Alejandro Argibay: "A auga da billa é un dos produtos máis seguros que consumimos"

En que consiste o filtrado da auga? Cal é o obxectivo de levar a cabo este proceso? Trátase dun método que permite que substancias que poden estar presentes na auga, facéndoa non potábel ou, cando menos, que a fan desagradábel ao sabor, poidan ser eliminadas. Se atopamos unha auga que contén un exceso de ferro e de manganeso, algo que na Galiza pasa a miúdo, podemos aplicar este método de filtración da auga que elimina ese exceso de ferro e manganeso até que a auga poida estar no albor do que se considera potábel ou non potábel. Desta maneira conseguimos que, por exemplo, unha familia que posúe un pozo na súa casa pero ten que consumir auga engarrafada porque a da billa non é potábel, poida comezar a empregar a súa auga porque lle aplicou o noso tratamento. Este varía segundo cal sexa o problema que nos atopamos ao analizar a auga. Cando hai problemas de sabor, empregamos unha base de carbono activo que absorbe o cloro e outras substancias que poden volver a auga desagradábel. A idea da filtración é devolver a auga ao seu estado natural, libre de calquera límite e contaminación que poida ter. Este é un problema, porque cada vez atopamos máis contaminación na auga. A gran cantidade de lixo que xeramos e o tratamento inadecuado do mesmo provoca que os ríos estean cada vez máis prexudicados. A isto súmanselle outras moitas actividades humanas que acaban derivando na peor calidade da auga. En que punto está o sector da auga filtrada na Galiza? E a nivel internacional? Semella que está nunha tendencia á alza. Na Galiza pódese dicir que somos unha empresa pioneira, mais no resto do Estado español non, e nin moito menos cando falamos a nivel internacional. En países como Francia e Italia é moi habitual o uso da auga filtrada. Neste tema debemos ter en conta a sustentabilidade. Ao final, cando consomes auga engarrafada en botellas e recipientes de plástico, só estamos a producir moitos residuos, cun grande impacto medioambiental, para facer un uso ínfimo deles. Cada vez hai máis preocupación na sociedade por ser máis sostíbeis e xerar menos residuos, polo que este é un sector en auxe. Cando falamos de auga, a filtración é a mellor solución para evitar recipientes dun só uso e a contaminación derivada do transporte de mercadorías desde os puntos de produción até os de abastecemento. Considera que existe un coñecemento xeneralizado entre a poboación sobre o que supón o consumo de auga filtrada? Penso que si, e cada vez vai a máis. Hoxe en día calquera ten acceso a moita información, pero aínda se pode chegar a moito máis. Por que? Porque aínda atopamos moitas familias que, polo descoñecemento do método de filtración da auga, estaban a empregar alternativas moi custosas cando tiñan unha alternativa máis rendíbel para o abastecemento de auga. Nin sequera buscan as alternativas, porque descoñecen que poidan existir. Mesmo hai moitas familias que, por descoñecemento, pensan que a auga das billas é menos segura e menos saudábel que a engarrafada. Isto supón varios inconvenientes: por un lado, o gasto monetario que produce consumir a auga así; e logo, a propia sustentabilidade que comentaba antes. Precisamos continuar a dar máis información para que a xente coñeza outras alternativas que son máis económicas para a carteira e máis rendíbeis para o planeta. A Galiza conta cunha gran cantidade de recursos hídricos. Estase a sacar 100% do potencial de toda esta riqueza que posúe o país para dar abastecemento aos fogares? Penso que agora mesmo se está a facer un bo traballo. A auga que chega aos domicilios é potábel porque se están a desenvolver continuos controis de calidade moi esixentes. Como apuntaba, moita xente non o sabe, pero a auga que sae polas billas é un dos produtos alimenticios máis seguros que consumimos na actualidade. Nin o peixe, nin a carne, nin as verduras e hortalizas que podemos mercar todos os días nos supermercados están suxeitas á cantidade de análises e controis que está a recibir a auga para garantir a súa potabilidade e que se poida consumir en todo momento. Que o traballo podería mellorar? Iso é seguro. Mais nós non somos unha empresa de xestión de auga, polo que o meu coñecemento non é tan amplo como para dar unha opinión tan fundada como a que o xerente dunha compañía deste tipo si podería dar. É un tema que escapa un pouco do meu coñecemento. Como en calquera sector produtivo, o papel que xogan as administracións é fundamental para saber cal é a evolución do mesmo. No caso da auga, cal é ese papel das institucións? No noso caso, non tivemos nunca moito problema, porque tampouco necesitamos nunca demasiado das administracións para poder levar a cabo de maneira correcta o noso traballo. Ao final, na maioría de casos traballamos para domicilios particulares ou para negocios como locais de hostalaría e restaurantes que toman as súas propias decisións sen necesidade de contar con permisos especiais por parte das distintas administracións. Evidentemente, temos