Milei afronta a segunda folga xeral contra as políticas da ultradereita, que sumiron na pobreza case 60% da poboación

A piques de entrar no seu quinto mes de mandato, o presidente ultradereitista arxentino, Javier Milei, é obxecto a quinta feira da segunda folga xeral convocada polas forzas sindicais contra o “impacto” das súas políticas, que intensificarán un “axuste de prezos, de tarifas”, que sumado ao “axuste que se vén dando de achicar os salarios só nos vai levar a un proceso recesivo dun nivel inaceptábel”, detallou Héctor Daer, un dos líderes da Confederación Xeral do Traballo (CXT), que impulsa a greve xunto á Central de Traballadoras e Traballadores da Arxentina (CTA-T) e a Central de Traballadores da Arxentina Autónoma (CTA-A). Tras a alta adhesión gremial á mobilización prevese que non haxa voos desde dous aeroportos internacionais, o Jorge Newbery e o de Ezeiza. Medios locais indican que tampouco funcionará a meirande parte do transporte público, as entidades públicas, as escolas ou os bancos. En paralelo, reduciranse os servizos nos centros hospitalarios. Esta folga estivo precedida de protestas de múltiples sectores. A finais de abril foi a quenda das universidades, que ademais de desenvolver unha greve, protagonizaron unha manifestación en Bos Aires na que xuntaron máis de 100.000 persoas segundo as cifras do Executivo, criticando os recortes que puxeron en risco o futuro de todos os centros superiores públicos. A comezos desta semana, os sindicatos do transporte público terrestre, aéreo e marítimo provocaron atrasos e cancelacións coas súas protestas contra a reforma laboral. A terza feira foron as organizacións sociais as que se manifestaron para demandar aumentos nas achegas aos comedores populares, limitadas no marco do neoliberalismo extremo aplicado por Milei coa eliminación de axudas, liberalización de prezos e a alza xeneralizada das tarifas dos servizos. No caso do metro de Bos Aires por exemplo, en poucas semanas completarase a suba progresiva do prezo, 500% máis caro desde decembro, os alimentos escalaron 70% e a electricidade e o gas entre 150% e 400%. A primeira folga xeral contra Milei paraliza o territorio arxentino No que atinxe aos comedores, as carencias na entrega de alimentos e fondos, no medio dun intento de expulsar os movementos sociais da súa xestión a favor de entidades relixiosas, levaron á presentación dunha demanda contra a ministra de Capital Humano, Sandra Pettovello, á que a Fiscalía reclamou que informe dos recursos asignados a este ámbito e do uso dos fondos recibidos no marco do Programa de Nacións Unidas para o Desenvolvemento. A alimentación de catro millóns de persoas, na súa maioría nenas e nenos, depende deles. Inflación e caída da economía A inflación interanual ficou en marzo en 287,9% após medrar 11%, 51,6% no primeiro trimestre do ano. Nese mes, no medio dunha diminución do consumo, a actividade económica estaba 9,7% por baixo da mesma data un ano antes, algo que se estende desde o 16% do sector gandeiro até a perda de 24% na construción ou de 13,5% do comercio. Detrás disto está unha caída de case 20% no poder adquisitivo desde a investidura de Milei en decembro, co salario medio por riba do valor da canastra básica de alimentos. No tocante ás traballadoras e traballadores públicos, primeiro foilles conxelado o salario e logo aprobado un aumento de 8%, moi por baixo do auxe da inflación e afectado pola desvalorización de 50% do peso arxentino. Neste sector, 24.000 persoas foron despedidas e 50.000 máis están en risco de perder o traballo ao non contar cun contrato fixo. Neste contexto, a pobreza escalou até case 60% da poboación, xerando un movemento cara ao traballo informal, que concentra 47,4% das traballadoras e traballadores. A pesar de que o desemprego estaba en plena diminución cando Milei chegou ao poder, con 5,7%, a cifra máis baixa desde o comezo da serie estatística en 2004, en poucos meses converteuse nun dos principais problemas da cidadanía (30% segundo unha sondaxe de Opina Argentina), xusto por baixo da inflación (32%). Un decreto de Milei afunde a Arxentina no neoliberalismo extremo: cales son as medidas principais? O mandatario xustifica esta situación precisamente na loita contra a inflación, que prevé de máis dun ano e medio de duración. Porén, o descontento social e o aumento das protestas -no primeiro trimestre deste ano triplicáronse os conflitos laborais en relación a un ano antes- levouno a reverter algunha das medidas, como a liberalización de prezos dos seguros médicos privados. O xornal Página12 apuntou que o Goberno “intúe que se segue este ritmo pronto ningún sector da economía arxentina será competitivo”. Ao tempo, Milei adoptou posicións clásicas da ultradereita, como minimizar a cifra de vítimas da ditadura militar. Tamén suspendeu, aducindo unha auditoría, o pago das reparacións a vítimas do terrorismo de Estado. A nivel internacional, Milei aliñou o país cos Estados Unidos, trasladando a súa intención de ser admitido como socio global da Organización do Tratado do Atlántico Norte (OTAN), e o seu Executivo desencadeou crises diplomáticas con México, Venezuela, Chile ou Colombia, que contan con líderes progresistas. Con todo, non rompeu relacións coa China como anunciara que faría con anterioridade, e mantén as negociacións sobre os préstamos de Beijing. O país asiático tamén está vinculado a unha das últimas polémicas do Goberno, cando a titular de Exteriores, Diana Mondino, ao ser cuestionada sobre se nunha base científica chinesa na Arxentina había militares, asegurou que non sabía posto que “son chineses, son todos iguais”. As empresas estranxeiras, beneficiadas mentres remiten os dereitos laborais Até o de agora, a principal norma en vigor impulsada por Milei é o decreto de necesidade e urxencia, que modificou ou eliminou máis de 300 leis, acabando con recursos chave do Estado para intervir na economía e abrindo a porta ás privatizacións de empresas públicas, declarando á vez unha emerxencia que incrementa as potestades do mandatario. Milei insiste e Vigo perdería 50.000 toneladas de peixe anuais coa 'lei Ómnibus' arxentina Aínda que a Xustiza suspendeu apartados como o da reforma laboral, que beneficiaba os empresarios, o resto do paquete seguirá activo até que as dúas Cámaras lexislativas rexeiten o decreto, algo que até o de agora só fixo o Senado. Con todo, a Cámara Alta xa comezou o estudo da outra norma clave coa que Milei aspira a ampliar o alcance das súas medidas, a coñecida como 'lei ómnibus', que a Cámara de Deputados vén de aprobar e cuxo futuro depende do Senado, no que a prensa local apunta que ten opcións de prosperar logo da suposta disposición dalgún membro peronista do órgano a apoiar o texto. Tras ser reformada polo rexeitamento en primeira instancia da Cámara Baixa, a norma reintroduce impostos ás ganancias a un millón de persoas traballadoras, que incluirán amais conceptos como vales de comida, horas extras e bonos por produtividade, incrementa os períodos de proba ou flexibiliza as condicións dos contratos laborais. Tamén permite regularizar beneficios non declarados de até 93.000 euros sen sanción, elimina a acción penal contra empresarios que non rexistran as e os asalariados ou outorga un trato preferente ás grandes empresas estranxeiras.