Unha comisión de investigación independente da ONU conclúe que Israel cometeu crimes contra a humanidade en Gaza

“Nunca víramos algo así, nesta medida”, recoñeceu a cuarta feira Navanethem Pillay, que lidera a Comisión Internacional Independente de Investigación sobre o Territorio Palestino Ocupado da Organización das Nacións Unidas (ONU), nunha xuntanza do Consello de Dereitos Humanos da ONU en Xenebra, Suíza, detallando que a súa investigación corrobora que Israel é responsábel de crimes de guerra e crimes contra a humanidade na súa agresión militar contra o territorio palestino de Gaza. Ademais, incidiu en que a magnitude das mortes de civís palestinas e palestinos equivale a un “exterminio”. Pillay, ex Alta Comisionada da ONU para os Dereitos Humanos, detallou que “descubrimos que o inmenso número de vítimas civís en Gaza e a destrución xeneralizada de bens e infraestruturas civís foron o resultado inevitábel dunha estratexia intencional para causar o máximo dano”. Na intervención fixo fincapé no “uso deliberado de armas pesadas con gran capacidade destrutiva en zonas densamente poboadas”, o que “constitúe un ataque intencional e directo contra a poboación civil”, explicando como o Estado sionista “transferiu pola forza case toda a poboación a un pequeno recinto que é inseguro e inhabitábel”. Ao tempo, a Comisión concluíu que a violencia sexual e machista forma parte dos procedementos operativos das forzas israelís, debullando que buscan “humillar e subordinar aínda máis a comunidade palestina”. Pillay cualificou de “tráxico” que Israel estea a impedir ás e aos membros da Comisión a entrada ao seu territorio e a Palestina para falar coas vítimas, incumprindo a orde neste sentido da Corte Internacional de Xustiza (CIX). A pesar do alto número de vítimas mortais en Gaza, máis de 37.000 desde outubro, subliña que Israel non foi quen de cumprir os seus obxectivos declarados, destruír Hamás e liberar as persoas israelís detidas na Faixa desde a operación da resistencia palestina do 7 dese mes, amais de lembrar a situación en Cisxordania, con máis de 500 mortes neste tempo a mans dos militares e colonos sionistas, unha cifra endexamais rexistrada nun período de tempo similar. Israel, disposto a estender durante anos a agresión militar contra Gaza A Comisión tamén probou que Israel xerou unha fame masiva e está detrás de tratos crueis e inhumanos perpetrados contra o pobo palestino. Violación reiterada das leis da guerra As declaracións de Pillay víronse reforzadas coa publicación horas antes dun informe da Oficina de Dereitos Humanos da ONU que analiza seis “incidentes emblemáticos” da agresión militar do réxime de apartheid israelí á Faixa de Gaza entre outubro e comezos de decembro de 2023, o ataque ao mercado e a áreas residenciais do campo de refuxiados de Jabalia, a edificios residenciais e unha escola na cidade de Gaza e ao campo de refuxiados de al Bureij, no que o obxectivo sionista foi tamén unha zona residencial. O responsábel da Oficina, Volker Türk, resaltou que “o requisito de seleccionar medios e métodos de guerra que eviten ou cando menos minimicen en toda medida os danos a civís semella ter sido violado sistematicamente na campaña de bombardeos de Israel”, acompañada dun intento de invasión. Estes ataques, que causaron unha destrución masiva nestas áreas ao usarse bombas pesadas, que poden levar ao colapso de estruturas de grande altura, deixaron como mínimo 218 decesos, porén, o documento sinala que teñen indicios de que a cifra real podería ser moito maior. Neste sentido, salienta que “os ataques ilícitos, cando se cometen como parte dun ataque xeneralizado ou sistemático contra unha poboación civil, tamén poden implicar a comisión de crimes de lesa humanidade”, remarcando que estes ataques suxiren que o Exército israelí tería violado “repetidamente principios fundamentais das leis de guerra”. O G7 rexeita condenar Israel e reafirma que continuará armando Ucraína, con calquera opción de paz en segundo plano Asemade, contradicindo a narrativa israelí avalada polos Estados Unidos e os seus aliados, que insiste en que o volume de mortes é produto de que Hamás usa infraestrutura civil para actividades militares, a investigación lembra que a presenza dun comandante ou de varios combatentes nunha área “non converte un barrio enteiro nun obxectivo militar”, pois isto viola o principio de proporcionalidade e a prohibición de ataques indiscriminados. Con todo, non hai indicios de que Washington ou Bruxelas estean dispostos a deixar de brindar cobertura diplomática e armas a Israel malia o que persoas expertas da ONU consideran un xenocidio e unha limpeza étnica, e as crecentes probas dos seus crimes, que levaron a CIX a ordenar a fin do ataque a Rafah, que Israel ignorou, e a Fiscalía da Corte Penal Internacional (CPI) a demandar ordes de arresto contra o primeiro ministro do Goberno de extrema dereita israelí, Benjamin Netanyahu, e o seu ministro de Defensa, Yoav Gallant, así como contra líderes de Hamás. Precisamente no tocante á resistencia palestina, a Oficina de Türk indica que o lanzamento indiscriminado de proxectís cara a Israel incumpre as súas obrigas en virtude do dereito internacional, e nas pescudas dirixidas por Pillay é acusada de crimes de guerra por violencia sexual, asasinato ou homicidio intencional, tomar reféns ou atacar civís, matizando que só o réxime de apartheid sionista é responsábel de crimes contra a humanidade. Aumenta a presión contra Washington e Bruxelas por manter o apoio a Israel O avogado especialista en dereito internacional humanitario Toby Cadman sostivo no marco da publicación dos informes que corroboran os crimes cometidos por Israel en Gaza que “será unha proba máis da intención e conduta das autoridades israelís”. Á vez, aseverou que “tería e debería facer que todas as capitais consideren até que punto se brinda apoio a Israel no conflito en curso”, e podería limitar a cobertura que lle ofrecen os seus aliados, logo de destacar que xa “víramos un cambio nas políticas” occidentais sobre o réxime de apartheid, mais sen abandonar o apoio fechado dos Estados Unidos e a Unión Europea (UE) ás accións de Israel. Aínda que sinalou como pouco probábel que Israel vaia modificar a súa conduta por estas publicacións, fixo énfase en que poden ser usadas como evidencias nos procesos legais contra os sionistas. Israel eleva as ameazas: "Por cada recoñecemento do Estado de Palestina, un novo asentamento en Cisxordania" Nesa liña, Sultan Barakat, docente de políticas públicas da Universidade Hamad Bin Khalifa de Qatar, lembrou que a Corte Internacional de Xustiza (CIX) solicitou a comisión de investigación independente da ONU que lle remitise as súas conclusións. Pola súa parte, o Consello de Relacións Estadounidenses-Islámicas reaccionou aos informes exixindo ao mandatario Joe Biden que tome “medidas concretas” para deter a agresión, reiterando que a “historia lembrará” a “complicidade do presidente Biden neste xenocidio”. Despois de emitirse estes informes o Exército israelí lanzou unha nova vaga de ataques aéreos indiscriminados contra a poboación civil da Faixa de Gaza.