A reduçom de impostos ao clube dos mais ricos

Vai caminho de três anos que a London School of Economics publicou um estudo sobre os efeitos da reduçom de impostos aos mais ricos. Um trabalho que utiliza dados de cinquenta anos (1965-2015) de 18 Estados da OCDE: Estados Unidos, Reino Unido, Alemanha, França, Japom, Austrália ou Canada, entre outros. No documento analisa-se o impacto que tenhem as grandes reduçons fiscais para os ricos sobre a desigualdade de rendimentos, o crescimento económico e o desemprego. O estudo emprega um indicador dos impostos sobre os ricos construído a partir de diferentes impostos (sobre a renda, sociedades ou herdanças). Com este indicador de tributaçom dos ricos constata umha importante reduçom dos impostos sobre eles. Desde finais da década de sessenta até finais da década de noventa, o valor médio deste indicador caiu mais de 30%, ademais houvo umha convergência entre as políticas fiscais nos diferentes Estados. Incremento da bonificaçom Os resultados do estudo evidenciam que umha forte reduçom nos impostos sobre os ricos incrementam significativamente a desigualdade de rendimentos, aumentando a percentagem do rendimento nacional antes de impostos que vai parar a maos do clube dos ricos. Ademais esse incremento da desigualdade fai-se mais forte com o tempo. Porém, longe das consignas tantas vezes repetidas de que a reduçom destes impostos favorece o investimento e polo tanto o crescimento económico e a criaçom de emprego, este trabalho mostra que estas reduçons nom tivérom nengum impacto significativo nem no PIB real per capita nem no desemprego. Ademais, isto acontece tanto no curto prazo como no médio prazo, os dous horiçontes temporais considerados neste documento. Quando se incluem cortes de impostos de menor magnitude tampouco se detectam efeitos significativos sobre o crescimento económico e o desemprego. Crescimento económico Lembremos que em setembro o presidente da Xunta, Alfonso Rueda, anunciou no foro económico promovido por Abanca e La Voz de Galicia um incremento da bonificaçom no imposto de património de 25% a 50% desde 2023. Este tributo afeta aos que tenhem um património superior a 2 milhons de euros, arredor de 8 mil pessoas na Galiza, com um património médio duns 6 milhons de euros. A vivenda habitual até um importe máximo de 300 mil euros está isenta do imposto e no caso galego há um mínimo isento de 700 mil euros a maiores. Aumentar a bonificaçom na Galiza suporá um ganho para as pessoas de maior património Essa reduçom do imposto sobre o património vai em linha com as medidas que está adoptando o Partido Popular noutras comunidades, mas também com as que aplicou o PSOE noutros momentos. Lembremos que em Madrid este imposto já estava bonificado a 100%. Andalucia aprovou em 2022 umha modificaçom da mesma magnitude. Extremadura vem de aprovar uma medida similar e outras comunidades governadas polo PP e Vox anunciam modificaçons normativas no mesmo sentido. Medidas que como acabamos de ver aumentam a desigualdade, supondo um generoso presenta para os mais ricos. Esse incremento da bonificaçom na Galiza suporá um ganho para as pessoas de maior património de mais de 15 milhons de euros a maiores. Deste jeito elevará-se a mais de 30 milhons o benefício fiscal para esse reduzido grupo dos mais ricos. No caso de Madrid, a bonificaçom de 100% supujo no exercício 2021 (último ano para o que a Agência Tributária publicou os dados) mais de 1.200 milhons de euros. Esta cifra nom está muito longe da arrecadaçom total nesse ano, noutras palavras, se nom for pola bonificaçom de Madrid as receitas deste tributo seriam quase o duplo. No extremo contrário, Catalunha é a comunidade na que a arrecadaçom é maior, 593,7 milhons de euros. Umha medida que segundo as declaraçons de A. Rueda aos meios de comunicaçom pretende proteger a atividade empresarial e as pessoas. Na realidade nom há nengumha prova de que reduzir os impostos aos mais ricos permita avançar nesse sentido, a nom ser que entedamos que unicamente o segmento dos adinheirados som pessoas. A evidência sobre os recortes de impostos aos mais ricos mostra-nos que nom tem nengumha relaçom com o desempenho económico, nem dá lugar a um maior crescimento económico nem significa umha reduçom da taxa de desemprego. Isso si, dá lugar a umha maior iniquidade na distribuiçom dos rendimentos e a menores receitas públicas. Esse é objetivo do Partido Popular e de A. Rueda, favorecer aos mais ricos, aumentar a percentagem do rendimento que vai parar a maos desse exclusivo clube de milionários.