Os vehículos para aluguer a longo prazo gañan peso dentro do parque de automóbiles

A modalidade dos automóbiles en renting, o aluguer de vehículos a longo prazo (entre tres e cinco anos é o máis habitual) e por un número determinado de quilómetros (entre 10.000, 15.000 ou 20.000 anuais) a cambio dunha cota mensual, avanza nos últimos anos sobre o negocio da venda directa a particulares. Stellantis Vigo rebaixa o ERTE a un máximo de 75 xornadas e mantén o despido de 100 traballadores A porcentaxe de matriculacións no Estado de vehículos para ofertar nesta modalidade sobre o total dos rexistros de automóbiles leva aumentando de forma consecutiva desde 2015. Desta maneira, desde a taxa de 14,22% do total de matriculacións en modalidade de renting no ano 2015, o pasado ano chegouse a unha porcentaxe de 26,66% a nivel estatal, unha suba de máis de 12 puntos porcentuais, segundo a Asociación Española de Renting de Vehículos (AER). Porén, o avance desta opción é menor na Galiza que no resto do Estado español, pois o peso do país na totalidade do parque de renting estatal descendeu no último ano. Mentres que en 2021 os vehículos en renting na Galiza supuñan 2,45% do total estatal, esta porcentaxe pasou a 2,34% o pasado ano. O descenso tamén se dou na taxa de clientes desta alternativa de mobilidade. Mentres que en 2021 os usuarios e usuarias de vehículos en renting supuñan 3,39% do total, no exercicio anterior esta porcentaxe descendeu a 3,25%. Alén diso, o feito de que a Galiza teña unha taxa de clientela de renting sobre o total do Estado superior que no caso do propio parque de vehículos é sintomático dun menor número de empresas cunha gran frota de vehículos que poidan optar por esta alternativa. Neste sentido, case 40% do parque de vehículos en renting do Estado é absorbido pola Comunidade de Madrid (39,1%), mentres que a taxa de clientes sobre o total neste territorio ten unha porcentaxe moito máis baixa (23,9%). A crise da pandemia de Covid significou unha explosión dentro do mercado do renting de automóbiles. Mentres que en 2019 (20,22%) e 2020 (20,35%) arredor de unha de cinco matriculacións de vehículos no Estado español correspondía con esta modalidade, en 2021 (25,27%) e 2022 (26,66%) pasaron a ser un de cada catro automóbiles. Uns datos que se incrementaron no primeiro trimestre de 2023 en relación ao mesmo período do ano anterior. Desta maneira, as matriculacións de vehículos rexistradas polas compañías de renting ao fechamento do primeiro trimestre do ano ascenderon a 73.888 unidades, o que supón un incremento interanual de 60,37%. Porén, o peso dos rexistros de automóbiles na modalidade de renting nos tres primeiros meses do ano sobre o total (26,51%) foi algo menor á porcentaxe de todo 2022 (26,66%). En marzo matriculáronse no sector do renting 34.072 vehículos, fronte aos 17.787 do mesmo mes de 2022, o que supón un incremento de 91,56%. O renting supuxo 47,51% do conxunto da canle empresa en marzo, mentres que no acumulado do primeiro trimestre o peso deste segmento foi de 46,51%. No que respecta á tipoloxía tecnolóxica dos vehículos en renting que foron matriculados a nivel estatal, 30,18% das matriculacións correspondeu a modelos de gasolina ao fechamento do primeiro trimestre de 2023, mentres que os diésel representaron 34% da entregas. Os híbridos non conectábeis de gasolina coparon 20,31% das vendas, os híbridos non conectábeis de diésel 4,62% e os híbridos conectábeis de gasolina 6,31%. Así mesmo, os eléctricos puros representaron tan só unha taxa de 3,63% do total. Fabricación no Estado En 2022, a taxa de matriculacións de coches fabricados no estado diminuíu O avance das matriculacións en renting contrasta coa diminución dos rexistros de vehículos fabricados no Estado español, unha cuestión que vai en detrimento dos lugares nos que ten unha ampla importancia o sector da automoción, como é o caso da cidade de Vigo. A porcentaxe de vehículos fabricados no Estado sobre o total dos coches en renting matriculados descendeu en 2,1% no ano 2022 con respecto ao ano anterior. Porén, no caso do resto do parque de vehículos a estatística é moito máis desfavorábel para a industria do automóbil de cidades como a olívica, pois a taxa dos que foron producidos no Estado español sobre o total de rexistros caeu 14,4%. Pouco peso da Galiza no Perte do vehículo eléctrico Nun contexto no que a Unión Europea (UE) pretende vetar os motores de combustión (gasolina, diésel e híbridos) para as novas matriculacións de vehículos de cara ao ano 2035, a transición do sector galego da automoción para adaptarse ás novas formas de produción considérase primordial para a evolución do sector industrial do país. O sector da automoción da Galiza está en mans de capital estranxeiro Porén, Euskadi, Catalunya e o País Valencià acumulan case 75% dos 793,72 millóns de euros repartidos na primeira convocatoria de axudas do Proxecto Estratéxico para a Recuperación e Transformación Económica do Vehículo Eléctrico e Conectado (Perte VEC), segundo un informe publicado polo Goberno do Estado español o mes pasado. No documento detállase a distribución autonómica das axudas públicas no Estado español que se repartiron na primeira convocatoria do Perte VEC a 10 proxectos industriais e no mesmo figura que Euskadi foi a rexión máis beneficiada cun total de 209,16 millóns de euros (26,35% do total), seguida de Catalunya, con 198,7 millóns de euros (25%) e o País Valencià, onde se investirán 186,07 millóns de euros (23,4%). A Galiza fica no vagón de cola da electromobilidade A pesar da importancia do sector da automoción na Galiza, o país fica moi lonxe destas porcentaxes de atribución nas axudas públicas para a adecuación da produción de vehículos aos coches eléctricos e conectábeis. En total, a Galiza recibiu 19,88 millóns de euros dentro da primeira fase do programa do Perte Vec, é dicir, 2,5% do total. Ningún dos 27 Estados da UE ten peor índice en electromobilidade que o da Galiza Ademais, o avance na Galiza do uso do automóbil eléctrico e da infraestrutura que necesita, como os puntos de recarga, fica no vagón de cola do Estado español e da Unión Europea (UE), tanto é así que ningún dos 27 Estados que compoñen o grupo comunitario conta cun resultado peor nesta materia que o galego. Mudanzas na forma de consumir Ás veces obrigada pola perda de poder de compra, ás veces atraída pola posibilidade de mudar de produto de forma rápida e menos custosa, a cidadanía está a mudar a súa maneira de consumir. Cada vez son máis as tipoloxías de mercadorías nas que o aluguer avanza sobre a opción da compra final. Como exemplos, o renting está chegando a franxas de mercado como a da telefonía móbil con cada vez máis éxito, mentres que o aluguer de roupa é unha alternativa cada máis empregada.