A Organización Mundial da Saúde (OMS) critica a lentitude "inaceptábel" da vacinación contra a Covid en Europa, continente que padece a situación epidémica "máis preocupante" desde "hai meses". A queixa coincide co feito de Europa alcanzar a cifra de 750.000 mortes pola doenza desde o inicio da pandemia.
"O ritmo lento da vacinación prolonga a pandemia", lamentou a sección europea da OMS nun comunicado, onde se subliña que o número de novos casos en Europa progresou con forza nas últimas cinco semanas.
"As vacinas son a nosa mellor forma de saír da pandemia. Non só funcionan, senón que tamén son moi eficaces para limitar as infeccións. No entanto, o despregue destas vacinas é inaceptabelmente lento", afirmou o director de OMS Europa, Hans Kluge, citado no comunicado de prensa.
#Vaccines present our best way out of this pandemic. Not only do they work, they are also highly effective in preventing #COVID19 infection. However, the roll-out of these vaccines is unacceptably slow. https://t.co/hfjMGViidu
— Hans Kluge (@hans_kluge) April 1, 2021
"Déixenme ser claro: necesitamos acelerar o proceso aumentando a produción, reducindo as barreiras para a entrega de vainas e usando calquera dose que teñamos en existencia", dixo. "Actualmente a situación rexional é a máis preocupante que observamos desde hai varios meses", insistiu.
Na zona europea da OMS, que inclúe uns 50 países, entre estes Rusia e varios Estados de Asia central, o número de novos falecementos superou os 24.000 a semana pasada e achégase "rapidamente" á marca do millón, segundo salientou a organización internacional.
Ademais, o número de casos semanais chegou a 1,6 millóns, en tanto que caera por baixo de un millón hai só cinco semanas.
Arreporse ao cansazo
A OMS cualificou de "necesarias" as novas restricións pola repunta de casos, o avance da cepa británica e o aumento da mobilidade por Semana Santa.
"A situación da rexión é agora máis preocupante do que vimos en varios meses", reiterou a directora rexional de Urxencias da OMS en Europa, Dorit Nitzan. Na súa opinión, hai ademais "riscos asociados" ao "aumento da mobilidade" e ás reunións nestas xornadas festivas, dixo.
Un total de 27 países europeos aplican actualmente restricións de distinta intensidade, dos que 21 impuxeron toques de recoller. Nas últimas dúas semanas, 23 Estados endureceron as súas medidas para frear a propagación da pandemia, en tanto que 13 relaxaron as restricións.
"Non nos podemos permitir ignorar o perigo. Todos temos que facer sacrificios, non podemos deixar que nos venza o esgotamento. Debemos continuar freando o virus", afirmou Kluge.