O Reino Unido eleva a protección para o córnico e sitúao ao nivel do galés, o escocés e o irlandés

O córnico recibirá a mesma protección que o galés, o gaélico escocés e o irlandés ao abeiro da Carta Europea das Linguas Rexionais ou Minoritarias (CEDL) despois de que o goberno británico decidise elevar o seu status da Parte II do instrumento xurídico á Parte III. As organizacións córnicas e o Consello de Cornualles ven isto como un paso histórico.

A CEDL é un tratado baixo os auspicios do Consello de Europa que busca protexer e promover as linguas minoritarias históricas do continente. Os estados poden escoller entre protexer unha lingua ao abeiro da Parte II ou da Parte III. 

Na Parte II, o estado só se compromete a recoñecela e implementar medidas xenéricas de promoción. Na III, pola contra, exíxese escoller polo menos trinta e cinco medidas específicas en campos como a educación, a xustiza, a administración ou os medios de comunicación.

O Consello de Cornualles confía en que o despregamento destas medidas promoverá o uso da lingua, unha das menos faladas de Europa, no futuro: no censo de 2021, 471 persoas mencionaron o córnico como a súa lingua principal en Cornualles.

O córnico é unha lingua celta próxima ao galés e ao bretón. O nacionalismo córnico considéraa un dos alicereces da identidade nacional de Cornualla. Perdida como lingua comunitaria no século XVIII, houbo esforzos para revitalizala desde mediados do século XX.