O sector apícola solicita regularizar a etiquetaxe do mel importado de terceiros Estados

O sector galego da apicultura atravesa un momento difícil derivado dun conxunto de factores que atacan á vez a súa viabilidade. Un destes problemas é a bonificación do carburante, xa que o apícola é o único sector agrario que quedou fóra da mesma, o que se une ao incremento dos custos xerais de produción e á importación masiva de mel -principalmente da China- que acaba sendo etiquetado como se procedese do país. Lucía Afonso, apicultora: "Isto é o que queda de colmeas que estaban polinizando, purificando o aire, producindo mel..." Gran cantidade de mel, así como de produtos similares ao mel que son vendidos como se o fosen, tamén chega de Estados do leste de Europa, como Ucraína ou Polonia, moitas veces sen que se clarifique a súa orixe. O apícola é o único sector agrario sen acceso á bonificación do combustíbel Un problema agravado pola non homologación na Unión Europea (UE) das técnicas químicas para recoñecer se un produto é mel ou é glucosa de orixe cereal e pola permisividade de outras mesturas entre meles, así como mel con outros produtos nos que tampouco se di a porcentaxe que vén de cada Estado. Un problema que tamén se estende no conxunto do Estado español. En 2022 "produciuse un récord de importacións de mel de baixa calidade que bloqueou o mercado interno", denuncian fontes do sector apícola. Desta maneira, entre xaneiro e novembro de 2022 importáronse por parte das industrias estatais de envasado un total de 35.260 toneladas de mel, 3.633 toneladas máis que o importado en todo 2021 e 3.009 toneladas máis que en todo 2017, anterior récord. O SLG pide solucións Nunha rolda de prensa esta sexta feira, o Sindicato Labrego Galego (SLG) demandou a posta en marcha de "medidas urxentes" para apoiar a crise que atravesa o sector da apicultura. Así, o sindicato solicitou ás Administracións que "activen axudas directas por colmea ao sector apícola profesional para poder superar este grave momento de crise", pois "contribuirían a compensar parcialmente o sobrecusto no mantemento das colonias de abellas e a perda de produción, nun contexto de grave crise de mercado”, explicou o coordinador da área de apicultura no SLG, Diego Sánchez. Apicultores galegos lamentan a perda de miles de colmeas "improdutivas durante anos" “Demandamos un importe de axuda de 10 euros por colmea para o total das censadas no Rexistro Xeral de Explotacións Gandeiras (REGA) a data 1 de xaneiro do 2022 e xestionadas por agricultores a título principal -que dedican máis de 50% do seu tempo laboral á actividade agraria e teñen máis de 50% dos ingresos da actividade agraria-, cun límite de axuda por explotación de 1.000 colmeas”, engadiu o representante do SLG. Ademais, o sindicato tamén pide a inclusión do sector apícola nas bonificacións ao combustíbel de 20 céntimos por litro. Outra das preocupacións do sector, explicou o SLG, é a elevada carga burocrática que condiciona a actividade profesional: “O Ministerio de Agricultura, Pesca e Alimentación (MAPA) debe atender con flexibilidade as particularidades do sector na futura aplicación dos reais decretos de trazabilidade, identificación e rexistro de determinadas especies animais, así como de veterinario de explotación e plan sanitario integral". "Estas exixencias, que pretenden unicamente facilitar o traballo da Administración, non achegarán ningunha mellora ás granxas apícolas e ás persoas consumidoras, mentres que prexudicarán enormemente as granxas apícolas familiares e profesionais”, advertiu Sánchez. O apicultor e membro da Executiva Nacional do SLG Brais Álvarez abordou as preocupacións que no sector está a suscitar a entrada de meles de distintas calidades, e en ocasións de procedencia non transparente: “No momento de maior nivel de importacións de baixa calidade da serie histórica é imprescindíbel que os Gobernos mostren a súa determinación de cara a facilitar información transparente sobre a orixe dos produtos apícolas que consomen”. Aumenta a presenza de niños de vespa velutina Estas trabas económicas e normativas coinciden con outra de índole biolóxica, como é a necesidade de enfrontar a invasión da velutina no territorio galego. Así, houbo un total de 34.491 avisos por velutina na Galiza en 2022, o que supón un incremento de 10% a respecto de 2021, derivando na retirada de 22.200 niños. Ademais, entre os avisos de 2022, 4.518 eran de niños inactivos, en 4.370 casos tratábase doutras especies, mentres que 1.335 avisos foron duplicados pola presenza dun mesmo niño. A velutina fai estragos no mel galego Neste sentido, José Luis Cornes, apicultor afiliado á Federación Rural Galega (Fruga), en declaracións a Nós Diario, denuncia que "as Administracións nunca tomaron o problema da velutina en serio e deixan só o sector da apicultura, que ten que defenderse cos seus propios medios contra a súa afectación". Durante o ano 2022 retiráronse 22.200 niños de velutina na Galiza Para Cornes, a repercusión desta praga "é moi grande e supón a desaparición, sobre todo, de pequenos produtores, cando antes o mel facíase en moitas casas do rural galego". A velutina, afirma o apicultor, "exerce moita presión sobre as colmeas e causa unha enorme mortalidade, provocando numerosas baixas de actividade por este motivo". "É necesario regulamentar a etiquetaxe do mel importado" O apicultor afiliado á Fruga José Luís Cornes salienta que "chega mel de fóra que se mestura con meles de aquí, mais no mercado figura como un produto do país, este é un dos principais problemas do sector". Influenciados por este feito, di Cornes, "os produtores de mel a granel da Galiza teñen que baixar o prezo de venda ao público". A importación sen etiquetaxe adecuada, sinala, "trátase dunha fraude alimentaria encuberta, e se houbese unha regulamentación da etiquetaxe máis clara, polo menos o consumidor sabería o que compra". Un ano "tráxico" para un sector "estratéxico" Román Santalla, secretario xeral de gandaría de Unións Agrarias (UUAA), en conversa con Nós Diario, coincide na importancia de regular a etiquetaxe. "Parece mentira que un produto como o mel que na Galiza ten un valor distinto ao do resto do Estado, non se intente protexer", sinala. "2022 foi un ano tráxico pola situación da mortalidade, das vagas da calor, da seca e da pouca produción, e o sector precisa apoio tanto por parte do Ministerio como da Xunta, para intentar salvar este ano dramático", explica Santalla. A apicultura, di, "trátase dun sector estratéxico pola súa influencia na polinización e nos cultivos, e temos que asegurarnos de conservalo no futuro".