que cumprir unha serie de requisitos sanitarios ou laborais, entre outros, nos que a administración fai todo o posíbel por axudar, e non atopamos ningún problema nese sentido. Algo que si se bota en falta é que os representantes públicos fagan unha maior promoción da auga de billa, porque quen vende a auga engarrafada son os grandes lobbies cun gran poderío económico, polo que teñen a capacidade publicitaria de vender que este tipo de auga é moi boa. Por iso fai falta explicarlle á poboación que a auga da billa é aínda mellor e está aínda máis controlada que a auga de botella. Non se trata dun produto de segunda, senón que é moito máis económico e sobre todo moito máis sostíbel. Débese concienciar que o consumo da auga da billa só ten beneficios e ningunha contraindicación. Que importancia tivo a aprobación da nova lei de solos contaminados e residuos? Grazas a esta nova lei, as administracións públicas danlle cada vez máis visibilidade ao consumo da auga que sae da billa. Agora, cando vas a un restaurante ou un local de hostalaría teñen a obriga de darche un vaso de auga da billa sen cobrarcha se así o solicitas. Todo é ir adoptando novas medidas que favorezan reducir o consumo de auga engarrafada. Un exemplo é a instalación de cada vez máis fontes públicas que fan moitos concellos para evitar precisamente o consumo deste tipo de auga que vén en botellas de plástico. Outro exemplo son os colexios e centros educativos que consumían auga engarrafada até agora e están comezando a apostar por instalar fontes nos comedores. É un pouco contraditorio que os mestres e mestras estean a falar nas aulas da reciclaxe e de evitar o consumismo e a contaminación para que despois cada crianza consuma cunha botella de plástico ao seu carón. Todo isto evita a sobreprodución de plásticos que ao final acaba por contaminar a auga do noso país. Necesitamos cambiar, ir todos na mesma dirección e empregar o sentido común. Temos acceso a auga potábel nos nosos fogares, e é algo que deberíamos pór en valor se queremos reducir o noso impacto medioambiental. Tendo en conta que cada vez nos encamiñamos máis cara a un mundo onde as secas van estar presentes no día a día e no que, como vostede sinalaba anteriormente, cómpre valorizar a dispoñibilidade de auga potábel na gran maioría de fogares do país, pensa que un sector como o da auga filtrada conta aínda con moito potencial para seguir crecendo e expandindo o seu mercado? O sector da auga filtrada no noso país desde logo que aínda conta con moitísimo camiño por andar para seguir crecendo e expandíndose. Grazas ás novas leis de sustentabilidade que cada vez son máis exixentes e optan até por prohibir o consumo de plásticos de un só uso, como os pratos ou as pallas de plástico; que estabelecen cales son espazos e as maneiras máis axeitadas para eliminar estes residuos plásticos, é algo que vai ir a máis. Cómpre lembrar que as botellas de plástico que empregan os fogares e os locais de hostalaría son unha das fontes máis grandes de residuos deste tipo. A medida que todo isto siga o proceso de regulación e a auga engarrafada vaia perdendo o seu peso no día a día dos fogares, estou seguro de que nós, as compañías de filtrado de auga e todas aquelas relacionadas co abastecemento da auga a través das billas, seguiremos a crecer. Debido, en primeiro lugar, á necesidade permanente do ser humano de seguir bebendo auga, polo que a poboación buscará outras alternativas como a que nós ofrecemos. E en segundo lugar, porque se cada vez concienciamos máis da importancia de consumir este tipo de auga haberá máis xente que o faga. Desde este punto de vista, vemos o futuro con moi boas expectativas, a verdade. Que medidas se deberían levar a cabo nos vindeiros anos para seguir afondando na transformación do sector da auga, co obxectivo de avanzar cara a un modelo máis económico e sostíbel medioambientalmente? Debemos seguir a promover o consumo da auga da billa, e é algo que ten que ir cada vez a máis. Claro que ás veces nos podemos atopar con certos problemas de sabor que fan que a auga non sexa tan atractiva a primeira vista como a que nos poden ofrecer as grandes compañías de embotellamento de auga nos supermercados, pero para iso estamos nós, as empresas de filtrado de auga, para regular estes aspectos e evitar que a poboación, por moi segura que sexa a auga de billa, decida non consumila por unha cuestión menos transcendental como é a do sabor. Debemos traballar e colaborar para que a auga da billa que chega aos fogares da Galiza sexa totalmente perfecta. Por iso, todo o que sexa promovela parécenos ben. Porque é algo que vai no sentido común da sociedade. Xa non só porque se trate dunha alternativa moito máis económica que a de mercar todos os días ou todas as semanas litros de auga engarrafada. Se queremos ser máis sostíbeis, se queremos reducir o noso impacto medioambiental nos montes e ríos do país, temos que comezar a cambiar os nosos hábitos de consumo de auga. Ese é o lema: "Bebe auga da billa".