A influencia dun Elon Musk que forme parte do Goberno dos EUA preocupa a escala mundial: cales son estes medos e que os motiva?

Donald Trump, ex mandatario e novamente candidato republicano á Presidencia dos Estados Unidos (EUA), revelou na madrugada desta cuarta feira que, en caso de ser elixido, Elon Musk ocuparía un cargo aínda inexistente: o de secretario de Estado de Redución de custos. En declaracións á cadea Fox News, o político afirmou que o empresario é "un gran home de negocios" que "sabe recortar gastos". Paralelamente, as autoridades fiscais dos EUA publicaban esta terza feira un documento que certificaba unha doazón de 75 millóns de dólares de Musk á organización política America Pac, creada por el mesmo e apoiada por outros empresarios do ámbito tecnolóxico, para apoiar a campaña de Trump nas eleccións. Entre outras empresas, Musk, coñecido por ser un dos principais representantes da nova ultradereita —movemento all-right— que defende que as grandes corporacións estean por riba dos Estados, é tamén o dono da rede social X (antes Twitter). A presenza do multimillonario no Executivo estadounidense sementa a preocupación de que poida empregar a súa posición para aumentar a influencia sobre a opinión pública. Unha vez realizada a compra da rede social en outubro de 2022, Musk despediu case 70% do persoal e reactivou moitas contas suspendidas por difundir contidos de odio e ligadas á propaganda de extrema dereita, entre elas a do propio Trump, que fora bloqueada por alentar o asalto ao Capitolio dos EUA. Máis iso non é todo, pois a política empresarial levada a cabo por Musk en X facilita a propagación de fakes e de ideas ultra. "NBC News descubriu que polo menos 150 contas de subscritores premium de pagamento en X e miles de contas non pagadas publicaron ou amplificaron contido pro-nazi na rede social nos últimos meses", salientaba o xornal estadounidense en abril. Máis recentemente, X tamén contribuíu a espallar os pogromos racistas que sacudiron o Reino Unido en agosto. Un mozo asasinara tres nenas en Southport e apareceron varios fake que defendían que se trataba dun migrante indocumentado ou un refuxiado. Medios e autoridades salientaron que era mentira, mais as contas premium de extrema dereita en X, algunhas compartidas polo propio Musk, xa coordinaran unha estratexia para difundir a trola. No Brasil, Musk tivo que dar marcha atrás o pasado setembro. Un mes despois da súa negativa a cumprir coa lexislación brasileira e bloquear perfís por orde xudicial, a empresa comprometeuse a respectar a lei e solicitou o restabelecemento da rede social no ámbito brasileiro, efectivo desde a pasada semana. Os exemplos de intervención de Musk sobre a opinión pública son innumerábeis, tanto que nas últimas horas a canle Palestina Hoy, coñecida por informar dos ataques que sofre Palestina por parte de Israel, denunciou estar "censurada" por X despois de decatarse de que moitos usuarios e usuarias tentaran seguir a súa conta na rede social sen éxito. Todas estas prácticas, unidas á capacidade que Musk podería ter co emprego dos algoritmos para amplificar as contas con determinados contidos, fan temer as ferramentas das que podería gozar o empresario coa participación nun Goberno de Trump. Conflitos laborais Na súa intervención para anunciar a potencial participación de Musk no seu Executivo como secretario de redución de custos, Donald Trump salientou: "Elon quere ocupar ese posto e contamos con xente incríbel. Está a dirixir unha grande empresa", destacou o republicano, facendo fincapé en que "podería recortar gastos sen prexudicar ninguén". Tesla enfronta a folga máis duradeira en toda a historia sueca Porén, a forma de recortar gastos de Musk é moi criticada. Como director executivo de Tesla, a compañía multinacional de coches eléctricos, enfronta a folga máis longa da historia de Suecia, apoiada desde outras fábricas e sectores do resto de Escandinavia, e chega este mes de outubro a un ano de duración. Este movemento, impulsado por IFF Metall, o principal sindicato do metal, e apoiada por Unionen, o maior sindicato sueco, responde á negativa da empresa a acordar un convenio que regule aspectos fundamentais como os salarios, os horarios e os programas de compensación. Ademais, desde a pasada semana o conflito tomou unha nova dimensión coa entrada do sindicato Vision. A contestación laboral a Musk non deixa de medrar. IG Metall, o principal sindicato do metal en Alemaña, denunciou esta cuarta feira que Tesla utiliza na súa fábrica de Berlín "tácticas agresivas" contra o persoal sindicalizado, logo de ser despedido un dos seus representantes no comité de empresa. E existen máis exemplos das súa prácticas. En maio anunciou un investimento de 465 millóns de euros para espallar a rede de súper cargadores apenas unha semana despois de despedir os case 500 empregados e empregadas da división. E só dous meses despois sinalou que usará robots humanoides nas liñas de "baixa produción" das fábricas da compañía a partir de 2025. Un paso máis alá deu en México, pois en xullo apuntou que Tesla non investirá máis na súa proxectada fábrica até despois das eleccións estadounidenses, ante o risco de que unha vitoria de Trump —precisamente a Administración na que entraría— supoña a imposición de máis aranceis aos produtos mexicanos. Tamén controvertida foi unha das súas últimas decisións nos EUA, pois o pasado xullo anunciou que trasladará as oficinas centrais de dúas das súas empresas —a aeroespacial SpaceX e a rede social X— de California a Texas en protesta pola nova lei estatal de identidade de xénero. Unha nova carreira espacial e a loita polo dominio da intelixencia artificial Donald Tump, durante o seu anuncio sobre a participación de Elon Musk no seu potencial Executivo, afirmou tamén que quería iniciar unha nova carreira espacial, como xa acontecera durante a Guerra Fría, da man do dono de SpaceX. "Quero que [Musk] envíe o foguete a Marte", dixo. "Fíxome a promesa de chegar a Marte antes do final da miña Administración, o que será moito antes, con sorte, que a China ou Rusia", concluíu. Trump pretende competir contra Rusia e a China da man de SpaceX Mais as posíbeis implicacións dunha posición de tanto poder para Musk teñen moitas máis arestas, como é a loita polo dominio da intelixencia artificial e o emprego dos datos persoais nesta carreira. A Comisión de Protección de Datos de Irlanda iniciou este mes de agora un procedemento de denuncia ante o Tribunal de Xustiza da Unión Europea (TXUE) contra X por utilizar datos persoais de usuarios europeos sen o seu consentimento para adestrar o seu modelo de intelixencia artificial Grok. Dous días despois, X aceptou suspender este uso da información. Neste ámbito hai que ter en conta que Musk é cofundador de OpenAI, a principal ferramenta para o emprego da IA a nivel global. Tamén participou na fundación de Neuralink, especializada en desenvolver interfaces cerebro-computadora que se poden implantar e que busca integrar a IA coa Neuroloxía. As implicacións da influencia de Musk danse tamén a nivel ambiental, posto que defendeu o abastecemento de metais para baterías de vehículos eléctricos a través da minaría en ecosistemas de augas profundas, unha aposta que foi paralizada polo accionariado de Tesla.