Trump confirma un arancel do 50% á importación de cobre a partir do 1 de agosto
O presidente dos Estados Unidos, Donald Trump, confirmou esta cuarta feira a imposición dun arancel do 50% á importación de cobre, a partir do 1 de agosto, nunha medida que xustificou pola súa importancia para o Departamento de Defensa e que amparou no senso de que "reverterá" as accións dos seus predecesores, citando o seu antecesor Joe Biden, que "decimaron esta industria".
"Anuncio un arancel do 50% sobre o cobre, a partir do 1 de agosto de 2025, tras recibir unha sólida avaliación de seguridade nacional", difundiu na súa conta de Truth Social, nunha mensaxe na que destacou que este material é o "segundo máis utilizado" polo Pentágono.
"O cobre é necesario para semiconductores, avións, barcos, munición, centros de datos, baterías de ións de litio, sistemas de radar, sistemas de defensa antimísiles e mesmo armas hipersónicas, das cales estamos a construír moito", agregou presidente do Goberno dos Estados Unidos.
O inquilino da Casa Branca preguntouse ademais "por que os nosos parvos (e felices!) 'líderes' decimaron esta importante industria?" E asegurou que a medida "reverterá o comportamento irreflexivo da Administración (do seu predecesor, Joe) Biden, e a estupidez". "América, unha vez máis, construirá unha industria dominante do cobre. Despois de todo, esta é a nosa idade de ouro!", concluíu.
O mandatario estadounidense puxo así data a un anuncio que adiantou na véspera e que disparou a cotización do metal nos mercados até un 17%, aínda que, posteriormente, moderaba o seu avance ao 10% sobre a 20.30 horas (no fuso horario galego).
O gravame é o último dunha serie de aranceis de Washington destinados a promover a minaría e o procesamento de metais no país, que inclúen o aceiro e o aluminio, ademais dos aranceis por estados e bloques comerciais que tamén entrarán en vigor o próximo 1 de agosto.
Desde febreiro, cando Trump expuxo por primeira vez os plans para os gravames, os comerciantes mundiais enviaron volumes récord deste metal a Estados Unidos co obxectivo de obter enormes ganancias nos cargamentos entregados antes de que os aranceis fosen efectivos, segundo recolle a axencia de noticias Bloomberg.
