Sunak pon como obxectivo acabar coas migracións ao Reino Unido

Cando menos 14 migrantes morreron ao naufragar a embarcación na que trataban de chegar a Europa perto da costa de Tunisia, comunicaron onte as autoridades do país africano, que salientaron que foron quen de rescatar con vida 54 persoas. Desde o comezo de 2023 xa morreron ou desapareceron máis de 300 persoas. Parte dos migrantes que fan ese traxecto diríxense a Francia coa esperanza de cruzar o canal da Mancha e chegar ao Reino Unido fuxindo de conflitos ou situacións socioeconómicas críticas, precisamente a “xeopolítica” explica a alza das chegadas, corrobora Peter Walsh, do Observatorio de Migración da Universidade de Oxford, que incide en que tamén está vinculado co maior control das rutas migratorias terrestres no continente, polo que a vía marítima aumentou en importancia. As estatísticas oficiais británicas refiren que desde os máis de 8.000 migrantes sen regularizar detectados en 2020 pasaron a case 46.000 en 2022, principalmente de Afganistán, Eritrea, o Sudán, Albania, Irán, o Irak ou Siria. Porén, ao longo do pasado ano só foron relocalizados no país baixo o sistema de asilo 1.185 refuxiados, aos que hai que engadir 4.473 visados para reunificacións familiares. No contexto dunha desvantaxe nas enquisas de arredor de 20 puntos a favor dos laboristas que non muda co paso dos meses, o primeiro ministro británico, o conservador Rishi Sunak, agarrouse a estas cifras para lanzar unha proposta de reforma do sistema migratorio que xa foi cuestionada pola Organización das Nacións Unidas, amais de por organizacións de dereitos humanos. O proxecto, que xa está a ser estudado no lexislativo, busca denegar sen considerar calquera solicitude de asilo dunha persoa que entre no país por medio dunha pequena embarcación, aínda que proveña dun país en guerra. Estes migrantes terían prohibido de por vida entrar no Reino Unido ou solicitar a cidadanía. Os migrantes serán detidos durante 28 días e despois expulsados ao seu país de orixe ou a un “terceiro país seguro”, defende Londres, no caso de que non sexa posíbel. Fontes gobernamentais citadas por The Guardian apuntan que o Executivo prevé expulsalas a Ruanda, a pesar de que a Xustiza aínda non tomou unha decisión sobre este aspecto, que foi denunciado tras intentar o Goberno enviar a Kigali persoas que solicitaran asilo mentres non se respondía á súa solicitude. Ademais, o plan busca estabelecer cotas de persoas refuxiadas, pero que non se decidirán até a fin das chegadas en barco. Esta normativa tería carácter retroactivo, polo que tamén afecta ás persoas que xa se atopan no país, e espertou as críticas de antigos ministros do Partido Conservador. Na resposta da titular de Interior, Suella Braverman, aos deputados da formación recoñeceu que “hai máis de 50% de posibilidades de que non sexa compatíbel coa Convención Europea de Dereitos Humanos”, así e todo, se os lexisladores conservadores non o evitan, a maioría parlamentar de Sunak permitiríalle aprobar a norma de forma folgada. Pola súa parte, a Organización das Nacións Unidas (ONU) arremeteu contra a proposta, que viola “o dereito internacional e o dos refuxiados”, afirmou Volker Türk, Alto comisionado da ONU para os dereitos humanos, que puxo o foco en que estes dereitos deben ser respectados “sen importar o seu status migratorio ou a forma na que chegan a un país”. Türk tamén incidiu en que o texto provoca dúbidas, ao potencialmente “violar o dereito a unha valoración individual de cada caso, a non sufrir detencións arbitrarias ou expulsións colectivas”. Cun perfil máis baixo, a Unión Europea tamén cuestionou a legalidade da proposta, a comisaria de Asuntos Interiores do bloque comunitario, Ylva Johansson, admitiu onte que trasladou a Braverman que “creo que isto está a violar o dereito internacional”. Durante o debate que se xerou no Reino Unido arredor desta cuestión, a titular de Interior chegou a afirmar que os migrantes que alcanzan as costas británicas “están rompendo as nosas leis e abusando da xenerosidade dos británicos, e agora temos que asegurar que se lles disuada de facelo”. Desde as organizacións en defensa dos dereitos humanos subliñan que o ataque aos migrantes é unha estratexia política de Sunak para “xerar titulares” e que as apelacións á lexislación rematen no Tribunal Europeo de Dereitos Humanos en Estrasburgo, a quen podería culpar de non lle deixar aplicar a norma, explica Charlie Whelton, de Liberty. Isto tamén lle permitiría enfrontarse por este tema aos laboristas, que lembraron que menos de 1% das peticións de asilo dos migrantes que chegan polo canal da Mancha foron procesadas. Reino Unido e a Alemaña nazi O debate sobre a nova norma contra os migrantes tamén chegou ao seo da BBC grazas ao comentarista e ex futbolista Gary Lineker, que asegurou que se trata dunha política "cruel" contra "as persoas máis vulnerábeis nunha linguaxe que non é diferente á usada por Alemaña na década de 1930", todo cando "aceptamos moitos menos refuxiados que outros países europeos importantes", concluíu. Desde 2014, 209 migrantes morreron no canal da Mancha, unha cuarta parte deles en 2022 e 2023.