Intereses de Israel en Gaza

Vivimos no ámbito internacional tempos de gran confusión, tempos nos que as circunstancias poden mudar dun día para outro, e botar por terra planificacións, expectativas, ou incluso referencias que considerábamos consolidadas. Durante máis de ano e medio erguiámonos pola mañá cos sufrimentos do pobo ucraíno, almorzabamos co heroe Volodimir Zelensky e deitabámonos pensando na noite de pesadelos que nos ía provocar o sátrapa Putin. Entendíamos que esa ía ser a nosa realidade até o remate dun conflito do que só sabíamos ou críamos saber que había un bo e un malo, e que ía gañar o bo. Pero todo mudou o 7 de outubro, desde ese día semella que xa non hai guerra en Ucraína, aínda que segue habendo mortes. O foco agora está pousado sobre Gaza, e preséntasenos como algo novo, como se non existira a agresión israelí a Palestina desde hai décadas. Dísenos que a acción de Hamás é a orixe de todo; un grupo palestino ao que se cualifica de "organización terrorista" decidiu sementar de cadáveres a fronteira entre Gaza e Israel sen razón aparente, e secuestrou varios centos de persoas, israelís e doutras nacionalidades, que asistían a un concerto ou vivían pacificamente na zona. Tamén se nos di que por lóxica Israel debe responder defendéndose; defensa que aínda que ás persoas máis sensíbeis poida parecerlles esaxerada, preséntase como lexítima. Israel é o Estado democrático agredido, e do dereito de defensa do pobo palestino non se di nada. Circulan varias versións ao respecto da operación de Hamás do 7 de outubro, pero tanto se foi unha acción sorpresa froito da efectiva planificación e execución das Brigadas al Qassam que colleron desprevido ao Mossad e ao exército, como se estamos diante dun deixar facer por parte dun Israel que tiña información exipcia sobre un posíbel ataque para poder golpear con máis forza. O certo é que a situación en Gaza mudou radicalmente, e ten consecuencias en toda a rexión. Moi posibelmente os obxectivos de Hamás eran aproveitar a complexa situación política e social en Israel e dar un golpe que mostrara a súa vulnerabilidade, dando folgos á causa palestina para seguir presente no panorama internacional. Impedindo, ao tempo, que Arabia Saudita se incorporara ao proceso iniciado polos Acordos de Abraham, impulsados por Donald Trump, que supuxeron a normalización de relacións diplomáticas e comerciais entre o Estado sionista e catro estados musulmáns, Emiratos Árabes Unidos, Baréin, Sudán e Marrocos. Uns acordos que lle concederon a Israel a condición de interlocutor, obviando a súa actuación co pobo palestino. Israel converteuse desde hai uns anos en potencia gasística, e a decisión da UE de renunciar ao gas ruso dálle a condición de fornecedor estratéxico A actuación do sionismo O sionismo, desde as orixes, ten como obxectivo recuperar o gran Israel que aparece no Xénese como a terra que deu Deus aos fillos de Abraham, e para conseguilo está perpetrando un xenocidio, ao ser Palestina un obstáculo para que se cumpra o mandato divino. Pero non podemos esquecer outros obxectivos menos bíblicos e máis mundanos que poden estar na mente de quen planifican e dan as ordes: —O masacre de Gaza pode garantir a Israel o control total das importantísimas reservas de gas e petróleo da zona, pois se non hai palestinos desaparece o conflito de soberanía sobre as mesmas. Israel converteuse desde hai uns anos en potencia gasística, e a decisión da UE de renunciar ao gas ruso dálle a condición de fornecedor estratéxico; convertendo ademais en necesidade urxente a construción do gasoduto EastMed, proxectado en 2020 por Israel, Chipre e Grecia. —Centos de miles de desprazados palestinos buscando fuxir polo paso de Rafah poden debilitar un Exipto que sofre unha importante crise económica e unha presenza cada vez maior de grupos armados xihadistas, e que celebrará eleccións presidenciais o vindeiro mes de decembro. E, pese á aparente boa relación, hai un contencioso histórico, o control do canal de Suez, paso estratéxico do 30% dos contedores que circulan por mar no mundo. —Que se manteña a inestabilidade na rexión pode prexudicar os intereses de China, pois gran parte do petróleo que importa procede de aquí; debido á guerra en Ucraína no seu proxecto da ruta da seda o corredor sur ten maior importancia, e nos últimos tempos tiña adquirido unha importante influencia na zona, sendo proba a intermediación que levou a un acordo entre dous inimigos tradicionais como son Arabia Saudita e Irán, estados que ademais veñen de integrarse no grupo Brics+. A situación pode mudar de novo en días e non sabemos cara onde, pero hai unha certeza: o pobo palestino precisa que manteñamos a nosa solidariedade.