ERC ve difícil un acordo en 2019
Após Pedro Sánchez amosarse optimista coa posibilidade de ser investido presidente no que queda de 2019, desde Esquerra Republicana de Catalunya avisan da dificultade de chegar a un acordo antes de rematar o ano e, de este se producir , consideran que é máis factíbel que se dea en xaneiro. Na terza feira, 10 de decembro, terá lugar a terceira reunión oficial entre o PSOE e ERC para negociar a investidura. Trátase da primeira xuntanza que se realizará en Catalunya.
En Esquerra “non teñen présa” para posibilitar a investidura de Pedro Sánchez como presidente do Goberno central e “ven difícil” poder chegar a un acordo co PSOE antes de rematar o ano. Así o anunciou a portavoz republicana Marta Vilalta esta segunda feira, 9 de decembro.
“Hai cuestións que teñen que pasar e que inflúen", afirmou a voceira de ERC en referencia á resolución do Tribunal de Xustiza da Unión Europea, que o vindeiro 19 de decembro ten previsto pronunciarse sobre a inmunidade de Oriol Junqueras, a posíbel inhabilitación de Quim Torra como president da Generalitat por non retirar “en tempo” lazos amarelos da sede do Govern ou a decisión sobre a euroorde que España cursou contra Carles Puigdemont e que tamén se resolverá previsibelmente en decembro. Para alén do máis, neste mes a formación republicana realizará o seu congreso nacional.
A semana pasada Pedro Sánchez amosábase confiado en poder acadar unha investidura antes de rematar o Nadal, unha reacción que non gostou nas filas republicanas. De facto, Marta Vilalta tamén puxo condicións para que se cumpran as expectativas de Sánchez, e deixou claro que “se o Partido Socialista ten moita présa, o que ten que facer son xestos de forma máis rápida. Será a maneira de acelerar as negociacións", aseverou.
“Se o Partido Socialista ten moita présa, o que ten que facer son xestos de forma máis rápida. Será a maneira de acelerar as negociacións", aseverou Vilalta.
Nese sentido, Vilalta afirmou que tanto o Partido Socialista como Unidas Podemos “teñen a oportunidade de facer o contrario que fixo o Partido Popular: que se abandone a vía xudicial e apostar polo diálogo e a negociación para resolver os conflitos de carácter político".
Esta terza feira realizarase a terceira reunión oficial entre as delegacións de ambas as dúas forzas políticas, e será a primeira que se desenvolva en Catalunya. ERC aproveitará para afondar na necesidade de formar unha mesa de diálogo onde estean representados os Executivos catalán e español, na que se poida falar de todo, incluído o dereito de autodeterminación e con garantías de materializarse por medio dun calendario.
Na mesma liña que Vilalta tamén se expresou esta segunda feira o conseller de Acción Exterior da Generalitat, Alfred Bosch (ERC), quen asegurou de forma tallante nunha emisora catalá que o seu partido “non ten a responsabilidade histórica de facer presidente Pedro Sánchez, mais si de rematar coa represión”. Baixo esas premisas, Bosch anunciou que Esquerra Republicana de Catalunya non renunciará a seguir demandando a posta en liberdade das presas e presos políticos".
Avogou así mesmo o conseller Alfred Bosch pola vía de avanzar no diálogo e que este se produza sen límites de liñas vermellas e que, por tanto, o dereito a decidir dos pobos sexa un tema sobre o que se poida falar. Tamén marcou a necesidade de dialogar sobre a realización dun referendo como solución ao conflito político.
Desde o PSC chaman a agardar até xaneiro pola formación republicana
“De non ser posíbel até xaneiro, será en xaneiro", así de contundente se expresou o secretario de organización do PSC e membro da comisión negociadora entre o Partido Socialista e Esquerra, Salvador Illa. A vontade da súa formación é, segundo Illa, lograr no menor tempo posíbel un Executivo “progresista e dialogante” no Estado español, e engadiu a ese respecto que o máis importante é a materialización do acordo de investidura. Illa respondeu desta maneira o anuncio de ERC de rebaixar as expectativas de conformación dun Goberno central, e aproveitou para rexeitar en rolda de prensa que se estivese a pór enriba da mesa negociadora a situación das presas e presos soberanistas.
Porén, dentro do Partido Socialista hai disparidade de opinións sobre a marcha das negociacións. Así, após o aviso de ERC, a ministra en funcións Nadia Calviño, anunciada xa como vindeira vicepresidenta económica, chamou á urxencia de formar Goberno e á dificultade de agardar a 2020 para facelo. Deste modo, Calviño rexeitou que a responsabilidade de dar un Executivo ao Estado sexa só do PSOE; en alusión ao resto de grupos políticos da Cámara Baixa para que favorezan a investidura de Pedro Sánchez.
Ao igual que en Esquerra, no PSC tamén teñen cita congresual en decembro. 1.069 delegadas e delegados acudirán esta fin de semana á cimeira. Farano sob o lema 'Somos xustiza social, feminismo e ecoloxía', co que queren vindicar unha “Catalunya unida na diversidade e ben gobernada, recoñecendo a pluralidade de sentimentos", en palabras de Illa.
O secretario de organización do PSC afirmou tamén que o novo congreso servirá para "posicionar" o seu partido de cara a unhas futuras eleccións catalás e defendeu que a forza liderada por Miquel Iceta ten a ambición de encabezar un Goberno progresista e de esquerdas en Catalunya.
Borràs advirte que a procura dun diálogo sen Junts non funcionará
Un acordo de investidura entre ERC e o PSOE “non incluirá unha solución efectiva para Catalunya” de non contar coas demandas de Junts, afirmou esta segunda feira a portavoz desta forza independentista no Congreso, Laura Borràs. A voceira avogou polo diálogo entre todas as partes implicadas e denunciou que se está deixando á marxe o seu partido.
A voceira quixo remarcar que desde a súa formación non piden “condicións” a Sánchez, senón que esixen "mínimos democráticos", á vez que remarcou que a súa forza "non vai dar os seus votos a cambio de nada".
Ás 10 horas da terza feira 10 de decembro reunirase en Waterloo a dirección da Crida Nacional per la República coa participación do ex president Carles Puigdemont. Esta forza, que pretende ampliar o espectro de Junts, analizará precisamente a situación política actual coas negociacións abertas entre ERC e o PSOE.