Corenta entidades alertan da violación de dereitos en España

10 de decembro é o Día Internacional dos Dereitos Humanos e, coincidindo con esta data, diversas entidades do Estado denunciaron perante a ONU que en España se producen “violacións” estes dereitos.

Así, na sede de Nacións Unidas en Xenebra, diversas asociacións, entre as que se atopa a Fundación Galiza Sempre, vinculada ao BNG, apresentaron informes onde se recolle a vulneración de dereitos como o de manifestación, a liberdade de expresión ou a participación política. 

Para alén do máis, nos estudos expostos vértense críticas pola falla de reparación das vítimas do franquismo e alértase da vulneracións dos dereitos lingüísticos. Tamén se denuncia o incumprimento doutros dereitos como os dixitais e a libre navegación, coa aprobación do decreto ‘contra a república dixital catalá’ que aprobou o Goberno de Pedro Sánchez en funcións co apoio da dereita española e a abstención de Unidas Podemos. 

Algunhas das entidades tamén lamentan que non se aclaren responsabilidades pola actuación policial durante o referendo de 1 de outubro e critícase a rixidez da Constitución. 

No Estado español, segundo os informes, prodúcense violacións dos dereitos das persoas con diversidade funcional, vulnéranse os dereitos das mozas e mozos encausados en Altsasua e hai unha inxusta Lei de seguridade cidadá, sinalan as entidades. 

A información achegadas polas asociacións será tida en conta polo grupo de traballo do Exame Periódico Universal, que é o mecanismo do Consello de Dereitos Humanos que avalía a calidade destes dereitos nos diversos Estados. 

Na apresentación das conclusións das organización participou a representante do Bloque Nacionalista Galego no Parlamento europeo, Ana Miranda; xunto ao coordinador da Assemblea Nacional Catalana, Jaume Bardolet; a vicepresidenta da Plataforma per la Llengua, Mireia Plana; o investigador do Institut de Drets Humans de Catalunya, Karlos Castilla; e a activista de Òmnium Cultural Elena Jiménez, entre outras.