A farmacéutica estadounidense Moderna anunciou que esta segunda feira presentara a solicitude de autorización da súa vacina contra a Covid-19 tras corroborar que a eficacia é de 94,1%. En concreto, a compañía pediu á Administración de Alimentos e Medicamentos dos EUA (FDA) a autorización para o seu uso en caso de emerxencia, así como a aprobación condicional á Axencia Europea do Medicamento (EMA).
Os resultados preliminares publicados hai dúas semanas situaban a eficacia desta vacina en 94,5%. A empresa anunciou agora que non tivera constancia de problema de seguridade ningún até o día de hoxe. Ademais, segundo explicou, o remedio ten unha taxa de éxito de 100% na prevención de casos graves e con síntomas severos.
Segundo Moderna, a análise de eficacia do estudo de fase tres incluíu 30.000 participantes cunha eficacia de 94,1%, cunha tolerancia xeralmente boa e sen que se identificasen problemas de seguridade graves até a data.
O estudo da fase tres superou os dous meses de seguimento medio despois da vacinación, segundo exixe a FDA para a autorización do uso de urxencia, explicou a farmacéutica nun comunicado.
As primeiras inxeccións pódense administrar a partir do 21 de decembro se o proceso se desenvolve sen problemas e se dá a aprobación, dixo Stéphane Bancel, director executivo da Moderna, nunha entrevista con The New York Times.
Reaccións leves
A eficacia da vacina "foi constante" segundo a idade, a raza e a etnia, e a demografía de sexo e, aínda que se realizan continuas revisións, "non se identificaron problemas serios".
Ademais, Moderna afirmou que, segundo unha análise anterior, as reaccións adversas máis comúns ao administrar o remedio eran leves, e incluían dor e irritación no lugar da inxección, fatiga, mialxia, molestias nas articulacións e dor de cabeza.
"Esta análise primaria positiva confirma a capacidade da nosa vacina para previr a enfermidade Covid-19 cunha eficacia de 94,1% e, o que é máis importante, a capacidade de previr a enfermidade Covid-19 grave. Cremos que a nosa vacina proporcionará unha ferramenta nova e poderosa que pode mudar o curso desta pandemia e axudar a previr enfermidades graves, hospitalizacións e mortes", engadiu Bancel.
Moderna ten a intención ademais de obter por parte das Organización Mundial da Saúde (OMS) a precualificación (PQ) da vacina e que sexa incluída na Listaxe de Uso de Emerxencia do organismo internacional.
