A UE busca en Mercosur un socio para reducir a súa dependencia dos EUA e da China

A crecente dependencia estratéxica e económica da Unión Europea (UE) con respecto aos Estados Unidos de América (EUA) froito das tensións xeopolíticas derivadas do conflito en Ucraína, así como a posición dependente da UE coa China pola súa condición de principal provedor comercial e de dono da maioría da débeda de numerosos Estados do bloque, veñen de forzar que a institución comunitaria marque como un obxectivo estratéxico a busca de maior influencia noutros mercados. Cales son os potenciais riscos dun tratado de libre comercio con Mercosur que preocupan ao sector primario? Neste sentido, a Comisión Europea estabeleceu que é unha prioridade concluír o aprazado acordo comercial co Mercado Común do Sur (Mercosur), un bloque conformado pola Arxentina, o Brasil, o Uruguai e o Paraguai, segundo un documento oficial que se presentará esta cuarta feira e ao que tivo acceso Reuters. Por outra parte, o alto representante da UE para Asuntos Exteriores e Política de Seguridade, Josep Borrell, será o encargado de expor a importancia que Bruxelas outorga ao feito de garantir un acceso prioritario ás materias primas e outros recursos de América Latina. Respecto desta estratexia, o documento estabelece unha ruta para concluír canto antes unha serie de acordos de libre comercio e asociación con Estados latinoamericanos, así como para impulsar as relacións bilaterais con México e o Brasil. Evolución do acordo O 28 de xuño de 2019 acordouse un pacto comercial entre a UE e Mercosur que está á espera de ser aprobado nos parlamentos dos Estados participantes. A primeira base desta potencial alianza é aumentar o comercio, o investimento bilateral e reducir os obstáculos arancelarios e non arancelarios ao comercio. Os pesticidas e o "círculo vicioso" de veleno e morte no acordo comercial UE-Mercosur Ademais, outra das premisas do acordo sería crear normas estábeis e previsíbeis para o comercio e impulsar o investimento a través de novas regras no ámbito dos dereitos de propiedade intelectual, seguridade alimentaria, a competencia e as prácticas regulatorias. O ano pasado, na última reunión do Mercosur, o futuro da organización estaba á espera das decisións do presidente brasileiro, Luiz Inácio Lula dá Silva, ao representar a economía máis poderosa do bloque, e do presidente uruguaio, Luís Lacalle Pou, por un posíbel tratado de libre comercio coa China, o que poría en risco a permanencia do Uruguai na organización. Máis adiante, en febreiro de 2023, Lula mantivo unha conversación telefónica coa presidenta da Comisión Europea, Ursula von der Leyen, na que expresaron o seu desexo de que o pacto "cruce a liña de meta". Porén, o presidente francés, Emmanuel Macron, explicou días despois que "non é posíbel" chegar ao acordo comercial con Mercosur polas diferenzas na regulación ecolóxica e sanitaria. O pacto comercial con Mercosur afecta o sector primario galego Ademais, estas non son as únicas trabas para o estabelecemento dun acordo comercial con Mercosur, pois este podería ter unha forte contestación social. De feito, unha alianza con Mercosur podería traer problemas para o sector primario galego ao permitir a entrada de mercadorías con facilidade para competir con prezos á baixa. Neste sentido, o Brasil é o lugar principal de fóra da UE de onde chega máis polo importado ao mercado estatal. Outros produtos que se verían afectados por este acordo son o mel, xa que 30% procede da Arxentina, México e o Uruguai, mentres que no caso do viño, 72% das importacións extracomunitarias chegan do ámbito de Mercosur. O sector froiteiro tamén se podería ver prexudicado polos produtos que chegan do Brasil e da Arxentina, que xa desestabilizan o prezo da froita destinada á industria porque o mercado non acepta prezos superiores aos destes Estados, que contan con baixos custos de produción. Perda de peso do dólar As negociacións para un acordo comercial entre a UE e Mercosur danse nun contexto de perda de peso da influencia dos EUA e da súa moeda a nivel global. A economía global mostra sinais de desdolarización, e cada vez máis Estados exploran métodos para comerciar sen o uso da moeda dos EUA, segundo advertiron esta semana dous expertos do banco JPMorgan Chase, Meera Chandan e Octavia Popescu. Despois da imposición de sancións económicas a Rusia por parte de diversos Estados da esfera da OTAN a raíz do conflito en Ucraína, como a súa expulsión do sistema interbancario Swift ou a conxelación das súas reservas de divisas, intensificáronse os esforzos dos Estados que integran o bloque económico-comercial Brics (o Brasil, Rusia, a India, a China e Suráfrica) e doutros grandes exportadores de materias primas para reducir a hexemonía do dólar. Así, a China e Rusia agora realizan unha parte significativa do seu comercio de distintos tipos en rublos (moeda de Rusia) ou en yuans (moeda da China). Mentres, o Brasil e o xigante asiático anunciaron o pasado mes de marzo un acordo sobre arranxos de compensación na moeda estatal chinesa. Arabia Saudita, pola súa parte, tamén iniciou negociacións activas con Beijing para liquidar as compras chinesas de petróleo en yuans, moeda que actualmente concentra un récord de 7% en todas as transaccións globais de divisas. A Cota da China nas exportacións mundiais de 13% supón un récord Por outra parte, sinalan os analistas de JPMorgan, a cota dos EUA nas exportacións mundiais caeu a un mínimo histórico de 9%, fronte ao máximo histórico de 13% da China. Alén diso, a participación do dólar nas reservas oficiais dos Estados caeu ao mínimo histórico de 58%. Bruxelas quere eliminar as medidas de intervención do mercado eléctrico A Comisión Europea defendeu nun informe publicado esta semana retirar as medidas de intervención do mercado eléctrico como o límite de ingresos a enerxías inframarxinais -nucleares e renovábeis-, estabelecidas en setembro de 2022 para facer fronte ao pico de prezos da electricidade motivados polas tensións xeopolíticas internacionais. A taxa galega de xeración eléctrica con fontes solar e eólica sextuplica o índice mundial A restrición estabeleceuse nun tope de 180 euros para os ingresos do mercado por megawatt hora (MWh) de electricidade producida a fin de minimizar o impacto no prezo final da electricidade das custosas fontes marxinais que determinan os prezos, como o carbón ou o gas, garantindo o rendemento do investimento para as tecnoloxías afectadas. Ante a actual estabilización dos prezos da enerxía, Bruxelas considera no seu novo informe que os beneficios do actual límite de ingresos inframarxinais "non compensarían o impacto sobre a seguridade dos investidores e os riscos para o funcionamento do mercado e a transición". Dadas as actuais condicións, Bruxelas tampouco ve a necesidade de prorrogar outras medidas de intervención do mercado, como a redución da demanda. Desta forma, a Comisión Europea aposta pola volta a un modelo eléctrico marxinalista puro, tal e como defenden as multinacionais enerxéticas e que provoca que todas as tecnoloxías que producen cada hora do día electricidade cobren o prezo da tecnoloxía máis cara a esa hora. De feito, o sector eléctrico estatal defendeu esta terza feira nunhas xornadas organizadas polo Club Español da Enerxía as pretensións da Comisión Europea.