80 Estados exixen protexer os civís ante a dramática situación en Gaza

Milleiros de palestinas e palestinos de Gaza están en risco de morrer por inanición polo asedio primeiro e a obstaculización ao acceso e distribución de axuda humanitaria no enclave palestino por parte de Israel despois, un contexto no que esta sexta feira transcendeu que arredor de 80 Estados rubricaron un comunicado conxunto no que inciden en que “a protección dos civís non é opcional”. “Isto non poder continuar”, sinalaron, lembrando que a protección dos civís é “unha obriga legal en virtude do dereito humanitario e un imperativo moral que non podemos permitirnos descoidar”. Unha declaración asinada pola China, Francia, Italia, Australia, o Canadá ou o Estado español, que demandaron “salvagardar os principios básicos de protección de civís nos conflitos armados”. Israel asasinou 16.506 nenas e nenos no xenocidio, 916 de menos dun ano e 343 no seu primeiro día de vida Durante as hostilidades, 36.000 persoas civís perderon a vida en 14 conflitos armados o pasado ano, estima a Organización das Nacións Unidas (ONU), facendo fincapé no “uso de armas explosivas en zonas poboadas”, e cos civís “vivindo en condicións inimaxinábeis de perigo, inseguridade e sufrimento constantes”. Nese sentido, remarcan que a “instrumentalización da axuda para obxectivos políticos, militares ou estratéxicos de seguridade é inaceptábel”, laiándose de que 2024 foi o ano máis mortífero para o persoal humanitario, con arredor de 360 mortes en 20 países, a maioría delas no territorio palestino de Gaza e a mans do réxime sionista, e reiteraron que se debe permitir, como exixe o dereito internacional, “un acceso humanitario seguro, rápido e sen obstáculos a todos os civís necesitados”. Asemade, sentenciaron que “a rendición de contas" por estas violacións "é esencial”. Citando a Oficina de Coordinación de Asuntos Humanitarios da ONU, apuntan precisamente que na Faixa, que está a padecer o xenocidio israelí, decorre “a peor crise humanitaria”, cos civís enfrontando a “inanición” e correndo “un risco crítico de fame extrema”. Tamén mencionaron a guerra civil no Sudán, onde a poboación civil “sofre as peores consecuencias da violencia, con millóns de desprazados internos e máis da metade da poboación sufrindo altos niveis de inseguridade alimentaria aguda”. Ao tempo, tamén alzaron a voz polo “sufrimento xeneralizado da poboación civil” provocado pola violencia na República Democrática do Congo, Malí, Mozambique, Myanmar, Nixeria, Somalia, Sudán do Sur, Siria e Ucraína. O Exército israelí asasinou esta sexta feira seis traballadores humanitarios que trataban de asegurar dous camións en Gaza O documento enfatiza en que “a impunidade non pode ser a norma”, posto que é “unha licenza para a repetición” das violacións aos dereitos humanos. É no marco desta impunidade, que os países occidentais, algúns deles asinantes do comunicado, lle garantiron durante décadas a Israel e incluso durante o xenocidio que está a cometer, no que o réxime sionista asasinou esta sexta feira seis traballadores humanitarios máis en Gaza, informou o Goberno gazatí, controlado por Hamás. O BNG exixe a ruptura total de relacións co "réxime sionista" mentres Grande-Marlaska admite "erros" na contratación con Israel A Oficina de Medios do Executivo do enclave afirmou que o obxectivo é “interromper a axuda humanitaria” e sistematizar a “inanición”. Máis de 400 traballadores humanitarios foron asasinados por Israel na Faixa desde outubro de 2023, cando emprendeu unha ofensiva sen precedentes que levou por diante até o momento as vidas de case 54.000 palestinas e palestinos, máis de 16.000 deles nenas e nenos. As vítimas do ataque desta sexta feira estaban a “asegurar dous camións de subministracións médicas para o sector sanitario”. A Organización Mundial da Saúde (OMS) advertira de que o sistema sanitario de Gaza está “ao bordo do colapso” polos ataques israelís, que destruíron total ou parcialmente 94% dos hospitais de Gaza. Ao longo do conflito Israel puxo no punto de mira en múltiples ocasións as persoas responsábeis de garantir a seguridade dos convois, atacando tamén os propios convois. Ademais, as tropas israelís usaron un robot-bomba contra o almacén de medicinas dun dos poucos centros sanitarios activos no norte de Gaza, e máis de medio centenar de persoas morreron ou están desaparecidas após un ataque aéreo israelí contra un edificio residencial no norte do enclave. A fame masiva levou ao saqueo esta sexta feira de 15 camións con axuda humanitaria ante a desesperación dos civís, algo polo que “ninguén debería sorprenderse”, indicou a Axencia da ONU para as persoas refuxiadas palestinas, posto que Israel impediu desde o comezo do xenocidio a chegada da axuda e bens comerciais que precisa a poboación. O secretario xeral da ONU, António Guterres, denunciou que só unha cuarta parte dos camións que entraron esta semana –de por si insuficientes– puideron ser entregados polos obstáculos do Exército israelí. Unha trintena de crianzas e persoas maiores faleceron nos últimos días por mor da fame. Guterres denunciou que o xenocidio atravesa a “fase máis cruel dun conflito cruel”, e demandou a calquera país do mundo con influencia sobre Israel, no que semellou unha alusión ao seu principal aliado e provedor de armas, os Estados Unidos, que faga o posíbel por acabar co xenocidio. Sancións que "derrubarían a economía de Israel" O propio Benjamin Netanyahu, primeiro ministro do Executivo de extrema dereita israelí, admitiu nunha alocución esta semana –na que confirmou que segue a boicotear as negociacións de paz, exixindo agora que Hamás acepte a 'limpeza étnica' do pobo palestino en Gaza para pór fin aos ataques– o papel fundamental do aval diplomático estadounidense, detallando que se o Consello de Seguridade da ONU, no que Washington ten dereito de veto, aproba sancións contra o réxime sionista isto “derrubaría por completo a economía de Israel, e tamén os nosos sistemas de seguridade”. Forzas israelís disparan en Cisxordania contra unha delegación diplomática composta na súa maioría por representantes europeos Hamás reaccionou ao comunicado salientando que “confirma o crecente rexeitamento internacional aos continuos crimes de xenocidio e limpeza étnica perpetrados polo Goberno de ocupación fascista na Faixa de Gaza”. Sexa como for, a resistencia palestina continúa, e o Exército israelí sostivo que interceptou un proxectil disparado desde Gaza, así como tres mísiles lanzados polos hutís no Iemen en 24 horas, no medio da súa campaña en defensa de Palestina, que, advertiron, non suspenderán até a fin do xenocidio, mentres en paralelo seguen a aumentar as cifras de soldados israelís mortos. Israel, en exercicios coa OTAN As tropas israelís participaron esta semana en Marrocos nos exercicios militares African Lion, impulsados polos Estados Unidos e no que participaron cinco países máis da Organización do Tratado do Atlántico Norte (OTAN), como Francia, o Reino Unido ou Portugal. Malia que non foi confirmado por fontes independentes, hai reportes de que se desprazou ao país africano a brigada de infantería Golani, cuxos soldados mataron en marzo a sangue frío 15 rescatistas e sanitarios en Gaza, cuxos cadáveres trataron de ocultar soterrándoos. Francesca Albanese, relatora da ONU para Palestina, explicou que de confirmarse sería “unha violación da obriga internacional de investigar e axuizar as persoas implicadas en crimes [de guerra]”. Na parte dos exercicios que se desenvolveu en Tunisia tamén participou o Estado español.