ONU demanda o fin da ocupación de Palestina
O Consello de Seguranza da ONU, en reunión mantida para abordar a situación do Medio Oriente, incluído o tema palestino, advirte que a solución de moitos dos problemas do pobo árabe pasa polo cesamento da ocupación de Palestina iniciada en 1967.
Dúas foron as alertas lanzadas na reunión dos 15 membros do Consello de Seguranza da ONU.
A primeira a do coordinador especial da ONU para o Proceso de Paz do Oriente Medio, Nikolay Mladenov (persoa non grata á FPLP “ polo seu coñecido apoio ao inimigo e os seus intentos de xustificar os crimes contra a nación palestina cando comezou a súa carreira política como primeiro ministro de Bulgaria”) . Segundo Mladenov a solución de dous Estados independentes para israelís e palestinos “está máis ameazada do que nunca" porque a "continuidade da situación no territorio palestino ocupado reduce a perspectiva para unha paz xusta e sustentábel entre os dous lados".
A outra proposta veu da man de Stephen O'Brien secretario xeral adxunto para os Asuntos Humanitarios. O´Brien falou perante o Consello da crise humanitaria imperante na bloqueada Franxa de Gaza e en Cisxordania, así como os obstáculos que enfrontan as axencias e o persoal encargado da asistencia, mesmo os funcionarios da ONU que necesitan unha autorización especial para deixar Gaza cando precisan participar de reunións en Xerusalén ou Ramallah.
O representante da ONU explicou que máis da metade das peticións deses pases especiais foron rexeitados polo goberno israelí o mes pasado e algúns dos funcionarios foron requiridos a non facer nova petición nun prazo dun ano.
O'Brien afirmou que até mesmo a palestinos que sofren dalgún tipo de doenza, xeralmente cancro, e fan tratamento urxente en Israel se lles denegou a autorización.
Axuda Humanitaria
O´Brien sinalou aínda os desafíos das organizacións humanitarias para entregar axuda aos palestinos e afirmou que na Faixa de Gaza, o 70% da poboación de case dous millóns de habitantes, recibe algunha forma de asistencia internacional, na súa maior parte alimento, mais, a pesar diso, a "capacidade da organización de entregar a comida está cada vez máis restrinxida" pois Israel prohibe ou restrinxe a importación de certos produtos por Gaza sob a alegación de que poden ter "uso dobre" e serviren tanto para fins militares como civís.