O sector lácteo confía en que os novos aranceis da China teñan un impacto reducido

C hina puxo en marcha en agosto de 2024, a pedimento da Asociación Láctea e a Asociación da Industria Láctea do seu país, unha investigación sobre as importacións procedentes da Unión Europea para saber se a produción de determinados produtos foi subvencionada polas institucións europeas. Agora Beijing vén de determinar preliminarmente que os produtos lácteos importados orixinarios da UE "foron subvencionados", o que causou "un dano substancial" á industria láctea chinesa. Deste modo, decidiu implementar a partir desta terza "medidas provisionais antisubsidios" aos produtos lácteos importados orixinarios da UE na forma de dereitos de depósito compensatorios que serán abonados na Aduana da República Popular China, de acordo coas taxas de subvención ‘ad valorem’ determinadas para cada empresa. Isto representa uns aranceis provisionais de entre 21,9% e 42,7%. Os produtos lácteos afectados inclúen queixo fresco e callado, queixo procesado, queixo azul e outros queixos texturizados, así como leite e nata. Algún deles, tamén producidos na Galiza. De feito, dúas empresas con plantas na Galiza, Capsa —Outeiro de Rei (comarca de Lugo) e Vilagarcía de Arousa (O Salnés)— e Innolact —Castro de Rei (A Terra Chá)— son citadas como albo dos aranceis, que no seu caso serían de 28,6%. Os sindicatos opóñense ao acordo de aranceis imposto por Trump á Unión Europea “Non é tanto onde están situadas as plantas, que tamén, como se as plantas que van sufrir aranceis recollen leite na Galiza”, explica o gandeiro e presidente da Federación Rural Galega (Fruga), Elías Somoza, a Nós Diario. Pon o exemplo de Reny Picot, con importantes volumes de fabricación de leite en po, sen factorías na Galiza mais cun peso significativo de recollida de leite polo territorio galego. O peso das exportacións agroalmentarias galegas á China ten un peso discreto no conxunto total das vendas deste tipo de produtos ao exterior: en 2024 foron ao redor de 170 millóns de euros ao mercado chinés dun total que supera os 4.000 millóns. Mais eses 170 millóns teñen a súa importancia. Supoñen máis de 75% total das exportacións da Galiza á China, que suma un valor 220 millóns de euros —as importacións superan os 2.000 millóns—. O sector pesqueiro representa o groso das exportacións da Galiza co país asiático, con máis de 85 millóns de euros. O segundo dos sectores que ten un maior protagonismo no comercio exterior con China é precisamente o afectado en parte polos aranceis provisionais: o lácteo. As exportacións móvense nos 80 millóns de euros anuais; a metade corresponden a produtos como o leite e a nata. De feito, China representa por ela soa case a metade do leite e nata que Galiza exporta (169 millóns de euros). A China e os EUA fechan un "marco" para un acordo comercial "Non é unha boa nova [a fixación de aranceis], mais forma parte xa dun contexto internacional que abriu Estados Unidos", sinala a este medio Diego Sande Veiga, profesor da USC e coordinador da Liña e Investigación en Economía do Instituto Galego de Análise e Documentación Internacional (Igadi). "O lácteo é un sector relevante nas exportacións da Galiza á China", apunta, indicando que agora toca ver a duración e o alcance dos aranceis. De manterse, "obrigaría a diversificar e buscar novos mercados". Para Dolores Riveiro, profesora de Economía na universidade compostelá e investigadora do Instituto de Estudos e Desenvolvemento da Galiza (Idega), é importante deterse no contexto. "O mercado chinés para a Galiza non é moi importante. Que é o que exporta sobre todo Galiza? Automóbil e téxtil, e non van para China", sinala Riveiro. Macau, unha oportunidade para Galiza gañar relevancia no mercado asiático Mar de fondo Para a profesora, os aranceis estabelecidos pola China son "indicativos" dun "mar de fondo" no que vai ficando atrás a época do "multilateralismo" comercial por un "proteccionismo" promovido polos Estados Unidos de Doland Trump. Nesa guerra comercial arancelaria que impulsou, explica, a Unión Europea tamén se sumou, con gravames ao coche eléctrico chinés, por exemplo. "A UE subvenciona a produción de lácteos e iso permite que se poidan exportar á China", precisa, "e China agora tamén anuncia aranceis". Mais, apunta Riveiro, a república asiática "faino como unha resposta dentro da legalidade internacional e dentro da Organización Mundial do Comercio". Para ela, a resolución a este novo escenario virá "da negociación". O conselleiro de Presidencia, Diego Calvo, anticipou onte, a preguntas de Nós Diario sobre o posíbel impacto no sector galego dos aranceis chineses, que o Executivo galego demandará ao Goberno español que "faga o posíbel" para que Beijing reconsidere esta decisión. Calvo incidiu en que o Goberno galego xa estaba en desacordo coa alza arancelaria cando viña "de Occidente" e o mesmo ocorre neste caso. "A pesar de non ter toda a información, parece de sentido común pensar que o primeiro que haberá que facer é tentar negociar co Goberno chinés", manifestou o conselleiro.