Revés xudicial para o Porto de Vigo polos terreos do estaleiro Vulcano
Golpe da Xustiza contra as intencións do Porto de Vigo para facerse cos terreos do estaleiro Vulcano após a súa liquidación. A sección primeira da Audiencia Provincial de Pontevedra vén de desestimar o recurso de apelación interposto pola Autoridade Portuaria de Vigo, co que pretendía impugnar o plan de liquidación do estaleiro.
Segundo o auto da Audiencia, o organismo portuario presidido por Enrique López Veiga impugnou a aprobación do devandito plan de liquidación, ditada polo xulgado mercantil 3 de Pontevedra o pasado 20 de novembro, por non estar de acordo coa inclusión da concesión do espazo nese plan.
O argumento da Autoridade Portuaria para esa petición era que, ao disolverse a empresa, a concesión administrativa do espazo quedaba resolta e debía, por tanto, volver ao Porto. Deste xeito, o espazo podería destinarse a outros usos, como a ampliación da plataforma para tráfico de mercadorías.
Pola súa banda, a administración concursal do estaleiro defendía que dita concesión debe incluírse na unidade produtiva para o seu alleamento xa que, pola contra, "reduciríase notabelmente o valor das instalacións".
A resolución da Audiencia
No seu auto, a Audiencia considera, por unha banda, que a concesión non pode ter consideración de contrato privado, como pretende o Porto e, por outro, lembra que a Lei Concursal ten como unha das súas "ideas centrais" favorecer a continuidade da actividade empresarial e produtiva, e estabelece a "preferencia" polo alleamento "como un todo da explotación ou unidade produtiva".
A Autoridade Portuaria de Vigo eludiu pronunciarse sobre o auto, e lembrou a encarga dun informe ao Consello de Estado sobre a situación da concesión.
