Finlandia entra hoxe na OTAN entre o temor da comunidade kurda no país

O secretario xeral da Organización do Tratado do Atlántico Norte (OTAN), Jens Stoltenberg, confirmou onte que “mañá [por hoxe] Finlandia será membro de pleno dereito e participará en todas as reunións, actividades e estruturas”, após ratificar a semana pasada os lexislativos de Hungría e Turquía -os únicos que restaban- a entrada do país nórdico. Co izado da bandeira finesa no cuartel xeral da OTAN en Bruxelas (Bélxica), Finlandia converterase no 31º membro da alianza militar liderada polos Estados Unidos. Stoltenberg destacou que Helsinki achega “forzas significativas e ben adestradas”. No que respecta a Suecia, cuxa adhesión bloquea Turquía, o secretario xeral reiterou que acabará ingresando no bloque militar, salientando as “preocupacións de seguridade lexítimas” de Ancara, que tamén adiaron a entrada de Helsinki. Asemade, incidiu en que a expansión da OTAN vai en contra dos intereses de Rusia, aludindo a intención rusa de frear a entrada de Ucraína na alianza militar como un dos motivos da invasión do país. Nese sentido, Finlandia será o 15º novo membro desde que Washington se comprometeu en 1990 con Moscova a que a alianza militar non avanzaría cara ao leste. A entrada do país nórdico tamén acaba con case oito décadas de neutralidade finesa, unha situación pactada coa Unión Soviética ao final da Segunda Guerra Mundial para estabilizar a rexión despois de que Helsinki apoiara a Alemaña dirixida por Adolf Hitler e o bloque fascista no conflito. Concesións O proceso conxunto de adhesión á OTAN de Finlandia e Suecia comezou pouco despois da invasión rusa de Ucraína, co apoio da maioría das formacións do país acompañado por un incremento do apoio popular, que se converteu en maioritario segundo as enquisas nesas datas. Tras as primeiras dúbidas por parte de Ancara (criticada polos dous países polas violacións aos dereitos humanos), un acordo entre Turquía, Finlandia e Suecia en 2022 estabeleceu un marco para que se completase a integración destes países no bloque militar, como a extradición “de maneira rápida e exhaustiva” a Turquía das persoas que o Goberno de Recep Tayyip Erdogan considera terroristas, principalmente activistas pola liberación do Kurdistán, amais de seguidores do clérigo Fethullah Gülen, que Erdogan acusa dunha tentativa de golpe de Estado en 2016. Nese sentido, ambos os países asinaron que endurecerían a súa lexislación antiterrorista, co Partido dos Traballadores do Kurdistán (PKK) no punto de mira, e acabarían coas restricións á venda de armas a Turquía, impostas pola invasión turca do norte de Siria. Ao tempo, no caso finés a prensa turca apuntou que terían que entregar 12 persoas consideradas terroristas, o que aumentou as preocupacións no ámbito dos dereitos humanos. Para o PKK, o acordo implica que a OTAN deu a Turquía “luz verde para o xenocidio contra os kurdos”. En todo caso, a entrada de Helsinki na OTAN “é unha fonte de perigo para moitos kurdos que viven aquí”, fixo fincapé Gashaw Bibani, representante kurda da Alianza de Esquerda finesa na cidade de Vantaa, que denunciou as mudanzas legais en Suecia e Finlandia para axeitarse ás exixencias turcas, así como a confusión que padece a comunidade sobre a situación real na que fica despois de hoxe. Malia as “concesións” que tivo que asumir Helsinki, recoñeceu a deputada do conservador Partido de Coalición Nacional Saara-Sofia Siren, “unha gran maioría dos parlamentarios” está de acordo, non así a poboación, que rexeita estas concesións, recolle o Helsingin Sanoma. Aínda que non hai confirmación oficial das condicións cumpridas por Finlandia e Suecia con Turquía para poder acceder á OTAN, tanto a alianza militar como os dous países reiteraron que puxeron en práctica as exixencias de Erdogan. Aínda así, nin Turquía nin Hungría aprobaron aínda o ingreso de Suecia. De feito, até os terremotos de febreiro, Ancara sostiña que as adhesións de Finlandia e Suecia terían que ser estudadas polo novo lexislativo emanado dos comicios do 14 de maio, algo que mudou após as presións da OTAN con posterioridade aos sismos. O viceministro de Asuntos Exteriores de Rusia, Alexander Grushko, indicou despois de facerse pública a nova que “reforzaremos o noso potencial militar na dirección oeste e noroeste, e no caso de que as forzas e recursos doutros membros da OTAN se despreguen en Finlandia tomaremos medidas adicionais”, pois os 1.340 km de fronteira fino-rusa duplican as fronteiras até o de agora entre Moscova e a OTAN. O pasado ano, Sergei Shoigu, ministro de Defensa ruso, xa anunciara a creación de doce bases militares na rexión militar oriental, na contorna da fronteira finesa. Aliás, a finais de marzo Rusia e Belarús acordaron despregar armas nucleares tácticas no oeste deste último país. O seu presidente, Alexander Lukashenko, atribuía o pacto aos “compromisos incumpridos” dos países occidentais, que o levaron a tomar a decisión para resgardar a súa seguridade nacional. Pola súa parte, en Europa os Estados Unidos teñen despregadas armas nucleares en Países Baixos, Bélxica, Alemaña, Italia e Turquía. Conservadores e extrema dereita gañan as eleccións Os medios fineses descartan que a primeira ministra Sanna Marin poida continuar no cargo despois dos comicios do domingo, nos que a súa formación, o Partido Socialdemócrata, ficou en terceira posición, e apuntan que podería obter un posto de ministra dependendo das negociacións para conformar unha coalición de Goberno. Arredor desa cuestión, o máis probábel é que o líder do Partido de Coalición Nacional, Antti Petteri Orpo, sexa o novo primeiro ministro, tras converterse en primeira forza con 20,8% dos sufraxios, apenas 0,7% por diante da extrema dereita do Partido de Finlandia. Pola súa parte, Marin acadou 19.9%, que malia supor unha pequena suba con respecto aos anteriores comicios non puido compensar a caída de formacións coas que compartía Goberno como o Partido do Centro. Atentado en San Petersburgo No que atinxe á guerra en Ucraína, o Comité Nacional Antiterrorista ruso asegurou onte que o atentado de San Petersburgo o domingo no que faleceu o xornalista Vladlen Tatarski foi organizado polos servizos secretos ucraínos coa participación de seguidores do opositor ruso Alexei Navalny. Amais, trasladou a detención dunha muller como principal sospeitosa.