O ataque de Feixoo á amnistía marca a sesión de investidura

A lei de amnistía para as persoas independentistas represaliadas en Catalunya, que PSOE e Sumar negocian coas forzas nacionalistas catalás como parte das súas exixencias para apoiar a reelección do actual mandatario en funcións, Pedro Sánchez (PSOE), centrou as intervencións a terza feira de Alberto Núñez Feixoo, líder do Partido Popular (PP), no Congreso, na primeira xornada da sesión de investidura que afronta por mor da designación como candidato polo rei español, Felipe VI. “Para min, nin xurídica, nin eticamente é aceptábel”, proclamou, considerándoa “unha aberración xurídica” e un “ataque directo a valores democráticos esenciais”. Nun intento de desmarcarse das negociacións nas que está inmerso o PSOE, aseverou que “teño ao meu alcance os votos para ser presidente do Goberno” mais “non acepto pagar o prezo que me piden para selo”, provocando risas entre representantes das forzas progresistas e soberanistas. Con todo, no último mes non foi quen de sumar novos apoios tras constatar que grazas á ultraespañolista Vox, Unión de Pueblo Navarro e Coalición Canaria alcanzaría 172 escanos, a catro da maioría absoluta. Na intervención, Feixoo agradeceu de forma explícita o “apoio xeneroso” da ultradereita. O ex presidente galego propuxo no que atinxe ao conflito entre Catalunya e o Estado crear un novo delito de “deslealdade constitucional”, vinculándoo co xa derrogado delito de sedición, e endurecer o de malversación. Asemade, dirixíndose a Junts e Partido Nacionalista Vasco (PNV), interrogou se cren que “o que hoxe se usa para satisfacer as súas exixencias non se utilizará contra vostedes cando xa non os precisen”. Rebatendo os datos públicos, sostivo que as ocupacións de vivendas e a pobreza están en aumento, defendeu prolongar as medidas para o control da inflación impulsadas polo Executivo ou un pacto de rexeneración para despolitizar institucións como o Consello Xeral do Poder Xudicial, cuxa renovación o PP bloquea hai case cinco anos para manter o predominio conservador. Nese sentido, afirmou que subirá o salario mínimo a 60% do salario medio, despois de criticar nos últimos anos as subas promovidas polo Goberno estatal, amais de ironizar coa aprobación do uso do galego, catalán e éuscaro no Congreso, posto que “os territorios" non teñen "dereitos”. Bloque Nacionalista Galego (BNG), PNV, EH Bildu e Esquerra Republicana de Catalunya (ERC) coincidiron en sinalar que a sesión semellaba unha moción de censura contra o Executivo e non unha investidura. A primeira réplica a Feixoo chegou da man do PSOE, que inaugurou a quenda de palabra do resto de formacións con representación, que se estenderá até esta cuarta feira cando se efectúe a primeira votación. De fracasar, haberá unha segunda votación na sexta feira. As reaccións ao discurso de Feixoo: "É propio de quen sabe que a investidura está condenada ao fracaso" Unha vez resolto que Sánchez non interviría na sesión de investidura, o elixido foi o deputado Óscar Puente, que lle reprochou que “nin vostede nin eu gañamos as eleccións, a min non me custou nada recoñecelo a noite electoral”, detallando que “nunha democracia parlamentaria encabezar a lista máis votada non é gañar as eleccións” e rebatendo o eixo sobre o que pivotou o discurso do PP desde as eleccións até o debate da amnistía. Puente foi alcalde de Valladolid entre 2015 e 2023 e abandonou o bastón de mando após ficar como primeira forza tras un pacto entre PP e Vox. En paralelo, inculpou Feixoo pola tentativa de “agochar a súa estreita amizade cun narcotraficante”, cualificando o “PP da Galiza” como “esa gran familia retratada en Fariña” e comparándoo coa ex chanceler alemá Angela Merkel, que “mantivo a raia os fascistas”. Tras admitir que Feixoo non conta con suficientes apoios para facerse coa Presidencia, Santiago Abascal, presidente de Vox, reiterou que a amnistía prepara “o camiño para o posterior golpe contra o Estado de dereito”, e remarcou ás forzas soberanistas que non propugnen “a lei do máis forte”, ameazando con que é “un erro do que non van regresar (...), pregúntenlles aos seus antecesores”. Após Sánchez, Yolanda Díaz, líder de Sumar, tampouco interveu no hemiciclo. A súa voceira parlamentaria, Marta Lois, contestou a Feixoo apuntando que “non será presidente porque a súa alianza coa extrema dereita o separa do país que di representar”, e avalou a amnistía como “unha posibilidade de pasar páxina”. Pola súa parte, Néstor Rego, deputado do BNG, reprobou que Feixoo non mencionara nin “un só compromiso coa Galiza” logo de liderar o país durante 13 anos, nunha intervención chea de “falsidades e mentiras”, amais de contraditoria coas políticas que aplicou desde a Xunta. Rego definiu a participación de Feixoo como un intento de reforzarse, pois o PP “pediralle contas unha vez que se certifique o fracaso da investidura”. Catalunya demanda un referendo O presidente da Generalitat, Pere Aragonès (ERC), instou Junts a condicionar a investidura de Sánchez a un entendemento para que “Catalunya vote”, debullando que nesta lexislatura se deben marcar “as condicións” para un referendo de autodeterminación, un día despois de que a formación revelara que as conversas para a amnistía están xa na fase técnica unha vez superada a negociación política. Aragonès asegurou que "a amnistía é inevitábel e vai pasar".