O Goberno español admite que a Policía conta con autorización para a infiltración secreta en movementos sociais
O movemento veciñal e antifascista do País Valencià denunciou infiltracións da Policía española nas súas organizacións.
O Goberno de España admitiu que a Comisaría Xeral de Información da Policía española solicitou "autorización administrativa" para a infiltración declarada secreta dun axente, ao ser preguntado pola denuncia de que dita infiltración se levou a cabo durante dous anos no movemento veciñal e antifascista no País Valencià usando unha identidade falsa.
Así consta nunha resposta parlamentaria datada o 27 de marzo na que o Goberno lembra que este tipo de infiltracións lévanse a cabo ao amparo da regulación do "axente de intelixencia", segundo recolle o artigo 11 da Lei Orgánica 2/86 das Forzas e Corpos de Seguridade.
"Desde a Comisaría Xeral de Información solicitouse a autorización administrativa correspondente, estando todo iso recollido nun expediente que está declarado secreto", indicou o Executivo estatal, que se remite aos Acordos do Consello de Ministros do 28 de novembro de 1986 e, con data posterior, ao Acordo do Consello de Ministros do 16 de febreiro de 1996, polo que se clasifican determinados asuntos e materias conforme a Lei de Segredos Oficiais.
A resposta garda relación coas explicacións que ofreceu no Congreso e no Senado o ministro do Interior, Fernando Grande-Marlaska, e que o senador de Compromís Carles Mulet cualificou de "impresentábel e intolerábel". Por iso é polo que rexistrou unha pregunta por escrito para obter máis información sobre a infiltración en movementos sociais do País Valencià e outros anteriores en Catalunya.
"Infórmase de que as Forzas e Corpos de Seguridade do Estado actúan en todo momento desde o estrito cumprimento da lei, coa máxima profesionalidade e con plena suxeición aos valores constitucionais, como é propio dun Estado de Dereito", subliña o Executivo español.
Neste sentido, lembra que as funcións das Forzas e Corpos de Seguridade están recollidas na Constitución e o seu labor é, "en todo momento", o de garantir a seguridade coa finalidade de facer efectivo o pleno exercicio dos “dereitos fundamentais e as liberdades públicas dos cidadáns e das cidadás”.
Axentes “encubertos”
Tendo en conta isto, advirte que os axentes sinalados por Compromís e os partidos independentistas cataláns non levan a cabo unha "actividade de axente encuberto", o que queda regulado polo artigo 282 bis da Lei de Axuizamento Criminal, senón de "axente de intelixencia", ao amparo das funcións encomendadas á Policía española pola regulación vixente, en concreto o artigo 11 da Lei Orgánica 2/86.
"Por tanto, a actividade de obtención de información dos axentes de intelixencia sinalados non se realiza sobre ideoloxías, nin movementos sociais, senón que se trata dunha actividade de intelixencia para a captación de información de interese para a orde e a seguridade pública", conclúe o Goberno.
Compromís e outros partidos cataláns preguntaron en reiteradas ocasións a Grande-Marlaska pola infiltración de policías, a última vez polo axente que usaría unha identidade falsa da Universidade de Valencia para introducirse durante dous anos no movemento veciñal e antifascista.
Previamente denunciáronse outras infiltracións, como a do axente da Policía española denunciado por cinco activistas en Barcelona que din ser vítimas de delitos de abuso sexual, revelación de segredos ou tortura ao ter "relaciones sexo-afectivas" con este policía no seu obxectivo de obter información.