Os Estados Unidos e Rusia avanzan nas conversas e tratan unha tregua limitada no mar Negro

Logo de acordar a pasada semana os presidentes dos Estados Unidos, Donald Trump, e Rusia, Vladimir Putin, unha folla de ruta para pór fin á guerra en Ucraína, a segunda feira decorreu en Riad (Arabia Saudita) a primeira xornada das negociacións bilaterais, pactadas nesa mesma chamada telefónica. Andrew Peek, alto cargo do Consello de Seguridade Nacional da Casa Branca, e Michael Anton, funcionario do Departamento de Estado, trataron con Sergei Beseda, asesor da Xefatura do Servizo Federal de Seguridade ruso, e Grigory Karasin, presidente do Comité de Asuntos Exteriores da Cámara Alta, entre outros, a “seguridade da navegación” no mar Negro, indicou Dmitri Peskov, voceiro do Kremlin. Ademais, medios internacionais apuntaban a posibilidade de que se discutisen os detalles da tregua limitada no sector enerxético acordada entre Trump e Putin primeiro e entre Trump e o presidente ucraíno, Volodimir Zelenski, despois. O seguinte paso fixado no plan sería un cesamento do fogo no mar Negro, antes dunha tregua total e a paz permanente. Peskov tamén detallou que, na “forma anterior” da iniciativa de exportación de gran polo mar Negro, “gran parte das obrigas co noso país non se cumpriron”. Aquel pacto, que se prolongou desde xullo de 2022 até o mesmo mes de 2023, fora asinado por Rusia, Ucraína, Turquía e a Organización das Nacións Unidas (ONU), e, amais da exportación de cereais ucraínos, incluía facilitar a exportación de cereais e fertilizantes rusos, afectados polas sancións coercitivas impulsadas polo predecesor de Trump, Joe Biden, e replicadas polos membros da Organización do Tratado do Atlántico Norte (OTAN), a maioría tamén membros da Unión Europea (UE). Moscova suspende os acordos do Mar Negro até que se cumpra "a parte referente a Rusia" Após a fin da xuntanza prevíase unha nova reunión entre funcionarios estadounidenses e ucraínos, avanzou un alto cargo de Kíiv á axencia Reuters, confirmando a intención de Washington de efectuar negociacións indirectas con Rusia e Ucraína para avanzar o antes posíbel. As conversas foran inauguradas un día antes, cando a delegación estadounidense se reuniu cun equipo de negociación ucraíno no mesmo escenario, no que, segundo o titular de Defensa ucraíno, Rustem Umerov, se abordou sobre todo o tocante á enerxía nunha cita “produtiva”. Malia o acordo entre Trump, Putin e Zelenski, Kíiv incidiu en que até ser asinado un documento ao respecto non suspenderá os ataques, algo que si fixo Moscova de forma inmediata após alcanzarse o entendemento, fixando unha duración de 30 días. Peskov defendeu que para Moscova o pacto segue en vigor, posto que “non houbo outras ordes do presidente”, malia que Kíiv continúa con estes ataques, pormenorizando que están a verificar a situación e que os Estados Unidos poderían facer o mesmo e acadar as súas propias conclusións. O Ministerio de Defensa ruso denunciou a segunda feira que os militares ucraínos intentaron atacar con drones unha estación de bombeo integrada nun oleoduto en Krasnodar, no suroeste ruso, un día antes o ataque foi a unha instalación de gas en Crimea –que Ucraína considera territorio seu– e na véspera danaron equipos nunha estación de distribución de gas en Belgorod, nos lindes con Kíiv, que acusou Rusia nas primeiras horas logo do acordo entre Trump e Putin de danar o sistema eléctrico dos ferrocarrís en Dnipropetrovsk, no leste do país, o que Moscova negou. Trump confía nunha "tregua total" A pesar da distancia pública entre Moscova e Kíiv, Trump insistiu en que a curto prazo haberá “un cesamento do fogo total”, e a axencia Bloomberg, citando fontes estadounidenses achegadas ás negociacións, reportou que o mandatario aspira a que sexa antes do 20 de abril. Unha vez que Washington ratificou que Kíiv non entrará na OTAN, e despois de que a invasión rusa se producira principalmente pola tentativa do país americano de proceder á súa incorporación, o elemento clave da negociación será o referente aos territorios conquistados por Rusia, admitiu o enviado especial de Trump, Steve Witkoff. Putin insistiu en que a fin do conflito pasa polo recoñecemento da incorporación a Rusia dos catro territorios que controla parcialmente (Luhansk, Donetsk, Khersón e Zaporijia), así como das áreas deles que están en mans ucraínas, e de Crimea, algo que o Goberno de Zelenski xa rexeitou. Witkoff apuntou que hai evidencias de que eses territorios non queren formar parte de Ucraína, afirmando que son “rusófonos”, como revelaron os referendos de adhesión a Rusia de setembro de 2022, non recoñecidos pola ONU. Nese sentido, Anitta Hipper, voceira de Exteriores da Comisión Europea, reiterou que as votacións foron unha “farsa” e que Ucraína debe decidir as “condicións” de paz, e indicou que o bloque comunitario apoia a integridade territorial de Ucraína. A pasada semana, no Consello Europeo, as e os líderes dos membros da UE cuestionaron as conversas impulsadas por Trump, rexeitando categorizalas como “negociacións reais” despois da súa exclusión do proceso. Sobre o plan liderado por Francia e o Reino Unido para despregar tropas en Ucraína e garantir un hipotético acordo de paz, Witkoff definiuno como unha "combinación dunha postura e dunha pose". Groenlandia critica a "inxerencia estranxeira" dos Estados Unidos “Hai que subliñar que a nosa integridade e a nosa democracia deben ser respectadas sen ningunha inxerencia estranxeira”, remarcou a segunda feira Múte Egede, primeiro ministro en funcións de Groenlandia, que fixo énfase en que non haberá “ningunha reunión” coa delegación estadounidense, cuxa visita cualificou como unha “provocación”. O progresista e nacionalista referíase a unha visita privada desde a quinta feira ao sábado que incluirá o asesor de seguridade dos Estados Unidos, Mike Waltz, e á parella do vicepresidente James David Vance, Usha Vance, que contemplarán unha carreira de zorras e estarán na base militar estadounidense no territorio. Após volver Donald Trump á Casa Branca, Washington insiste na súa intención de ocupar e anexionar a illa. Trump ameaza Groenlandia e non descarta unha intervención militar para facerse con ela Egede, que perdeu os comicios deste mes, afirmou que advertiu os Estados Unidos que “non habería conversas” até a toma de posesión do novo Executivo, e o liberal conservador e soberanista Jens-Frederik Nielsen, gañador das eleccións e probábel novo líder groenlandés, reclamou non “ser forzados a entrar nun xogo de poder do que nós propios non eliximos ser parte”. Tamén apuntou que a visita, que se produce cando se está a negociar unha coalición para integrar o novo Gabinete, constitúe “unha vez máis unha falta de respecto cara á poboación groenlandesa”. Mette Frederiksen, primeira ministra de Dinamarca (membro da OTAN xunta Washington), que ostenta de jure a soberanía de Groenlandia, sinalou en alusión á visita que “é algo que tomamos moi en serio”.