Avogados cristiáns, brazo xudicial dos 'mexapías'

Coas derradeiras doce uvas aínda na gorxa, Polonia Castellanos levantouse da mesa e saíu a fume de carozo para denunciar no xulgado o presidente de RTVE, José Pablo López, e os presentadores David Broncano e Lalachús (Laura Yustres) por mostrar na pantalla unha tarxeta coa vaquilla do programa televisivo Grand Prix, a modo do Sagrado Corazón de Xesús. As badaladas do adeus a 2024 foi un verdadeiro sufrimento para a presidenta de Avogados Cristiáns. Ademais de en Antena 3, a Pedroche lixeira de roupa (espida para a avogada); na 1 –"a española!"–, inxurias e ultraxes aos sentimentos relixiosos, segundo o ancestral pensamento desta muller, convencida de que "a cultura da morte en España callou: aborto, eutanasia, divorcio...". Broncano, Lalachús e José Pablo López forman xa parte da longa lista negra de Avogados Cristiáns Polonia Castellanos (Valladolid, 1980) é avogada de profesión e nai de tres fillas. Casada co economista Alfonso González Rodríguez-Vilariño, mantén dende 2008 unha cruz particular "na defensa dos dereitos fundamentais: liberdade relixiosa, vida e familia". Avogados Cristiáns (AC) naceu baixo o Goberno de Rodríguez Zapatero, após a aprobación da lei de matrimonio homosexual e a ampliación da lei do aborto, aínda que a aprobación da fundación civil de carácter estatal que defende no ámbito xurídico os valores inspirados no cristianismo é de 2021, data dende a que Polonia é a presidenta de AC. A fundación, sen ánimo de lucro, está formada por avogados, procuradores, xuristas, docentes e estudantes de dereito, que din "traballar pola promoción da cultura da vida, a defensa da familia e a liberdade relixiosa". Súa aparición, segundo os seus estatutos, "xorde co obxectivo de aumentar os beneficios fiscais para os nosos socios e doantes". Din contar con oito persoas en nómina (2 xornalistas, 2 avogados, unha responsábel de campañas e... Polonia). Lista negra Broncano, Lalachus e José Pablo López forman xa parte da longa lista negra de Avogados Cristiáns, que conta co apoio nalgunhas ocasións de Faite Oír, outra organización de extrema dereita. A nova da notificación foi recibida polos tres coa tranquilidade quen sabe que até o de agora os seus denunciantes lideran os casos perdidos, que coa xustiza do Estado español é moito dicir. Si AC gaña un caso en primeira instancia, é posíbel que o perda a continuación, cando non é condenado as costas. Willy Toledo é un dos principais inimigos para AC, que levou o actor ao xulgado acusado "de pouca educación, mal gusto e linguaxe soez". Foi absolto polo xulgado do penal número 26 de Madrid. O actor negou que "tivera intención de ofender os católicos, mulsumáns, hebreos, seguidores da seita do espaguete voador, pois cada crenza é ceibe". A Audiencia de Valladolid tamén absolveu a Toledo por chamar a AC "trogloditas", "fundamentalistas" e "organización de extrema dereita". O xulgado de primeira instrucción número 9 desestimou a demanda que AC interpuxo contra Toledo por difamacións, por poñer o seguinte mensaxe no seu Facebook: "Eu cago en Dios e sóbrame merda dabondo para cagarme no dogma da santidade e virxindade da virxe María". AC solicitou unha pena de 12 meses de multa. Avogados Cristiáns tamén denunciou o artista Abel Azcona por unha instalación na que podía lerse a palabra "pederastia", escrita no chan con 242 hostias consagradas que el foi gardando. AC acabou denunciando o Estado español no Tribunal Europeo de Dereitos Humanos de Estrasburgo por non condenar Azcona. Blanca Cañedo Álvarez, feminista asturiana e voceira das Clínicas para IVE, fixo declaracións en 2018 sobre o financiamento de AC, que supuxo unha multa en primeira instancia de 1 euro. A Audiencia de Valladolid revocou o fallo: "Non cabe apreciar intromisión ilexítima no dereito ao honor". Outros obxectivos dos Avogados Cristiáns foron o colectivo Femen pola protesta na Almudena de Madrid, Rita Maestre por entrar na capela da Complutense de Madrid en suxeitador, o presentador da Sexta Dani Mateo por chamar o val de Cuelgamuros "unha merda", os Xogos Olímpicos de París 2024 pola representación dunha cea; o Concello de Madrid por permitir a obra Deus ten vaxina, Elisa Mandillo pola 'grande procesión do santo chumino rebelde' en Málaga o 8 de marzo de 2013, as mulleres de Sevilla pola procesión do 'coño insubmiso', a Drag Sethlas, humoristas como Quequé e Leo Bassi, Dario Adanti, editor da revista Mongolia, que en marzo de 2024 lanzou a campaña "Stop acoso xudicial ultracatólico e en defensa da liberdade de expresión" contra os AC, con conexións coa asociación secreta El Yunque, os kikos, o Opus Dei, Vox, PP... "Por agora conformámonos con presionar ao lexislador, sempre legal e pacificamente, para conseguir que leis comoa a do aborto cambien en defensa da vida", declara Polonia Castellanos. Non se entende que en 2025, nun Estado aconfesional, no Código Penal sigan os límites do artigo 525 ("ofensa aos sentimentos relixiosos") e que os Avogados Cristiáns fagan, ademais do rídiculo, perder o tempo a moitas persoas (denunciado e xuíz). Até cando?