Persoal de Emerxencias prepárase para acceder ao centro comercial de Bonaire, en València, cuxo aparcadoiro quedou anegado

"Están retirando auga e non podemos especular", afirma o ministro Ángel Víctor Torres, sobre a posibilidade de que se atopen novas vítimas neste recinto.

Efectivos da Unidade Militar de Emerxencias, este domingo, no centro comercial Bonaire de València. (Foto: Jorge Gil / Europa Press)

Redacción

Actualizado: 03/11/24 | 17:23 | Tempo de lectura: 1 min.

Polo menos 50 efectivos, catro máquinas e un caiac están a traballar este domingo para extraer toda a auga que se acumulou no aparcadoiro do centro comercial Bonaire de València tras a DINA da pasada terza feira, que provocou máis de 200 mortes só no País Valencià.

Así o asegurou este domingo o ministro de Política Territorial e Memoria Democrática, Ángel Víctor Torres, durante unha comparecencia desde a Moncloa tras a reunión do Comité de crise para o seguimento dos efectos da DINA. "Con respecto ao centro comercial de Bonaire, nestes momentos hai 50 efectivos traballando. Están retirando auga e non podemos especular", afirmou.

O ministro pediu que non se especule arredor da cifra de falecidos e falecidas que poida haber no aparcadoiro deste recinto, e insistiu en que se descoñece cantos vehículos pode haber no seu interior.

"Nestes momentos o que hai que facer é seguir cos labores [de rescate] e non temos máis información que poidamos dar de cantos vehículos ou persoas pode haber no seu interior. Deixemos que sigan traballando como o están facendo", manifestou.

Persoal da Unidade Militar de Emerxencias (UME) traballa na zona con drons e buzos. Segundo a información transcendida até o momento, nos primeiros coches inspeccionados non se atoparon vítimas.