menos 70% [da poboación israelí] sabe” que Netanyahu só busca “manterse no poder”, dixo, e debullou que a cifra de reservistas chamados é maior que os requiridos para a operación, “supondo que arredor de 60% se presentará”, matizou. Con todo, reportes da prensa sionista sitúan en 50%, e mesmo menos, o díxito real de reservistas que se presentan. Estímase que na Cidade de Gaza, no norte do enclave, hai un millón de persoas, que, como a inmensa maioría do pobo palestino no territorio, chegaron en boa parte despois de verse obrigadas a fuxir da agresión militar israelí, polo xeral varias veces. Aínda que o obxectivo sionista é expulsalas primeiro ao sur de Gaza, que ordenou evacuar, aspira a obrigalas a marchar fóra de Palestina, para o que xa mantén conversas co Sudán do Sur e está a acabar sistematicamente con calquera elemento que permita aos seres humanos sobrevivir na Faixa, ou matalas no exterminio, sexa polas bombas ou pola fame extrema que causou no enclave. Precisamente de inanición morreron tres palestinos nas 24 horas anteriores, reportaron a cuarta feira as autoridades gazatís, elevando o total a 154 adultos e 112 crianzas, e máis de 1.700 persoas foron asasinadas cando buscaban comida desde finais de maio, case mil delas nas inmediacións dos recintos da Fundación Humanitaria de Gaza (GHF), impulsada por Israel e os Estados Unidos. A ONU constata que Israel cometeu o crime contra a humanidade de exterminio cos ataques a escolas de Gaza Máis alá de que tropas israelís á beira dos recintos (dentro hai mercenarios estadounidenses) admitiron que recibiron ordes de disparar de forma arbitraria contra elas, ao situar a GHF a meirande parte dos recintos no sur isto podería facilitar un plan sionista para completar a limpeza étnica no norte, advertiu a Organización das Nacións Unidas (ONU). En paralelo, o réxime bloquea o acceso e distribución da axuda humanitaria xestionada pola misión da ONU en Palestina, o mesmo que fai con organismos humanitarios independentes. Nese sentido, a suposta axuda de GHF está composta principalmente por alimentos secos que precisan para cociñarse de auga e combustíbel, case inexistentes en Gaza polo asedio, e foi atopada nas bolsas de fariña oxicodona, un opioide que provoca adicción. Ante a sucesión de críticas internacionais por esta iniciativa, o presidente israelí, Isaac Herzog, reuniuse co cociñeiro español José Andrés Puerta, ao que permitiu visitar as instalacións en Gaza de World Central Kitchen (WCK), a súa organización. Desde a Faixa, Puerta subliñou que poden preparar un millón de comidas ao día, no que podería tratarse dun novo intento sionista de impedir o traballo de organismos humanitarios recoñecidos. O cociñeiro reiterou ao comezo do xenocidio que “Israel está defendendo os seus cidadáns”, e apenas criticou o réxime cando asasinou nuns bombardeos en 2024 sete traballadores de WCK claramente identificados, a maioría deles estranxeiros. Aprobado o asentamento colonial que separaría Xerusalén de Cisxordania O Goberno israelí deu a cuarta feira a aprobación definitiva ao proxecto de asentamento, que inclúe 3.410 vivendas para colonos, na zona E1, en territorio palestino. De construírse, impediría o acceso a Xerusalén Leste desde o resto da Cisxordania ocupada e dificultaría aínda máis o desprazamento entre Ramallah e Belén, as dúas principais localidades que se manteñen, cando menos teoricamente, baixo control palestino. Esta área é un dos últimos vínculos territoriais entre elas. En Cisxordania hai máis de medio millón de colonos israelís en asentamentos ilegais, nun plan que busca imposibilitar a creación dun Estado palestino independente, como admitiu o ministro de Finanzas -e colono- Bezalel Smotrich, que insistiu, no marco da impunidade que os seus aliados garanten aos crimes israelís, en que esa posibilidade “está a ser borrada da mesa”, acabando “na práctica coa ilusión dos dous Estados”. Desde comezos deste ano os sionistas aprobaron case 90 plans para instalar asentamentos en Cisxordania. Aínda que non aparenta ser así con Donald Trump, entre a poboación estadounidense décadas de propaganda sionista están a quedar inutilizadas polo xenocidio, como revelou unha enquisa de Reuters/Ipsos, que constatou que 58% da poboación cre que todos os países da ONU deberían recoñecer Palestina, algo que rexeitaría 33%. Asemade, no tocante ao xenocidio, 59% sostén que a “resposta militar de Israel en Gaza foi excesiva”, e 65% aseverou que Washington debería axudar o pobo palestino na Faixa perante a fame masiva desatada polo seu aliado.