Os Estados Unidos usan a IA contra migrantes e activistas pro palestinos

As persoas migrantes e as activistas a favor de Palestina están a ser o obxectivo das ferramentas de vixilancia que usan intelixencia artificial (IA) implementadas polas autoridades estadounidenses, corroborou a quinta feira un informe de Amnistía Internacional, baseado en documentación pública. Estas ferramentas –Babel X, de Babel Street, e ImmigrationOS, de Palantir– permiten vixiar, monitorear e avaliar de maneira “masiva e constante” as persoas, “acotío co propósito de apuntar contra quen non son cidadáns estadounidenses”, salienta a ONG, que fai énfase en que o Executivo de Donald Trump as utiliza para “rastrexar migrantes, refuxiados e solicitantes de asilo” no medio da "represión ilegal" contra eles, que teñen un alto risco de ser vítimas da iniciativa gobernamental 'Capturar e Revogar'. O plan, que levou á revogación de máis de 300 visados nas primeiras semanas, busca acabar cos permisos de persoas –especialmente estudantes internacionais– ás que descubra publicacións que interprete como apoio ou afinidade a grupos que Washington defina como terroristas, como é o caso de Hamás, a forza de Goberno da Faixa de Gaza, e combina “a vixilancia de redes sociais, o seguimento do estado dos visados e avaliacións automatizadas de ameazas de persoas estranxeiras con visados”, empregando ao tempo datos públicos, privados e mesmo gobernamentais. Isto permite a Washington identificalas e seguir o seu “comportamento e movementos con maior rapidez e a grande escala”, resolve Amnistía, que incidiu en que “as tecnoloxías probabilísticas que se usan para extraer inferencias sobre as intencións das persoas teñen amplas marxes de erro, e, a miúdo, poden ser discriminatorias e nesgadas, o que podería levar a presentar falsamente contido pro Palestina como antisemita”. Esta operación, “dunha escala e alcance sen precedentes”, desatou “un patrón de detencións ilegais e deportacións masivas, creando un clima de medo”, pormenoriza Erika Guevara-Rosas, directora de Investigación, Incidencia, Políticas e Campañas. Se a nivel interno, na persecución de Trump contra as persoas migrantes, ás que insiste en vincular coa delincuencia, se suceden as redadas masivas e as expulsións sen o debido proceso, nese momento entran en xogo os acordos, formais ou non, para deportalas a terceiros países cos que non teñen ningunha relación. Dos 58 territorios aos que como pouco o Departamento de Estados demandou ao seu persoal diplomático que se achegase neste sentido, 11 como mínimo terían aceptado. O caso máis coñecido é o do Salvador, onde enviou máis de 200 migrantes venezolanos sen ningunha garantía legal, mentres que Panamá recibiu 300 persoas de África ou o centro de Asia. 200 expulsadas recibiu Costa Rica, de lugares como a China, a India, o Nepal e o Iemen. Tamén Guatemala e Honduras aceptaron, o primeiro só no caso de que sexan cidadáns centroamericanos e o segundo só con persoas de países nos que o castelán sexa a lingua maioritaria. Á vez, México sinalou que acolle estas persoas por “razóns humanitarias”. Xa en Europa, fíxoo a autoproclamada República de Kosovo, e en África, Ruanda, Sudán do Sur e Esuatini recibiron persoas de Vietnam, Xamaica, Laos, Cuba ou Myanmar. A esta listaxe sumouse a quinta feira Uganda, confirmaron as autoridades locais. Os Estados Unidos expulsarán migrantes sen condena e por meras acusacións de roubo ou violencia O certo é que nos seis primeiros meses da volta de Trump á Casa Branca o país perdeu 1,4 millóns de persoas migrantes, na primeira caída deste grupo de poboación desde a década de 1960, constatou o Pew Research Center. Das migrantes a toda a cidadanía O enfoque de Trump no tocante á migración, chegando a ignorar sentenzas xudiciais na súa contra, é un dos elementos en base aos que “o país semella encamiñarse cara a unha transformación que, segundo expertos e organismos internacionais, erosiona as bases do Estado de dereito e constituiría un xiro autoritario”, proclama a canle CNN. Un deles, Juan Pappier, de Human Rights Watch, destaca que “a destrución das garantías fronte aos migrantes logo pode utilizarse para destruír as garantías de toda a cidadanía”. Washington está a “escorregar en dirección a un réxime híbrido que caracterizaría como autoritario competitivo”, mais “estaba moi claro que os estadounidense elixían unha figura abertamente autoritaria en 2024”, sentencia Steven Levitsky, profesor de Goberno da Universidade de Harvard. De feito, Trump azuou, como pouco, a tentativa de golpe de Estado en 2021 no Capitolio. Nesa liña, na madrugada da quinta feira o Partido Republicano en Texas logrou aprobar un novo mapa de distritos electorais que lles permitirá gañar un maior número de asentos nas seguintes eleccións á Cámara Baixa, minimizando o peso electoral de poboacións cun alto índice de voto ao Partido Demócrata ou con representantes afroamericanos. Isto foi celebrado por Trump, que aseverou que hai plans similares en Florida e Indiana. Aínda que esta práctica non é nova, apunta a ser determinante nos comicios para consolidar a maioría republicana, malia que California, controlada polos demócratas, puxo en marcha unha medida similar co fin de compensar o feito en Texas. Sexa como for, unha enquisa de Reuters/Ipsos revelou que 55% cre que o redeseño de distritos electorais é malo para o sistema democrático, e 57% considera que “a democracia estadounidense está en perigo de fracasar”. Por se acaso, Trump ratificou que prohibirá por decreto o voto por correo, no que polo xeral se impón o Partido Demócrata, antes dos comicios lexislativos parciais de 2026. A cuestión é que non ten esa autoridade, que vai desde o Congreso federal até os estados, moitos dos que non gobernan os republicanos. Non obstante, tampouco ten autoridade para impor uns aranceis que en todo caso seguen vixentes. En paralelo, Trump enviou militares a dúas cidades demócratas, Os Ánxeles e Washington D.C., e as alcaldías de varias urbes gobernadas pola formación están a prepararse para esa posibilidade co fin de tratar de frear unha potencial intervención. En última instancia, e ante a inacción dos supostos contrapesos institucionais cos que conta o Estado, o control conservador do Tribunal Supremo permite a Trump estar seguro de que alí atopará a lexitimidade formal que requira para unha viraxe autoritaria cada vez máis ampla.