Kíiv e Moscova cúlpanse mutuamente da destrución dun encoro en Khersón

O encoro de Nova Kakhovka, 60 quilómetros río arriba da cidade de Khersón, capital do oblast homónimo no que se atopa a infraestrutura, estoupou na madrugada da segunda á terza feira, provocando unha riada no Dniéper que amais pon en risco o sistema de arrefriamento da central nuclear de Zaporijia, a máis grande de Europa, que usaba a auga do encoro. O río Dniéper separa na rexión os territorios dominados por Ucraína -ao oeste- e Rusia -ao leste-. O presidente ucraíno, Volodimir Zelenski, aprestouse a acusar Rusia por destruír a instalación, cualificándoo de “terrorismo”, mentres Ukrhydroenergo, a axencia ucraína de enerxía hidroeléctrica, sinalou que se tratou dunha explosión no interior da sala de máquinas da central eléctrica, apuntando que non é posíbel reparar o encoro de 3,2 km de longo e 30 metros de altura. Pouco despois, a Intelixencia ucraína trasladou que foi “un crime de guerra que será evidencia nun tribunal internacional”, produto do “pánico” que atribuíu a Moscova. Pola contra, Vladimir Leontiev, alcalde da Administración rusa de Nova Kakhovka, acusou Ucraína de bombardear o encoro desde o pasado verán, o único dos seis do río Dniéper que estaba en poder dos militares rusos, nun “acto terrorista dirixido contra civís” que destruíu a central hidroeléctrica e as comportas do encoro. Ademais, o servizo de emerxencias de Khersón, citado por Tass, informou de que a zona foi atacada por Kíiv con mísiles de longo alcance entregados polo Reino Unido. O voceiro do Kremlin, Dmitri Peskov, incidiu en que “podemos afirmar inequivocamente que estamos falando dunha sabotaxe deliberada por parte de Ucraína”, que relacionou por unha parte co “feito de que tendo comezado accións ofensivas a grande escala hai dous días as Forzas Armadas ucraínas non están a alcanzar os seus obxectivos”, e pola outra coa intención de Kíiv de acabar coa subministración de auga doce a Crimea, que procedía do encoro. En paralelo, advertiu de “consecuencias potencialmente moi graves para varias decenas de milleiros de residentes da rexión”. Os membros da Organización do Tratado do Atlántico Norte reiteraron que se trata dun crime de guerra e apuntaron de forma máis ou menos explícita cara a Rusia. O secretario xeral da alianza militar liderada polos Estados Unidos, Jens Stoltenberg, aseverou que é “un acto escandaloso que demostra máis unha vez a brutalidade da guerra de Rusia en Ucraína”. Á vez, o chanceler alemán, Olaf Scholz, fixo fincapé en que a destrución do encoro eleva o conflito a “unha nova dimensión”. Así e todo, Tymofiy Mylovanov, ex ministro de Desenvolvemento Económico e Comercio de Ucraína e presidente da Escola de Economía de Kíiv, trasladou que a beira controlada polas tropas rusas sufriría os peores danos polos efectos da riada. Aliás, The Guardian indica que é probábel a destrución do sistema de canles da rexión, e refire que os modelos minimizan os efectos sobre a urbe de Khersón, controlada por Kíiv. AP afirmou que “non queda claro de inmediato se algunha das partes se beneficia do dano ao encoro”, mencionando as dificultades que xera para a continuación da contraofensiva ucraína e con medios internacionais subliñando que o estreitamento do Dniéper río arriba pode xerar oportunidades militares para Kíiv. En todo caso, as partes fixeron énfase en que non afectará as operacións militares após cruzar acusacións nos últimos meses sobre potenciais intentos de destruír o encoro. Evacuación nas dúas ribeiras do Dniéper Ao facerse pública a situación comezaron as evacuacións por parte das autoridades ucraínas e rusas entre reportes dun aumento de 11 metros no nivel da auga en Nova Kakhovka. Leontiev explicou que a vila ficou “completamente inundada” horas despois da explosión. Amais, Kíiv e Moscova denunciaron que a outra parte bombardeou as zonas que estaban a ser evacuadas, e estimaron as persoas afectadas entre 16.000 e 22.000, alertando do desastre medioambiental que está a provocar. Nese sentido, a Oficina Presidencial de Ucraína comunicou que 150 toneladas métricas de aceite de motor da maquinaria do encoro acabaron no río, co risco de que 300 toneladas métricas máis sigan o mesmo camiño. O ucraíno Centro Mundial de Datos para a Xeoinformática e o Desenvolvemento Sostíbel emitiu un cálculo no que atinxe aos efectos do torrente de auga no que reflicte que arredor de 100 localidades acabarán inundadas, estimando que o nivel de auga iniciará o descenso tras entre cinco e sete días. O certo é que a destrución do encoro, “un dos danos máis significativos contra infraestruturas civís” desde o comezo da invasión rusa, “deixa decenas de milleiros de persoas nunha situación humanitaria nefasta” e “unha ameaza significativa para os civís, as súas vivendas e as súas formas de vida”, laiouse o Comité Internacional da Cruz Vermella, arredor dese punto, as autoridades rusas de Khersón salientaron que os campos agrícolas na zona foron arrasados pola auga. Tamén amosou a súa “preocupación” polas consecuencias para a poboación civil a Oficina da Organización das Nacións Unidas (ONU) para os Dereitos Humanos, asemade, Kíiv e Moscova reclamaron unha reunión do Consello de Seguridade da ONU para que aborde a explosión no encoro. A OIEA reclama ás dúas partes respectar a central nuclear Rafael Grossi, director xeral do Organismo Internacional de Enerxía Atómica, detallou a terza feira que malia a diminución dos niveis de auga na contorna da central nuclear de Zaporijia “non hai risco inmediato para a seguridade da planta” pola existencia dun estanque que permitirá arrefriar os reactores “algúns meses”, e pediu a Rusia e Ucraína non “facer nada para socavar potencialmente a súa integridade”. Ao tempo, Suráfrica recibiu os líderes de Comores, Exipto, Senegal, Uganda e Zambia para traballar na proposta de paz que prevén entregar a mediados de xuño, e Zelenski falou cun enviado do Vaticano sobre a fin das hostilidades. Contraofensiva ucraína O ministro de Defensa de Rusia, Sergei Shoigu, declarou que repeleron ataques do Exército ucraíno en 12 direccións nas últimas 48 horas, no que todo indica supón o comezo da anunciada contraofensiva ucraína. Namentres, os militares ucraínos destacan avances nos flancos da cidade de Bakhmut, en Donetsk, nunha situación que as autoridades rusas consideran “complicada”. Medios especializados aumentan a unha vintena os ataques ucraínos e sosteñen que apenas produciron ganancias territoriais para Kíiv en Donetsk, onde as forzas rusas xa terían recuperado parte do terreo cedido.