"A reforma do IRPF promovida polo PP prexudica fortemente as rendas do traballo"

A CIG mobilizouse esta terza feira (7 de outubro) contra a mudanza lexislativa aprobada polo Partido Popular e que reduce os tramos de escala do IRPF e os tipos aplicados a cada tramo. 

LUGO
photo_camera Concentración ás portas de Facenda en Lugo [Imaxe CIG]

A central sindical nacionalista concentrouse en 9 vilas e cidades galegas para amosar o seu rexeitamento á recente reforma tributaria aprobada polo goberno español. A medida, que vén a se sumar á mudanza lexislativa aprobada o 1 de setembro de 2012, suporá --denuncian desde a CIG-- unha "caída nos ingresos do Estado" e "con total seguridade", afirman, "novos recortes no investimento público". 

O Ministerio de Facenda dirixido por Cristóbal Montoro aplicará no vindeiro exercicio fiscal unha nova reforma tributaria que atinxirá principalmente ao IRPF. Neste senso, o goberno español reducirá os tramos na escala e aplicará unha baixada dos tipos, un feito que xa marcou a anterior moficicación introducida por Montoro. 

As rendas altas tributarán 7 puntos menos a partir de 2015 mentres para as máis baixas se reducirá nun 5,75%

Neste senso, en 2015 os tramos de cotización pasarán de 7 a 5. Aliás, os tipos pasarán de estar do 24,75% ao 52%; ao 20%-47% no primeiro ano; 19%-45% a partir de 2016. Isto suporá, denuncian desde a central sindical nacionalista "7 puntos menos de media para as rendas máis elevadas e de 5,75 puntos para as máis baixas". 

Segundo o estudo elaborado pola equipa técnica da CIG e que se basea na análise realizada pola propia Facenda, "os contribuíntes con ingresos arredor dos 30 mil euros son os que menos van ver reducida a cota, mentres os máis beneficiados serán os de máis de 400 mil euros". Un feito que, denuncian, constitúe unha "discriminación". 

"Castígase máis as rendas procedentes do traballo", denuncian desde a CIG

O vindeiro ano deberán tributarse as indemnizacións por despedimento 

Así mesmo, a reforma aprobada polo goberno español obrigará @s [email protected] a pagar pola indemnización por despedimento, que até o de agora ficaba exenta de tributación --dentro dos límites legalmente estabelecidos. Pola contra, critican, "a reforma do imposto de sociedades" deseñada desde Madrid, "reduce o tipo de gravame xeral do 30% ao 25%" o que suporá menos ingresos nesta materia. 

Para a central sindical nacionalista con este conxunto de medidas fiscais --defendidas polo Partido Popular como un "impulso do crecemento económico"-- "castígase máis as rendas procedentes do traballo" que "as rendas altas" o que se traduce, advirten, nunha "perda de progresividade do sistema tributario" e na "caída dos ingresos do Estado". 

Desde a CIG advirten que a "contrarreforma" devirá "con toda seguridade" en "novos recortes de investimento público, tanto en servizos esenciais", sinalan, como "no sistema público de protección social". 

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios