Musk consolida o seu control da Administración e terá a última palabra nas contratacións públicas

Incluso despois de que a representante demócrata Alexandria Ocasio-Cortez alertara de que nos Estados Unidos se está a producir un “golpe de Estado plutocrático”, reclamando a Elon Musk que se quere o poder se presente aos comicios, o presidente do país, Donald Trump, rubricou unha orde executiva que outorga aínda máis poderes á persoa con máis recursos económicos do planeta, máis de 400.000 millóns de euros, que terá que aprobar case todas as novas contratacións da Administración estadounidense, recolleron a cuarta feira medios internacionais. A pasada semana, Musk foi nomeado “empregado especial do Goberno”, aínda que non forma parte del, posto que os seus integrantes deben ser aprobados polo Senado. Isto permítelle evitar que se xulguen os seus múltiples conflitos de intereses, pois recibe milleiros de millóns de euros en contratos gobernamentais como director de Tesla ou SpaceX. En paralelo, 11 axencias federais están a investigar ou aplican medidas de regulación a seis das súas empresas, axencias que, como o resto da Administración, son o seu obxectivo á hora de diminuír o persoal público. “A transparencia é o que xera confianza”, asegurou á beira do republicano Trump o magnate durante a sanción da norma, que ao tempo rexeitou facer públicas as súas declaracións financeiras. En última instancia, esa categoría, como líder do Departamento de Eficiencia Gobernamental (DOGE) –que a pesar do seu nome non é unha axencia federal no sentido estrito–, implica que só o Departamento de Xustiza ten competencias para facerlle cumprir as regras éticas que se aplican as e os traballadores públicos e garantir a rendición de contas. Non obstante, nada indica que iso vaia acontecer, como deixou claro Edward Martin, fiscal provisorio de Washington, a capital do país. Após intentar bloquear funcionarias e funcionarios os esforzos de Musk para acceder a información clasificada sen os permisos correspondentes, Martin advertiu que a Axencia Federal de Investigación (FBI) e outros organismos estaban a prepararse para “proceder rapidamente” despois de coñecer que “certas persoas e/ou grupos cometeron actos que parecen violar a lei ao atacar os empregados de DOGE”. O fin principal dese departamento é recortar os gastos públicos, o que levou Trump a mudar de forma executiva a lexislación para legalizar os despedimentos masivos entre as máis de dous millóns de persoas que traballan na Administración, que antes tiñan o encargo primario de cumprir a normativa e agora teñen que cumprir as ordes das súas superiores. Musk pide "prisión" para Starmer e inquire se Washington debe "liberar" Londres dun "Goberno tiránico" Á vez, destituíu a maioría das inspectoras e inspectores que supervisaban o traballo público e ofreceu ás persoas traballadoras recibir o seu salario até setembro se renunciaban antes do 6 de febreiro, algo instigado por Musk e paralizado pola Xustiza. Segundo a Casa Branca, que buscaba a dimisión de até 10% delas, apenas 65.000 aceptaron, arredor de 3%. “Esta é quizais a primeira vez que a alguén de fóra do Goberno se lle deu abertamente carta branca”, asegurou Michael Gerhardt, profesor de Dereito Constitucional da Universidade de Carolina do Norte, que afirmou que a influencia de Musk sobre o Gabinete é posibelmente inconstitucional, amais de antidemocrática. Sexa como for, o certo é que o equipo de Musk xa se fixo co control do sistema de pagos do Tesouro estadounidense, responsábel de distribuír os fondos federais, entre eles seis billóns de euros para os salarios do funcionariado, as pensións, os programas de seguros médicos Medicare e Medicaid e outros gastos esenciais. Todo isto co aval de Scott Bessent, secretario do Tesouro, e despois de ser suspendido un alto funcionario que se negou a darlle as chaves de acceso ao sistema. Na práctica, ese control supón que Musk, como no resto das súas decisións sen pasar polo lexislativo (e está en cuestión se tamén polo Executivo), podería bloquear os pagos de calquera destes conceptos, o que desatou unha alarma recollida pola Xustiza –xa criticada polo millonario–, que limitou de forma provisoria o acceso de DOGE ao sistema de pagos, agás a dous dos seus membros que só poderán consultar os datos. Doce estados xa demandaron por unha acción “ilegal, sen precedentes e inaceptábel”. Os recortes como escusa Da mesma maneira e sen cumprir coa lexislación, o seu equipo tomou o control da Oficina de Xestión de Persoal, a Administración de Servizos Xerais ou a Axencia dos Estados Unidos para o Desenvolvemento Internacional (Usaid), na súa loita declarada por recortar dous billóns dos sete previstos no orzamento de 2026, unha cifra semellante ao do déficit nas contas, que tanto Trump como Musk atribuíron a corrupción e unha mala xestión. Estados Unidos frea a regulación da IA e impulsa os multimillonarios das tecnolóxicas Porén, dous expertos republicanos en orzamentos admitiron á axencia Reuters que “semella impulsado máis por un asalto ideolóxico ás axencias federais odiadas polos conservadores que un esforzo de boa fe para aforrar dólares dos contribuíntes”. A pesar diso, nada indica que os recortes vaian parar, e a última orde executiva de Trump fixa que non se poderá contratar máis dunha persoa funcionaria por cada catro que marchen, ordenando o deseño dun plan para reducir a súa cifra a nivel global. As únicas excepcións son as traballadoras da seguridade pública, inmigración ou aplicación da lei. Con todo, até despois de facerse cun control sen precedentes para un cargo non electo, Musk tivo tempo para os seus negocios privados e lidera un consorcio que ofreceu case 94.000 millóns de euros por facerse con OpenAI, dona de ChatGPT, o que rexeitou o seu director, Sam Altman. Veto a 'AP' por usar "golfo de México" tras pregarse Google e Apple Apple, na súa aplicación Apple Maps, comezou a referirse a cuarta feira ao golfo de México como “golfo de América” nas visualizacións desde os Estados Unidos, un día despois de que Google fixera o propio seguindo as instrucións de Donald Trump, que ordenou cambiar o nome no país. No caso desta última, os seus mapas seguen a marcar “golfo de México” para as persoas usuarias da inmensa maioría do resto do mundo, mais introducindo entre paréntese a denominación de Trump. Malia que vai máis alá das súas atribucións como mandatario, tamén está decidido a forzar o seu uso, como amosou o veto a dous xornalistas da axencia AP, aos que se lle impediu cubrir dous actos a terza feira na Casa Branca, que lle exixiu utilizar “golfo de América” nas súas informacións. AP detallou despois da investidura de Trump que non usaría ese termo porque “difunde novas en todo o mundo”, o que lle obriga a garantir que os lugares que menciona “sexan facilmente recoñecíbeis para todas as audiencias”.