O sector do mar pide a dimisión de Teresa Ribera por prexudicar a pesca para lucrar a eólica

A Plataforma en defensa da pesca e dos ecosistemas mariños [da que forma parte a Federación Galega de Confrarías de Pescadores], promotora do Manifesto de Burela, valorou os Plans de Ordenación do Espazo Marítimo (POEM), que reservan amplas zonas ricas en caladoiros de pesca para o desenvolvemento da eólica mariña, como "un ataque directo á liña de flotación do sector pesqueiro e da inmensa riqueza das nosas costas". Pontón critica o plan de eólica mariña por danar a pesca e o medio mariño A organización pediu que se retiren de inmediato os POEM e solicitou a dimisión da ministra para a Transición Ecolóxica e o Reto Demográfico, Teresa Ribera, por "este ataque" e polo "desdén con que tratou tanto os ricos ecosistemas mariños como a frota". A frota galega cualificou a aprobación dos POEM de 'ecocidio' "Poranse en marcha unha serie de actuacións para parar pola vía política e xurídica este 'ecocidio' e 'pescacidio'", anunciou a plataforma. Pola vía política, sinalou, "instaremos a todos os grupos dos Parlamentos da Galiza e de Asturies, e aos presentes no Congreso dos Deputados, a que soliciten á ministra Teresa Ribera que cumpra os mandatos das devanditas institucións en relación ao Manifesto de Burela, que pedía a todas as autoridades respectar a pesca e os ecosistemas e dispor da mellor información na ordenación dos espazos mariños, cuestión que é evidente que non se fixo". Lonxe diso, explica esta organización, "sacrifícase ao sector pesqueiro e aos ecosistemas mariños en prol dunha industrialización dos nosos mares para beneficio do oligopolio eléctrico e dos fondos de investimento ávidos de facer negocio á conta dos pescadores e dos ecosistemas". Ademais, "solicitárase tamén aos municipios costeiros que aproben mocións rexeitando os POEM e pedindo a dimisión de Ribera". Tamén se acordou pórse en contacto de inmediato co Observatorio do Litoral da Universidade da Coruña (UDC), "para valorar unha posíbel impugnación na vía contencioso-administrativa do Real Decreto que aprobe os POEM cando este se publique no Boletín Oficial do Estado (BOE)". De levar a cabo esta impugnación, "solicitaremos tamén a suspensión do Real Decreto polos prexuízos irreparábeis que pode ter nos ecosistemas mariños e no propio sector pesqueiro que se vería expulsado das súas zonas de traballo", agregou a plataforma. Manifestación o vindeiro 11 de marzo na Coruña Na Galiza desenvolverase unha concentración o día 11 de marzo fronte á Delegación do Goberno do Estado español na Coruña para lembrarlle ao delegado do Executivo estatal, José Miñóns, "os compromisos asumidos co Manifesto de Burela", así como para instarlle a que "pida a retirada dos POEM". A esta concentración seguiralle outra, que terá lugar en Oviedo o próximo día 18 de marzo coa mesma finalidade. O día 11 de marzo terá lugar unha manifestación na delegación do Goberno estatal A plataforma rexeitou participar en reunións co Executivo español que "intenten bendicir os POEM" e anunciou que tan só acudirá a xuntanzas e grupos de traballo "cando se retiren os plans de ordenación e se faga efectiva a dimisión da ministra que os propuxo". "Calquera actividade debe estar supeditada á pesca" A economista María do Carme García Negro, en conversa con Nós Diario, opina que os POEM aprobados terían consecuencias negativas sobre a actividade da frota galega. "Os lugares onde están deseñados os emprazamentos [da eólica mariña] son zonas de pesca", sinala. Ademais, "desde o lugar no que se produce a electricidade até a terra hai cables, e é necesario saber a súa posíbel afectación sobre a actividade pesqueira e sobre os bancos de peixes", di. "Os danos poden ser irreparábeis". Piden a dimisión de Teresa Ribera por mor do POEM "O primeiro e necesario é que o Estado español contemple a pesca como actividade prioritaria que se desenvolve nesas zonas e que a partir de aí calquera decisión estea supeditada á compatibilidade coa actividade da frota", defende a economista, que pensa que a Galiza "está en condicións de exixir dita condicionalidade". O presidente da Federación Galega de Confrarías de Pescadores, José Antonio Pérez Sieira, en declaracións a este xornal, sinala que os POEM "son unha catástrofe, un verdadeiro ataque ao sector pesqueiro". Para Pérez Sieira, o sector enerxético "está detrás de todos os golpes que se lle están a dar á frota". "É unha vergoña o que está facendo co pobo galego esta ministra [en alusión a Teresa Ribera], xa nos atacou coa lei de costas, cos plans de protección marisqueiros, coa ordenación do litoral e agora volve con isto", denuncia o presidente da federación de confrarías. O avogado especialista en dereito pesqueiro, Torcuato Teixeira, explica a Nós Diario que "isto é un 'ecocidio' porque é un ataque directo aos ecosistemas mariños e un 'pescacidio' porque é unha afronta ao sector pesqueiro". Teixeira sinala que "é imperdoábel que se permita facer negocio ás empresas eléctricas a custa dos ecosistemas e da frota". Sobre o comisario de Pesca do Executivo da Unión Europea (UE), Virginijus Sinkevičius, o avogado opina que "está intentando deixar deseñadas ferramentas e instrumentos para ir laminando pouco a pouco o sector pesqueiro da UE e deixar espazo libre para a minaría submarina e a eólica mariña". Ecoloxistas din que o POEM "cede" ante o "lobby" da pesca A organización Ecoloxistas en Acción criticou esta cuarta feira os novos plans de ordenación do espazo marítimo (POEM) que presentou o Goberno español, asegurando que non mostran un "compromiso decidido" coa conservación do medio mariño xa que, ao seu xuízo, o Executivo estatal "cedeu" ante o "lobby" da pesca de arrastre e reduciu as zonas para eólica mariña. A frota ve a eólica mariña detrás do veto de Bruxelas á pesca de arrastre Porén, a organización ecoloxista subliña que a eólica mariña debe ir acompañada de regulación e control para evitar a especulación e contar "coa maior participación pública posíbel". Salvemos Cabana rexeita o impacto dos muíños Non obstante, outra organización ecoloxista, neste caso de ámbito galego, como é Salvemos Cabana, rexeitou esta cuarta feira os POEM polo seu "durísimo impacto" sobre a biodiversidade, ao considerar que converten o litoral galego nun "territorio de especulación para as grandes eléctricas". Para a asociación, resulta "vergoñoso e inaceptábel" que a Galiza teña que acoller case a metade da eólica mariña que se desprega no Estado español, á vez que xa é "totalmente excedentaria" no que a produción de enerxía eléctrica se refire. Para esta asociación, os parques eólicos mariños supoñen un "elevado risco de mortalidade" para especies, en especial de aves, sobre todo polos seus altos niveis de emisións de ruído.