O Grupo de Mulleres da Asemblea Internacional dos Pobos (AIP), co gallo do 25-N, fai un chamamento ás organizacións populares, "e a todas as persoas do mundo que teñen conciencia", a "deter o xenocidio que sofre o pobo palestino en Gaza" e levar ante a xustiza os "crimes de guerra cometidos" polas Forzas Armadas de Israel. A través dun comunicado, salientan que "máis de dous millóns de palestinos e palestinas indefensas levan máis de 36 días na Faixa de Gaza sometidas a un exterminio sistemático levado a cabo polo exército da ocupación sionista", utilizando un "arsenal de armas prohibidas internacionalmente", como bombas de acio e fósforo, "contra nenos e nenas, mulleres e civís indefensos, coa compricidade das potencias imperialistas mundiais encabezadas polos Estados Unidos".
Moitas das vivendas dos barrios residenciais de Gaza, lembran, quedaron destruídas por completo, o que provocou até o momento o asasinato de máis de 14.000 persoas, entre elas 4.600 nenos e nenas, 3.100 mulleres e 650 persoas maiores de idade. Adicionalmente, 29.000 persoas foron feridas e máis de 2.700 seguen baixo os entullos, incluídos 1.400 menores. E máis de 1,7 millóns de palestinos e palestinas -a práctica totalidade da poboación gazatí-, segundo datos da ONU, foron desprazadas na asediada Faixa.
Nada menos que 34% dos hospitais de Gaza quedaron fóra de servizo como consecuencia dos bombardeos e o sitio, e o 65% dos centros de atención primaria e de emerxencia de saúde tiveron que fechar pola "forte ofensiva militar sionista e por falta de combustíbel", alertan. Ademais, 189 profesionais da saúde foron asasinados polos ataques e máis de 100 resultaron feridos, e 50 ambulancias foron danadas, 25 das cales quedaron completamente destruídas. Á parte do asasinato de 47 xornalistas por do Exército israeí, con máis de 50 oficinas de medios de comunicación destruídas.
"O xenocidio sistemático contra a poboación de Gaza e os continuos bombardeos das cidades de Cisxordania son o último dos 75 anos de campaña sionista contra o pobo palestino, que non só destruíu Gaza co armamento israelita letal, senón que tamén privou á poboación civil das necesidades máis básicas para a supervivencia como a auga, os alimentos, os medicamentos e o combustíbel", denuncian.
O volume de proxectís disparados pola ocupación e o seu exército sobre Gaza, subliñan, "superou a forza das bombas de Hiroshima e Nagasaki". "Despois de bombardear as ambulancias, os centros do Organismo de Obras Públicas e Socorro das Nacións Unidas (OOPS), as escolas, as panaderías, os lugares de culto, os tanques de auga e os paneis de enerxía, e despois de illar a Gaza do mundo exterior cortando Internet e os medios de comunicación, hoxe en día vémolos asediando os hospitais, bombardeando calquera recurso de vida en Gaza e ameazando co uso das armas nucleares", engaden.
"A ofensiva lógrase mediante un brutal asedio imposto por unha maquinaria de guerra nazi, coa intención de levar a cabo un xenocidio sistemático para forzar ao pobo palestino a desprazarse da súa propia terra e así, acabar por completo coa causa palestina. Trátase de verdadeiros crimes contra a humanidade que permanecerán como unha mancha na conciencia a unha parte significativa do mundo que permanece ou ben pasiva, ou simplemente como observadores ou xustificando e apoiando os diarios masacres sanguinarios da ocupación sionista. Estas accións —e inacciones— fan caso omiso de todas as leis, acordos, convenios e normas internacionais para protexer á poboación civil, criminalizar o xenocidio e impedir o sitio e a inanición forzada", continúa a AIP.
E desde o 7 de outubro, o Exército israelí e o Servizo de Prisións de Israel estiveron aplicando, censuran, "unha política de terrorismo e represión sen precedentes contra as e os presos palestinos". "A opresión vai máis aló dos máis de 2.300 detidos, entre eles nenos e nenas, mulleres e presos liberados. Durante a súa detención e interrogatorio foron sometidos a violencia, tortura e vexacións, o que provocou a morte de tres presos. O número de presos nos cárceres da ocupación sionista excede os 7.000 entre homes e mulleres, estas persoas son sometidas a medidas represivas sen precedentes dirixidas polo ministro de Seguridade Nacional israelí, o fascista Ben Gavir. Ditas medidas consisten en retirarlles os dereitos que adquiriran, illalos do mundo exterior e utilizalos como modo de presión en calquera negociación para o intercambio de prisioneiros", acrecentan.
En vista diso, fan un chamamento a todos os pobos do mundo a "deter o xenocidio". "A quen lles doe ver os restos dos nenos de Gaza baixo os entullos provocados polo armamento israelí, pedímoslles que asinen este chamamento e protesten en nome das súas organizacións para que podamos enviar unha mensaxe unificada esixindo o fin do xenocidio do pobo palestino, o seu desprazamento e a entrega inmediata de axuda e materiais de socorro para poñer fin a un dos maiores crimes contra a humanidade do século actual", advirten.
"Cada minuto que pasa, decenas de nenas e nenos palestinos pagan o prezo coas súas vidas baixo o brutal bombardeo do exército da ocupación sionista. Que o mundo reaccione non só denunciando e condenando, senón uníndose para deter esta brutal guerra, salvar o que queda da nosa humanidade, defender o dereito do pobo palestino para crear o seu propio Estado libre e independente. Así mesmo, demandar a ocupación sionista ante a Corte Penal Internacional, para que examine “a intención genocida e a incitación ao xenocidio, os crimes contra a humanidade e os crimes", conclúen.
