A alegría

Con todas as cautelas e protocolos que a pandemia impuña, o público acudiu en masa ás mostras, gozou dos espectáculos, riu, chorou e aplaudiu aos cómicos. Pink Unicorns La Macana / Dirección artística: Caterina Varela, Samir Akika &amp; Alexis Fernández /Elenco: Alexis Fernández &amp; Paulo Fernández28 Nunha palabra, reencontrouse cunha alegría que o feche dos teatros nos escatimara. Se cadra non é suficiente para enfrontar o panorama que temos diante, mais é profundamente necesario. Precisamos máis que nunca dese desafío aos consensos sociais para atopar un lugar irredutíbel onde convivan as emocións e as reflexións, as tristezas e as alegrías. Ese lugar pode ser o teatro, pode ser un parque de Ribadavia onde se represente un espectáculo de danza que se chame, por exemplo, Pink Unicorns. Unicornios rosas: unha fantasía imposíbel que, con todo, se transforma en motor de futuro.A compañía coruñesa La Macana anda de xira –dentro do que no noso país se pode chamar xira– con ese espectáculo, Pink Unicorns, onde un pai e un fillo –Alexis Fernández e o seu fillo Pablo– bailan a súa relación. Mesturan danza, xesto, teatro corporal, para mostrar unha historia eterna que sempre se repite e sempre é diferente: a dos encontros e desencontros das xeracións. A peza afonda nesas estratexias de rivalidade que se estabelecen entre pais e fillos cando estes entran na adolescencia, ese terreo onde hai que cuestionar todas as autoridades para conquistar a individualidade e a independencia que nos xustifique. A mestura de vulnerabilidades e fortalezas transfórmase nun xogo onde os roles cambian constantemente: ambos se esforzan por estar á altura do outro, e nese proceso redescóbrense a si mesmos na medida en que conseguen comprender o antagonista. A chave do éxito de Pink Unicorns, o que lle outorga unha personalidade case única, é que La Macana deixa a un lado o punto de vista habitual cando se trata este tema: o que subliña os enfrontamentos, as incomprensións e as diferenzas. Pola contra, a compañía constrúe o seu relato desde a complicidade: unha complicidade que non renuncia a exhibir as arestas das que non está libre ningunha relación, mais que pon a superación dos obstáculos como horizonte inmediato. Por iso, a obra traslada de modo inmellorábel a alegría e a ansiedade da busca de harmonía no medio da confusión. Antes da crise, Pink Unicorns xa era unha das obras máis recomendábeis do panorama das artes escénicas do país. Agora é tan imprescindíbel como o optimismo que transmite.