Estrélase un avión de Air India con máis de 200 pasaxeiros a bordo na cidade de Ahmedabad
Un avión de Air India que cubría a ruta entre a cidade india de Ahmedabad e a capital de Reino Unido, Londres, estrelouse esta quinta feira pouco despois de engalar con máis de 200 pasaxeiros, segundo confirmou a compañía, sen que por agora transcendese información sobre o número ou estado das posíbeis vítimas.
"O voo AI171, que operaba entre Ahmedabad e o aeroporto de Gatwick de Londres, viuse implicado nun incidente hoxe, 12 de xuño de 2025", dixo na súa conta na rede social X un portavoz da aeroliña, que recalcou que o suceso está a ser analizado.
Terrible news coming out of #India as #AI171, an Air India 787 Dreamliner bound for London Gatwick appears to have crashed on take off. pic.twitter.com/lDiye4pFXU
— Foxtrot (@____Foxtrot____) June 12, 2025
O comisario da Policía de Ahmedabad, Gyanendra Singh Malik, confirmou que "un avión estrelouse na área de Meghaninagar, preto do aeroporto", tal e como recolleu a axencia india de noticias PTI. Varios vídeos en redes sociais mostran unha gran columna de fume na zona.
Investigación
Air India detallou que no aparello, un Boeing 787-8 ían 242 pasaxeiros e tripulantes, antes de especificar que entre eles hai 169 indios, 53 británicos, sete portugueses e un canadense. "Os feridos están a ser levados aos hospitais máis próximos", agregou. "Estabelecemos unha liña telefónica para os pasaxeiros", sinalou, á vez que recalcou que está "a cooperar totalmente" coas autoridades na investigación do sinistro, sen que por agora haxa detalles sobre as súas posibles causas.
O Aeroporto de Ahmedabad apuntou nun comunicado que o aparello "viuse implicado nun accidente pouco despois de engalar" e confirmou que o avión caeu nos arredores das instalacións, que "non se atopan operativas".
"Todas as operacións aéreas están suspendidas temporalmente e ata novo aviso", dixo. "Recoméndase aos pasaxeiros que comproben coas súas aeroliñas as últimas novidades antes de acudir ao aeroporto. Pedimos a súa cooperación e paciencia mentres as autoridades xestionan unha situación en evolución", manifestou.
Condolencias
O ministro do Interior indio, Amit Shah, lamentou o "tráxico" accidente de avión e confirmou que está en contacto coas autoridades locais para abordar a situación. "Os equipos de resposta ante desastres trasladáronse rapidamente ao lugar do sinistro", apuntou.
Pola súa parte, o Ministerio de Exteriores británico dixo que traballa coas autoridades locais tras o sinistro, mentres que o primeiro ministro de Reino Unido, Keir Starmer, lamentou que "as imaxes que están a ser publicadas [...] son devastadoras". "Estou a ser informado mentres se desenvolve a situación e os meus pensamentos están cos pasaxeiros e as súas familias neste momento profundamente angustioso", dixo o premier británico, tal e como recolleu a cadea de televisión BBC.
