Bloqueadas estradas ao longo de Paquistán en protesta pola fraude electoral

A Comisión Electoral de Paquistán comunicou hoxe que está a investigar unhas poucas irregularidades no reconto dos comicios lexislativos estatais e provinciais da pasada quinta feira, admitindo en paralelo a existencia de violacións á lexislación electoral e incidindo en que “se están a tomar decisións inmediatas sobre as denuncias presentadas”. A diferenza do organismo, milleiros de persoas por todo o territorio sosteñen que estas irregularidades foron masivas, o que amosaron con múltiples cortes de estradas chave para a rede viaria paquistaní no contexto dunha folga dun día protagonizada por persoas partidarias do ex primeiro ministro Imran Khan, do centrista Movemento pola Xustiza (PTI), e doutras formacións minoritarias, que denuncian unha presunta fraude electoral. As mobilizacións afectaron especialmente á oficina da Comisión Electoral en Karachi, a cidade máis poboada do país e capital da provincia de Sind, onde se presentaron “máis de 30 peticións ante o Tribunal Superior” provincial contra a manipulación dos resultados, explica o avogado Jibran Nasir, membro dun equipo legal que apoia as reclamacións de 17 persoas candidatas co aval do PTI. O letrado informou de que a corte brindou até mañá á Comisión Electoral federal para atopar unha “solución legal e razoábel”, facendo fincapé en que ou notifica o antes posíbel os resultados reais ou intervirá. Denuncias como esta multiplícanse ao longo e largo do territorio, namentres o PTI chegou a afirmar que obtiveron unha maioría de dous terzos a nivel estatal. A Asemblea Nacional paquistaní conta con 336 asentos, 266 elixidos de forma directa e 70 reservados para mulleres e minorías que se reparten proporcionalmente entre as formacións con representación. Sen saír de Karachi, o líder local do ultradereitista Congreso Islámico, Hafiz Naeemur Rehman, renunciou ao escano que a Comisión Electoral anunciou que gañara, explicando que o verdadeiro vencedor no reconto foi un candidato apoiado polo PTI. Antes do proceso electoral xa se desencadeara unha importante persecución contra Khan e o PTI, o primeiro preso e o segundo impedido de participar nas eleccións, polo que todas as súas candidaturas tiveron que se presentar como independentes, unha represión que comezou desde que Khan foi destituído polo Parlamento en 2022, do que acusou as Forzas Armadas, cun gran peso na política do país, e os Estados Unidos, que rexeitaban a neutralidade paquistaní na guerra de Ucraína e a intensificación dos vínculos bilaterais coa China e Rusia. Despois chegaron os arrestos masivos entre a súa militancia, xulgada polas protestas do pasado ano en tribunais militares, e na súa dirección, o corte de telefonía móbil e internet durante as votacións ou un atraso de entre sete e oito horas no comezo da difusión do escrutinio en relación aos tempos usuais en anteriores comicios. O certo, segundo asegura o xornal Dawn, e que “houbo importantes irregularidades”, a máis urxente de aclarar “o que semella ser o roubo descarado do mandato público nalgunhas partes do país, como demostran as grandes discrepancias entre os diversos resultados informados”. Neste marco, “iniciáronse negociacións frenéticas a porta fechada sobre as posíbeis configuracións do poder”, con certos sectores “ansiosos” por rematar co debate e que os resultados fiquen “aceptados como feitos consumados”, prevendo unha forte reacción cidadá en contra. Resultados oficiais Os datos difundidos pola Comisión Electoral sinalan que os escanos logrados por candidaturas independentes apoiadas polo PTI ascenden a 97, coa conservadora Liga Musulmá (PML) do ex primeiro ministro Nawaz Sharif -o designado polos militares para liderar o Goberno após as eleccións, e que se prevía fora o vencedor- en segunda posición con 75 e os progresistas Partido Popular (PPP) e Movemento Muttahida Qaumi (MQM) en terceira e cuarta con 54 e 17 respectivamente. O resto divídese entre unha decena de pequenas formacións e independentes, co resultado en revisión nunha circunscrición e as eleccións pospostas noutra. No que atinxe ás votacións para os lexislativos provinciais, no Punjab a PML ficou en cabeza, seguido de independentes co apoio do PTI, en Sind arrasou o PPP, o mesmo que fixo o PTI en Khyber Pakhtunkhwa, e en Baluchistán o primeiro posto rexistrou un empate entre o PPP e a extrema dereita da Asemblea do Clero Islámico, requiríndose negociacións a varias bandas para alcanzar a maioría absoluta. O primeiro ministro provisorio, Anwaarul Haq Kakar, defendeu que as eleccións decorreron dunha maneira “libre e xusta”, descartando que se aplicara “ningún mecanismo institucional nin por medo nin a favor dunha entidade, grupo político ou individuo”. Á vez, aseverou que a vitoria electoral das candidaturas do PTI descualifican a posibilidade de que se levara a cabo unha fraude. Os EUA e a UE solicitan investigar as irregularidades A Unión Europea (UE) e os Estados Unidos (EUA) recalcaron que traballarán co vindeiro Goberno de Paquistán, ao tempo que demandaron investigar as denuncias de irregularidades e fraude electoral, apuntando as restricións á liberdade de expresión e reunión ou a “falta de igualdade de condicións” entre as distintas candidaturas. Sobre os potenciais escenarios postelectorais, e no caso de que non muden os resultados oficiais, o analista Zaigham Khan explica que o “máis probábel é un Goberno de coalición que inclúa todos os partidos políticos menos o PTI”, de forma semellante ao formado após a destitución de Khan. Non sería a primeira vez que se deseña “unha causa común co Exército nun intento por derrocar os seus rivais”, recolle o canal France 24. En todo caso, tamén é “tecnicamente posíbel” unha alianza entre PTI e PPP para formar un Goberno federal, debulla Zaigham. O PTI afirmou que tratará de conformar unha maioría para gobernar na que descartou a presenza do PPP ou a PML, polo que está a estudar unha alianza ou fusión con outra formación na que incluír os seus escanos, formalmente independentes, o que lle permitiría entrar no repartimento de escanos reservados e incrementar as súas posibilidades.