O presidente de Cuba, Miguel Díaz-Canel, destacou nesta terza feira os avances do medicamento HeberFeron no tratamento do cancro de pel e a posibilidade de ser unha "alternativa terapéutica" para outros tumores. Segundo apuntou en Twitter o fármaco que desenvolve o Centro de Enxeñaría Xenética e Biotecnoloxía (CIGB), "pódese converter noutra alternativa terapéutica para enfermidades como tumores cerebrais e carcinomas renais".
Díaz-Canel compartiu na rede social un artigo publicado no sitio oficial Cubadebate onde o científico encargado do proxecto afirma que o medicamento está en proceso de ensaios clínicos nestas doenzas.
La Ciencia cubana sigue dando buenas noticias: El HeberFERON, fármaco del @CIGBCuba para el tratamiento del cáncer de piel, pudiera convertirse en otra alternativa terapéutica para enfermedades como tumores cerebrales y carcinomas renales. #CubaVive 🇨🇺https://t.co/bSExZJpF0m
— Miguel Díaz-Canel Bermúdez (@DiazCanelB) February 22, 2022
"É posíbel que entre este ano e que o próximo obteña o rexistro sanitario en Cuba para esas indicacións", sinalou o doutor Iraldo Bello do CIGB. Engadiu, segundo a publicación, que investigan tamén o uso do medicamento en pacientes con cancro avanzado de mama e cabeza e pescozo porque hai persoas que non responden ás terapias actuais.
Bloqueo e medicamentos
O país conta cunha recoñecida industria biotecnolóxica, malia que o bloqueo estabelecido á illa está a pór en dificultades a sanidade no país, con escaseza de medicamentos en hospitais e farmacias. Dos 619 medicamentos que clasifica como básicos, 359 son producidos por BioCubaFarma, a empresa biotecnolóxica da que fai parte o CIGB.
O Goberno culpa da situación ao bloqueo financeiro e comercial de Estados Unidos que encarece a adquisición de fármacos, tecnoloxías, materias primas ou equipos, obstaculiza as transaccións con terceiros países e dificulta o acceso ao financiamento externo para investigación e desenvolvemento, entre outros prexuízos.