Defender a democracia como trincheira

Atopámonos nun momento de reacción por parte dos sectores máis conservadores. E a reacción, cando vén da man do conservadurismo xa non implica manter o statu quo unicamente, ten como obxectivo retroceder; porque, mesmo, o statu quo actual parécelles, aínda que poida resultar sorprendente, demasiado avanzado. A perda de privilexios dos pequenos grupos que historicamente estiveron na cúspide dos dereitos xera fortes tensións facendo máis necesaria aínda, se cabe, a organización colectiva e manter a fortaleza dos sectores que si cremos que é posíbel construír sociedades máis igualitarias e democráticas. Implica pór o corpo na trincheira para abrazar e defender os nosos principios, as nosas ideas e os nosos imaxinarios onde habitan sociedades que non deixan a ninguén atrás. Transformar As pretensións dalgúns sectores e partidos conservadores, xunto coa extrema dereita, están a buscar acabar con todas as garantías que nos ofrece a democracia. E xa non só buscan impoñer os seus marcos e practicar a súa oposición desde os lugares e espazos nos que os coloca a democracia, senón que o fan desde todos e cada un dos espazos que polo seu poder controlan. E non son poucos. Mentres se deixa de crer na política como ferramenta de cambio social, a democracia morre Cando nos pasamos de transformadoras ou somos, baixo o seu punto de vista, demasiado de esquerdas, ou aspiramos a políticas sociais máis valentes, poñen a funcionar a maquinaria. Cunha perfecta combinación de loiadas que acaban sendo denuncias falsas, coa complicidade dalgúns recunchos da xustiza e dun bo número de medios de comunicación, practican a súa guerra sucia xudicial para dicirnos que "calladitas y quietecitas" estamos máis guapas. É o caso da compañeira Mónica Oltra, que despois de anos xudicializada por denuncias falsas da extrema dereita volven reabrir o caso e, en palabras do xuíz, reábreno por "imperativo legal", obrigado pola Audiencia de València. Un auto en que se aprecia claramente a discrepancia entre o instrutor e a sección cuarta da Audiencia Provincial de València. Discrepancias totalmente lóxicas cando se pretende reabrir un caso en que non hai causa. E o transfondo, ademais de pretender manter baixo control a quen tenta construír sociedades dignas para todas, ten unha mensaxe moi preocupante para o conxunto da cidadanía: que desde a política é imposíbel transformar, facendo o apoliticismo, a cultura política do século XXI. Porque cando alguén tenta transformar é sometido a unha odisea persoal e xudicial. E, mentres se deixa de crer na política como ferramenta de cambio social, a democracia morre. Quen teñen poder sempre atoparán lugares desde onde tomar decisións. As decisións que lles benefician a eles, claro, e que deixan desprotexida a maioría. Unha maioría que ten como única ferramenta crer na política. E deixar de crer é o abismo, a nada. Rexeneración democrática Pero isto non se soluciona, como algúns pensan, escribindo cartas á cidadanía con palabras baleiras cando tocan aos teus e logo deixando todo como está. Isto soluciónase con medidas valentes para a rexeneración democrática. Porque mentres iso non pase, continuarán facendo oposición desde os tribunais, asolagándonos a denuncias falsas, facendo ruído até converter as loiadas en verdades absolutas. Chegamos tarde pero aínda non é demasiado tarde. Se os que escriben cartas á cidadanía deixasen de ser mornos, deixasen de calar e non actuar, deixasen de esconderse e de non defenderse da extrema dereita, e empezasen a tratar o asunto desde a valentía, é probábel que esteamos a tempo de transformar a realidade que nos tentan impoñer e de mandar unha mensaxe: a política si serve, a política é útil para a maioría, e defender as ferramentas que nos dá a democracia é de capital importancia para os que non temos máis recunchos de poder que o que nos outorgan as institucións democráticas. E entendendo iso, poderemos empezar a traballar en colectivo. Escribo desde o enfado, e non é para menos. Como dixo Mónica Oltra: "El que més sent d’açò, i el que voldria evitar, és que cap persona d'este país pense que no és possible fer polítiques d'esquerres, que no és possible plantar-li cara al poder, a la corrupció, a la oligarquia i als poderosos". A oligarquía e os poderosos xa escribiron, reescribiron e deseñaron a historia ao seu xeito. É o momento de non retroceder nin un milímetro.