Os EUA investigan a filtración de arquivos secretos que demostra a espionaxe a países aliados

O Pentágono, a sede do Departamento de Defensa dos Estados Unidos, está a revisar os seus protocolos para compartir información confidencial ao tempo que efectúa unha avaliación de danos arredor da filtración nas últimas semanas de aproximadamente 50 documentos etiquetados como “secreto” e “alto secreto”, informou a segunda feira Reuters, que revelan amais da situación dos Exércitos ucraíno e ruso a espionaxe de Washington a aliados como Ucraína, Israel e Corea do Sur. Poucas horas antes, o Departamento de Xustiza anunciara unha investigación criminal sobre a filtración, após comprometerse o país “cos seus aliados e socios” a mantelos informados, sinalou Sabrina Singh, subsecretaria de prensa do Pentágono. Malia que nun primeiro momento as autoridades estadounidenses deixaron entrever que Rusia estaba detrás da obtención e difusión dos documentos datados desde mediados de febreiro a comezos de marzo para xerar desinformación, unha posición defendida por Kíiv, medios estadounidenses apuntan agora a unha filtración no seo da Administración, á vez que “funcionarios recoñeceron que os documentos semellan ser informes operativos e de Intelixencia lexítimos compilados polo Estado Maior Conxunto do Pentágono”, aseverou The New York Times, matizando que un dos documentos foi compartido tras unha modificación do orixinal. O medio incide en que a “filtración xa complicou as relacións cos países aliados”, e citando un alto funcionario de Intelixencia dun país occidental sostivo que “a publicación do material foi dolorosa”, polo que “suxeriu que podería frear os intercambios de Intelixencia” ao pór en cuestión a capacidade estadounidense de resgardar a súa información chave e a espionaxe de Washington aos seus aliados. En todo caso, todo indica que “é a filtración pública máis grave de información clasificada en anos”, defendeu en medios locais un funcionario que non quixo ser identificado. Guerra en Ucraína A filtración confirma que os Estados Unidos ofrece a Ucraína información en tempo real para deseñar as súas accións militares, e sinala que a situación das tropas de Kíiv é desesperada, advertindo que ao ritmo de uso das súas defensas aéreas ficaría sen munición o 2 de maio. Aliás, admite que a fronte de guerra do Donbás “se dirixe cara a un punto morto” ao longo deste ano, minimizando as posibilidades de que Ucraína recupere o terreo controlado polos soldados rusos a pesar da agardada contraofensiva de Kíiv, mentres que outros arquivos debullan as debilidades militares ucraínas e a preparación dos integrantes do seu Exército. Pola súa parte, a espionaxe ao presidente ucraíno Volodimir Zelenski descubriu que propuxo en febreiro atacar “os lugares de despregadura rusos na rexión de Rostov”, o que explicaría as reticencias estadounidenses á hora de brindar armas de alto alcance a Kíiv, detallando que os ataques ao interior do territorio ruso serían unha oportunidade para a China de “presentar a Organización do Tratado do Atlántico Norte (OTAN) como o agresor, e pode que aumentar a súa axuda a Rusia se considera que os ataques foron significativos”. Aínda que o asesor principal de Zelenski, Mykhailo Podolyak, insiste en que os documentos non son auténticos e “non teñen que ver cos plans reais de Ucraína”, CNN destaca que fontes achegadas á Presidencia ucraína recoñeceron que tiveron que alterar plans militares pola filtración. En paralelo, a asistencia militar ofrecida por Washington a Kíiv tamén destapa o alto nivel de coñecemento estadounidense das decisións dos servizos de seguridade rusos, que permitiu a Ucraína contrarrestar a planificación rusa para atacar os tanques entregados pola OTAN ou coñecer as listaxes e datas dos ataques a obxectivos militares de Moscova. Funcionarios estadounidenses alertaron que ao facerse pública a penetración da súa Intelixencia no Exército ruso o país eslavo podería interferir nas tarefas de espionaxe, afectando o devir do conflito. Ao respecto das baixas no conflito, os documentos amosan a diverxencia entre os datos divulgados e a información coa que contan os servizos de Intelixencia estadounidenses. A filtración estima que até 43.000 soldados rusos faleceron no conflito até o de agora, unha cifra similar á que a OTAN divulgou hai máis de seis meses, mentres que 17.500 militares ucraínos terían morto, a pesar de que funcionarios estadounidenses ratificaron a Politico o deceso de cando menos 100.000 soldados de Kíiv. Os documentos filtrados da espionaxe de Washington aos seus aliados, amais de Ucraína, trasladan que o Mossad, a principal axencia de Intelixencia israelí, alentou as protestas das últimas semanas contra a reforma xudicial impulsada polo Goberno de Benjamin Netanyahu, no que están integradas forzas de extrema dereita e ultra ortodoxas, que busca que a Xustiza fique sometida ao lexislativo, “incluíndo varios chamamentos explícitos á acción”, indica o texto, que foi rexeitado por Tel Aviv, que cualificou o documento de “mentireiro e sen fundamento algún”. A filtración tamén subliña que para que Israel acabe por aceptar o envío de armamento propio ao Exército ucraíno é precisa “unha maior presión dos Estados Unidos ou unha degradación da percepción” das relacións con Rusia. Tamén foi espiado Corea do Sur, pormenorizando as discusións entre altos funcionarios tras as presións de Washington para que enviase armas a Ucraína, a pesar de que está prohibido no país remitir armamento a países en conflito. Nese sentido, na xuntanza advertiuse da posibilidade de que o país americano ou os seus socios reexportasen a Ucraína as armas e municións vendidas polos surcoreanos a eses Estados. Peskov critica que "se culpe a Rusia de todo" “Non podo facer ningún comentario ao respecto. Vostede e eu sabemos que existe unha tendencia a culpar sempre de todo a Rusia, é, en xeral, unha enfermidade”, recalcou onte o voceiro do Kremlin, Dmitri Peskov, ao ser preguntado pola filtración, incidindo en que a espionaxe estadounidense a varios xefes de Estado europeos xa “provocou varias situacións escandalosas”. Nunha comparecencia anterior, Peskov asegurou que a filtración corrobora a “participación directa ou indirecta” dos Estados Unidos e a OTAN na guerra que está a decorrer en Ucraína.