Un desprendemento nunha mina catalá deixa tres mortes

Ás 8.53 de onte, os equipos de emerxencia de Catalunya recibiron un aviso por un desprendemento nunha mina de potasa en Súria, 61 quilómetros ao noroeste de Barcelona. Ao chegar, constataron o falecemento de tres persoas atrapadas polo movemento de terra a 900 metros de profundidade.

As vítimas eran xeólogos que traballaban para ICL, a empresa propietaria da mina, e dous estudaban un mestrado na sede de Manresa da Universitat Politècnica de Catalunya. Un deles desenvolvíase como bolseiro na compañía, confirmou o reitor, Daniel Crespo, que trasladou que convocaron un minuto de silencio no centro.

Malia que ICL informou de que en principio só tres persoas traballaban no lugar do desprendemento, subliña que é preciso que os equipos de emerxencia alcancen a zona afectada para ratificalo.

Pola tarde, oito dotacións de bombeiros estudaban como avanzar con garantías de seguridade para o persoal que participa na operación.

En 2013, dous traballadores perderon a vida nun accidente nesta mesma mina por outro desprendemento. Amais, noutras minas da mesma empresa en Catalunya morreron dous operarios cunha semana de diferenza en 2020, e outro máis en 2015.

O conselleiro de Empresa e Traballo de Catalunya, Roger Torrent, comunicou que as instalacións de Súria foron inspeccionadas hai tres semanas, nun rexistro que non implicou a apertura de ningún expediente. En todo caso, anunciou que puxeron en marcha unha investigación para esclarecer o acontecido.

Pola súa parte, o presidente catalán, Pere Aragonès, ofreceu as súas condolencias ás persoas achegadas ás vítimas, mentres que o Concello de Súria decretou dous días de loito.

826 persoas morreron ao longo de 2022 en sinistros laborais no Estado español.