Milei xera tres crises bilaterais á vez que empeora a economía arxentina

En apenas 48 horas, o presidente da Arxentina, o ultradereitista Javier Milei, foi quen de desatar unha crise diplomática con tres Estados latinoamericanos que alcanzou o seu apoxeo coa decisión de Colombia de expulsar diplomáticos arxentinos no país, entre eles o embaixador, Gustavo Dzugala, segundo recolleron na madrugada da quinta feira medios internacionais. O Executivo colombiano acusou Milei de denigrar o presidente Gustavo Petro, o primeiro progresista elixido á fronte do país, o que “deteriorou a confianza da nosa nación”, polo que comunicaría “polas canles institucionais diplomáticas” a súa resolución. Á vez, sinalou que non é a primeira vez que acontece algo similar, o que “está a afectar ás históricas relacións de irmandade entre Colombia e a Arxentina”. Horas antes, transcenderan fragmentos da entrevista de Milei coa canle estadounidense CNN, que se emitirá de forma íntegra o domingo. Nela, o mandatario referiuse a Petro apuntando que “moito non se pode agardar de alguén que era un asasino terrorista”, en alusión á súa integración no Movemento 19 de abril (M-19), unha guerrilla desmobilizada en 1990. En xaneiro, o ultradereitista cualificouno de “comunista asasino que está a afundir Colombia”, o que motivou que Bogotá chamara a consultas o embaixador na Arxentina, Camilo Romero, que foi convocado de novo nesta ocasión. Daquela, Petro indicou que “os que nos atacan non teñen nin idea que é comunismo nin socialismo”. No marco da mesma entrevista coa prensa dos Estados Unidos, Milei tamén elevou as tensións con México ao subliñar que o feito de que “un ignorante como [o presidente progresista Andrés Manuel] López Obrador fale mal de min enaltéceme”. Con anterioridade a asumir a Presidencia, o mexicano tamén fora obxecto das descualificacións do arxentino, que manifestara que era “verdadeiramente patético, lamentábel, repugnante”, ao que retrucou López Obrador asegurando que a súa política, baseada en que o Estado asuma “as débedas dunha elite” e lle quite “aos de abaixo para darlle aos de arriba”, “non vai funcionar”. Desta vez a resposta procedeu de Claudia Sheinbaum, candidata do Movemento de Rexeneración Nacional (Morena), a formación do presidente, a substituílo no cargo tras os comicios de xuño, que demandou “respecto” para el e fixo fincapé en que a formación ten clara a súa defensa do papel do Estado na economía. O terceiro país co que a Arxentina se puxo a mal foi Venezuela. A terza feira, o Goberno de Milei anunciou que outorgou asilo a seis persoas da oposición na súa sede diplomática en Caracas, os cinco nomes que transcenderon son persoas próximas a María Corina Machado (Vente Venezuela) e buscadas pola Xustiza venezolana. Pouco antes, o presidente de Venezuela, o progresista Nicolás Maduro, anunciara a captura de dous membros do “partido de extrema dereita fascista” que programaban atentar contra el. Amais, o país austral enviou no mínimo dous axentes da Xendarmería Nacional para custodiar a embaixada arxentina despois de denunciar que sufrira unha interrupción da subministración eléctrica. Así e todo, as tensións bilaterais xa marcaran a relación nas últimas semanas logo de que Milei entregara aos Estados Unidos un avión venezolano que estaba retido no aeroporto de Bos Aires desde 2022, ao que reaccionou Caracas fechando o seu espazo aéreo aos aeroplanos arxentinos. Após o choque con Colombia, o Goberno arxentino tratou de minimizar as consecuencias, solicitando que “as diferenzas” entre Milei e Petro non afecten “a relación entre os pobos”, mais insistindo en que “a posición” do ultradereitista “sempre foi a mesma”. Logo dunha campaña electoral na que insultou repetidamente mandatarios de Estados gobernados por forzas progresistas, ameazando con rachar as relacións, unha vez no poder Milei minimizou as críticas a países como o Brasil ou a China. A inflación interanual aumentou un 276% As políticas neoliberais de Milei levaron en pouco máis de tres meses a un novo incremento da inflación, colocando a Arxentina na primeira praza mundial cun aumento interanual dos prezos de 276%. En paralelo, os salarios perderon unha quinta parte do seu poder adquisitivo, nunha caída que apenas se producira a este ritmo no último período da extrema dereita no poder, na ditadura militar, explica o historiador Ezequiel Adamovsky. A pobreza chegou ao seu punto máis alto en dúas décadas e afecta case 60% da poboación, cunha suba tamén da cifra de persoas indixentes, que xa son 15% das persoas arxentinas, o que contrasta coas alzas masivas en servizos públicos como o transporte. Por exemplo, o metro de Bos Aires culminará en xuño un aumento progresivo do prezo, que medra máis de 500%. As medidas de Milei, que tanto en política interna como externa teñen como “denominador común na xestión” a “torpeza e o desprezo polo ser humano”, detalla o xornal Página 12, alcanzaron un extremo que levou o Fondo Monetario Internacional, expoñente da aplicación das políticas neoliberais defendidas por Milei e que forzou varios Estados a implementalas a cambio de préstamos, a pedirlle que “non caian desproporcionadamente sobre as familias da clase traballadora nin os sectores produtivos”. Choque paralelo entre Gobernos progresistas no sur do continente No que atinxe ás eleccións presidenciais que decorrerán en Venezuela o 28 de xullo deste ano, o Brasil e Colombia trasladaron a “preocupación” arredor das denuncias da Plataforma Unitaria Democrática (PUD) de que non puido inscribir, por problemas co sistema dixital utilizado, a súa candidata, Corina Yoris, designada por mor da inhabilitación de Machado, acusada pola Xustiza de participar na “trama de corrupción” do presidente autoproclamado Juan Guaidó e “propiciar” o bloqueo ao país e o roubo de empresas públicas venezolanas a raíz das sancións unilaterais impulsadas por Occidente. Con todo, a PUD acabou por inscribir Edmundo González como candidato após unha extensión do prazo por parte do organismo electoral, nun nomeamento que explicou como provisorio. Tras o feche do prazo, 13 candidaturas foran rexistradas á Presidencia do país, incluída a do actual mandatario. A PUD recalca que o resto de opcións son persoas próximas ao Goberno, algo que candidatos como Manuel Rosales (Un Novo Tempo), que xa perdeu en 2006 contra o defunto Hugo Chávez, ou Antonio Ecarri (Alianza do Lapis), fillo da persoa elixida por Guaidó para a embaixada en Madrid, rexeitan. Petro contestou ás acusacións de inxerencia de Venezuela apuntando que “a maxia de Chávez foi propor democracia e cambio no mundo”, ratificando que a “revolución de hoxe é transformar o mundo profundando na democracia” e aludindo ás críticas de Maduro a “Gobernos de dereita” e de “esquerda covarde” por non condenar o intento de atentado.