Apenas hai referencias xenéricas a unha mellora do sistema de financiamento autonómico nas máis de 30 páxinas da emenda á totalidade do grupo parlamentar confederal Unidos Podemos, en que está inserida En Marea, aos orzamentos xerais do Estado.
A filosofía xeral da emenda é que o Estado debe incrementar a súa capacidade fiscal mediante unha reforma tributaria de carácter progresivo que permita reducir o que a confluencia cualifica como “déficit social”.
O grupo confederal aceita que o déficit público debe ser reducido para se ir axustando aos mandatos de Bruxelas, mais non na mesma medida en que plantexa o Partido Popular.
Destarte, na súa proposta alternativa, o grupo parlamentar liderado por Pablo Iglesias contempla un maior déficit público nas distintas administracións por considerar que a intervención pública na economía é chave para que o ritmo de crecimento do PIB non decaia.
Mais aí outorgaría unha maior marxe para o déficit da administración central do que para a administración autonómica, embora desta dependan os servizos públicos básicos (educación e sanidade).
En concreto, a confluencia propón que o déficit da administración central do Estado pase a ser 1,6 por cento (face 1,1 previsto polo goberno Rajoy). Isto significa incrementar a capacidade de gasto do Estado en 0,5 por cento. En troca, contempla que o déficit das comunidades autónomas se incremente apenas 0,15 por cento, pasando da proposta de 0,6 por cento formulada por Montoro a 0,75 por cento.
O programa está inspirado por unha filosofía claramente socialdemócrata e nas súas magnitudes maiores non se afasta grandemente das variábeis estabelecidas no proxecto de orzamentos de Montoro.
Vexamos: os ingresos públicos pasarían de 38,2 por cento do PIB (proxecto Montoro) a 38,8 por cento (proposta da confluencia), en tanto que o gasto público evoluiría de 41,3 por cento a 42,5. Canto ao déficit, onde Montoro quer 3,1 por cento, a formación liderada por Pablo Iglesias aposta en 3,7 por cento.
A confluencia propón incrementar os ingresos públicos en 7.525 millóns de euros e facelo de forma progresiva, reducindo a recadación vía impostos indirectos (en 1.075 millóns) e aumentando a dos impostos directos (en 3.670).
En todo caso, a emenda non ten precisamente carimbo plurinacional. Embora estar asinada quer por En Comú Podem quer por En Marea, non recolle ningunha referencia concreta nen a Catalunya nen a Galiza.
No caso galego, cumpre lembrar que o proxecto de orzamentos para a Galiza é o pior desde 2004 en termos absolutos e desde 1996 en euros constantes (descontada a inflación).
