A Fronte Polisario achaca o "cambio radical" do Estado español cara o Sáhara á "chantaxe" de Marrocos

A Fronte Polisario achacou esta sexta feira o "cambio radical" da postura do Estado español cara ao Sáhara Occidental, incluído o seu apoio ao plan de autonomía exposto por Marrocos, á "chantaxe" e a "manipulación" por parte de Rabat, antes de lembrar que, 50 anos despois da firma do Acordo Tripartito de Madrid, o país europeo segue sendo a potencia administradora do territorio.

O representante do Polisario no Estado español, Abdulah Arabi, indicou durante a súa intervención nunha xornada realizada no Congreso para conmemorar o 50 aniversario da firma do acordo —asinado o 14 de novembro de 1975 polo Estado español, Marrocos e Mauritania— que as autoridades españolas cometeron "un abandono tanto do pobo saharauí como ao territorio do Sáhara Occidental, que formaba parte do Estado español até ese momento".

Así, sostivo que o Estado deixou entón "as portas abertas a unha ocupación militar ilegal desde o norte por Marrocos e desde o sur por Mauritania", deixando aos saharauís "con esta situación sobrevinda" cando "estaba a se preparar para unha descolonización dentro do marco que se coñecía ata ese momento a nivel dos continentes de África, América Latina e tamén Asia".

Arabi fixo fincapé en que os saharauís fan fronte desde entón a "un futuro escuro" ante a falta dun referendo sobre a súa autodeterminación, antes de destacar que "a mal chamada Marcha Verde", da que recentemente se cumpriron tamén 50 anos, foi "unha marcha negra'" para o pobo saharauí, posto que "supuxo o inicio de todo este longo e inhumano sufrimento" para eles.

Neste sentido, reiterou que a solución ao conflito pasa pola celebración dun referendo, en liña co Dereito Internacional, e subliñou que a resolución non deriva "do que tente dicir outra potencia, chámese a potencia ocupante ou calquera outra potencia", incluído o seu rexeitamento ao plan de autonomía presentado por Marrocos. "Hai algúns gobernos occidentais que se apresuraron a inclinarse cara a unha proposta presentada por Marrocos como a única solución e apresuráronse a apoiala", lamentou Arabi, quen apuntou que esta proposta "non existe como tal".

"Existen tres folios que se presentaron ao secretario xeral de Nacións Unidas, nin máis nin menos. Un goberno occidental que se pronuncia sobre unha proposta que non existe realmente non só está a faltar ao dereito internacional, senón tamén está a faltar á loita e á resistencia dun pobo que leva 50 anos sufrindo as consecuencias dunha ocupación e dunha mala descolonización", esgrimiu.

Arabi fixo fincapé en que, a pesar de todo, "o pobo saharauí nunca tentou analizar ou reflexionar sobre a súa situación desde o rancor ou desde a irresponsabilidade" e que "sempre se deu unha oportunidade aos diferentes gobernos que houbo neste país --en referencia ao Estado español-- para que rectificasen ese erro que levou ao pobo saharauí a sufrir esta situación durante medio século". "Lonxe de facelo, ningún deles optou por emendalo, simplemente tentaron condicionar as relacións que teñen con Marrocos a un posicionamento morno en canto á defensa do Dereito Internacional no que ao Sáhara Occidental se refire", insistiu, antes de agregar que o plan de autonomía de Rabat derivou "nun novo intento de tentar saltarse a legalidade internacional para impor ao pobo saharauí algo contrario ao dereito Internacional". Desta forma, apuntou que esta proposta non é a única existente e profundou en que a resolución aprobada polo Consello de Seguridade da ONU en apoio á mesma "está chea de contradicións". Ademais, lembrou que este organismo "é unha pata máis das Nacións Unidas xunto coa Asemblea Xeral" e que "unha semana antes desa resolución aprobouse outra na Cuarta Comisión que reclama a autodeterminación do pobo do Sáhara Occidental (...), pero parece que esa non interesa ou non vende".

Arabi insistiu ademais en que "unha proposta dunha parte imposta de maneira unilateral nunca pode ser unha opción para a autodeterminación dun pobo que ten a súa cuestión recollida na Cuarta Comisión encargada da descolonización" e reiterou que o Tribunal de Xustiza da Unión Europea (TJUE) fallou ademais o ano pasado contra os acordos entre a Unión Europea (UE) e Marrocos en materia de agricultura e pesca.