O aumento do límite de débeda pública nos Estados Unidos, en mans do Congreso

A Cámara de Representantes dos Estados Unidos tiña programada na noite da cuarta feira unha votación crucial para resolver se brindaba luz verde ao acordo entre o mandatario do país, o demócrata Joe Biden, e o líder da Cámara baixa, o republicano Kevin McCarthy, para recortar o gasto público a cambio de elevar o teito da débeda pública até 2025 e evitar que o Executivo se vexa obrigado a vindeira segunda feira a suspender os pagos responsabilidade da Administración, o que afectaría desde os salarios das empregadas e empregados públicos até as axudas sociais ou o pago das obrigas de débeda contraídas por Washington. A votación neste órgano, controlado polo Partido Republicano, considérase determinante, posto que o Senado, que tamén tería que aprobar a norma, está dominado polo Partido Demócrata, até o de agora máis proclive a aceptar o texto e facilitar a Biden impedir o incumprimento das obrigas de débeda que podería desencadear unha crise económica que implicaría os países occidentais. Malia que en teoría o apoio das únicas dúas formacións con representación garantiría votos suficientes para superar o trámite, a negativa de diversas voces no seo dos partidos a avalar a norma obrigou tanto a Biden como a McCarthy a desenvolver unha intensa actividade para tratar de garantir os apoios necesarios. O primeiro enviou desde a mañá altos funcionarios a reunirse coas lexisladoras e lexisladores demócratas para frear as fugas de voto entre críticas do sector demócrata máis progresista polas cesións aos conservadores, que suporán recortes no gasto en ámbitos como vivenda, ensino ou investigación científica, e por permitir que os republicanos tomen a iniciativa e consoliden o uso dos debates polo aumento do límite de débeda como unha vía para acadar os seus obxectivos políticos, tras reclamar a Biden durante semanas que puxese en marcha medidas unilaterais para rematar coa cuestión, mais que poderían ter derivado nun choque institucional co conservador Tribunal Supremo ante unha potencial impugnación da decisión. O propio Biden levou a cabo máis de 100 chamadas telefónicas nesa liña, informan os medios locais. En paralelo, líderes demócratas no lexislativo reiteraron que era responsabilidade de McCarthy garantir votos dabondo do sector republicano para que o proxecto avanzase. Nese sentido, o presidente da Cámara insistiu en que contarían cos votos precisos, mais reportouse que multiplicou as xuntanzas no seo da formación para enfrontar a rebelión despois de que a terza feira dous representantes do Caucus da Liberdade, que agrupa as e os membros da extrema dereita dos republicanos, votaran en contra da norma na Comisión de Regras da Cámara baixa, que, non obstante, aprobou o texto co apoio demócrata, permitindo que chegara un día despois ao Pleno. O presidente deste Caucus, Scott Perry, salientou que “faremos todo o que estea ao noso alcance para detelo e terminar con el agora”, ratificando que “tivemos tempo para actuar, e este acordo falla, falla por completo”, ao considerar insuficientes os recortes de gasto. Aliás, a entidade avanzou que contaban que a maioría do grupo parlamentario republicano ficase en contra do acordo, tras anunciar o seu voto negativo varios membros da considerada póla moderada do Partido Republicano. A incerteza no que atinxe á economía dos Estados Unidos no marco da disputa sobre o límite de débeda levou a unha caída a cuarta feira nas bolsas estadounidenses, sinalou Reuters. “Até que se faga o trato haberá un pouco de nerviosismo”, confirmou Joe Saluzzi, co director de operacións da empresa Themis Trading. Asemade, outro dos motivos da caída, que levou a que 134 compañías do Nasdaq alcanzaran os seus niveis mínimos, é o aumento das vacantes laborais no país, o que implicaría un novo aumento dos tipos de xuro por parte da Reserva Federal. O acordo O pacto alcanzado por Biden e McCarthy converteuse “nun acordo político para salvar as aparencias sen moita substancia en termos de mudar a traxectoria da débeda dos Estados Unidos”, resolveu Romina Boccia, do Cato Institute. En esencia, suspendería o teito de débeda pública dos Estados Unidos até o 1 de xaneiro de 2025, evitando un novo debate deste cariz até que pasen as eleccións de 2024, nas que Biden busca a reelección. A cambio, o Gabinete mantería en 2024 o nivel de gasto discrecional (o gasto do Goberno de Washington implementado por medio de proxectos de lei específicos) de 2023, un apartado do que están exentas as iniciativas ao respecto dos militares e ex militares, cun aumento limitado a 1% en 2025, que a prensa estadounidense define como un “recorte” ao ter en conta a taxa de inflación. O entendemento tamén recolle unha das principais exixencias republicanas, o aumento das restricións para o acceso das persoas estadounidenses a programas de axuda alimentaria, amais de reducir o financiamento do organismo de recadación de impostos federais e limitar os requisitos medioambientais para proxectos enerxéticos. Un dos puntos do pacto máis criticados polos demócratas é precisamente a aprobación incluída no proxecto de todos os permisos para a construción dun gasoduto que cruzaría os montes Apalaches. AP incide en que o acordo “podería ser só unha pausa antes dunha serie de enfrontamentos moito máis duros sobre o orzamento federal”, ao desvelar que a pesar das cifras ofrecidas pola Oficina de Orzamento do Congreso -que divulgou que en base ao pacto o gasto público baixaría máis de 1.200 millóns de euros nunha década-, estes números non poden compensar o aumento dos custos dos programas de seguridade social para persoas vulnerábeis, como Medicare, que nin demócratas nin republicanos quixeron tocar polo seu efecto entre o electorado antes dos comicios. Ademais, recalca que co actual sistema económico tanto republicanos como demócratas son conscientes de que para reducir a débeda pública do país terán que pactar eventualmente un aumento da carga impositiva e mudanzas nos programas sociais combinados con recortes de gasto. McCarthy xógase o liderado O presidente da Cámara de Representantes, Kevin McCarthy, nunha posición feble no Partido Republicano após precisar 15 votacións para que o grupo parlamentario o escollera para liderar a Cámara, foi ameazado pola extrema dereita da formación cun proceso de destitución se a meirande parte do grupo non acaba por apoiar o acordo con Biden, sostendo que sería unha violación do pacto polo que apoiaron o nomeamento de McCarthy para o cargo.