A produción industrial galega está 35,4 puntos por baixo da alcanzada en 2008

A produción industrial continúa en caída libre na Galiza. Os datos ofrecidos polo Instituto Galego de Estatística (IGE) para xullo de 2023, último mes con cifras, sinalan que continúa por baixo de 2008, o que evidencia que o complexo industrial non logrou recuperar a actividade previa á Gran Recesión. Neste sentido, o Índice de Produción Industrial (IPI) rexistrou 95,9, isto é 35,4 puntos por baixo de 2008, cando rematou o ano rexistrando unha media de 131,3. Asemade, esta tendencia non se veu alterada nos períodos de crecemento do IPI no Estado español, en Portugal e no conxunto da Unión Europea. A evolución do IPI nos dous últimos meses avanza un escenario moi complicado para o sector industrial. Sen ir máis lonxe, no pasado mes de xullo declarou unha baixada interanual de 2%, unha taxa dúas décimas superior á que rexistrou de media o Estado español, situado na contorna de 1,8%. No caso, galego chovía sobre mollado, porque no mes de xuño marcou unha caída interanual de arredor de 4%, após un 2022 que fechou en negativo caendo en 1,3%, mentres no conxunto do Estado medrou en 2,4%. A maiores, en 2021 o IPI medrou por baixo da media estatal en relación con 2020, o ano forte da pandemia da Covid. A produción industrial segue en caída na Galiza Os sectores industriais que presentaron un peor comportamento en 2022 foron o da enerxía e o da fabricación de bens intermedios. A este respecto, o profesor de Fundamentos da Análise Económica da Universidade Santiago de Compostela (USC), Juan José Ares Fernández, explica en A economía galega. Informe 2022, relatorio elaborado polo Instituto de Estudos e Desenvolvemento da Galiza (Idega) da USC, que “ademais do sector enerxético, cunha caída do IPI de 6,3%, outro grupo tivo tamén un comportamento moi negativo en 2022. Trátase da fabricación de bens intermedios, cuxo IPI descendeu 5,1%”. A metalurxia As empresas metalúrxicas rexistraron en 2022 unha caída da produción industrial de 22 puntos. Porén, tomado como referencia 2008, a baixa do IPI nese período ascende a 49,9, condicionada por algún factor conxuntural, como é a paralización da actividade no complexo de Alcoa, pero determinada por razóns estruturais, como son os deseños económicos para Galiza. Ao tempo, resulta preocupante a baixa do IPI no sector de automoción, que cede 49,3 puntos desde 2008, sendo as súas perspectivas moi negativas, até o punto de prever a patronal do automóbil a destrución de 4.000 empregos na Galiza até 2030, como consecuencia do proceso de substitución do coche de combustión. Os prezos industriais descenderon 7,7% con respecto aos niveis de hai 12 meses O Índice de Produción Industrial está moi por baixo das cifras de 2008, non conseguindo recuperar en ningún dos exercicios os niveis anteriores á crise. Neste sentido, os autores do relatorio A economía galega. Informe 2019/2020 destacan que “a produción industrial en 2019, que como indicamos foi inferior á de 2018, distaba aínda moito de alcanzar a lograda na primeira década deste século. Así, mentres o valor medio do Índice de Produción Industrial (IPI) xeral en 2007 (base 2015) era 140,1, en 2019 era 105,1; cunha diferenza de 35 puntos que reflicte unha preocupante caída na actividade industrial”. A caída do IPI Ares Fernández avanza que “se se modifica o ano base e o valor do IPI industrial fose 100 en 2008, o resultado en 2022 sería 80,2. Este último dato suxire unha caída da produción industrial galega, xa que a actividade de 2022 está moi lonxe de alcanzar a dimensión existente antes do inicio da crise en 2008”. Na mesma orientación, apunta que o valor engadido bruto (VEB) “xerado pola industria galega descendeu en 2022 en 2%, caída que se explica fundamentalmente pola evolución do sector enerxético” e do “comportamento anual negativo da actividade manufactureira”. Pola súa parte, o profesor de Economía Aplicada da Universidade de Santiago de Compostela (USC) Bernardo Valdês afirma que “entre 2008 e 2019 o valor engadido bruto na industria manufactureira radicada na Galiza caeu case 8% en termos correntes. Nese mesmo período o valor xerado polas manufacturas alemás incrementouse en 29%”. A este respecto, Bernardo Valdês destaca que “é certo que se vén producindo un cambio na xeografía industrial a nivel comunitario, mais non precisamente en prexuízo do centro da Unión Europea”. 33.900 empregos menos desde 2008 As debilidades do complexo industrial galego teñen un claro impacto no emprego. A este respecto, a Enquisa da Poboación Activa (EPA) lembra que en 2008 o sector ocupaba 201.300 persoas en toda Galiza, ficando 167.400 en xullo de 2023, último mes con datos.Así, a industria viu destruídos nese período 33.900 empregos, 2.200 dos cales rexistráronse no último exercicio, agardándose unha alza moi importante do paro no sector para o último semestre do ano, como consecuencia da contracción da actividade económica, que xa adiantaron os meses de xuño e xullo. A cifra de negocios da industria galega reduciuse 10,9% o pasado mes de xuño A caída de emprego na industria contrasta co acontecido no sector servizos. Mentres entre 2008 e 2022 o sector industrial perdeu na Galiza 33.900 ocupados, pasando de representar o 18% a 14,6% do emprego total, o sector servizos gañou 43.800 traballadores, ao saltar de 756.400 ocupados en 2008 a 800.200 en xuño de 2023. Nesta dirección, o sector industrial significa no país arredor de 16,3% do Produto Interior Bruto (PIB), unha cifra que fica lonxe do 20% recomendado pola UE para os seus Estados membros. 3.487 industrias fecharon na Galiza desde o ano 2008 3.487 industrias fecharon no país desde o exercicio de 2008. Segundo os datos achegados polo Instituto Galego de Estatística (IGE), a finais desa anualidade a Galiza contaba con 17.190 empresas dedicadas a esa actividade, ficando en 2021, último ano con datos, en 13.703. Así, a redución do tecido industrial mantívose constante ao longo de todo o período, destacando pola súa intensidade os primeiros anos da Gran Recesión e o ciclo económico aberto a partir de 2018 e acelerado pola pandemia e a crise de prezos. O Instituto de Estudos e Desenvolvemento da Galiza (Idega) da USC ten analizado de forma demorada esta cuestión. Neste sentido, no seu traballo A economía galega. Informe 2019/2020, sinala que “a comezos de 2019 a Galiza contaba con 388 empresas industriais menos que en 2018, das que 268 tiñan menos de 10 traballadores e 120 eran de maior tamaño”. Asemade, entre 2019 e 2021 perdéronse outras 1.005 compañías industrias no conxunto da xeografía galega. A crise do conglomerado industrial déixase notar de diferentes formas ao longo da Galiza. A un lado, asistiuse ao feche compañías cun importante número de traballadores; porén, as empresas máis pequenas leváronse a peor parte en todo este proceso. Nesta caso, entre 2008 e 2021, a Galiza perdeu 1.407 sociedades industrias que superan os 9 traballadores, o que supón unha caída de 37,5%, algo particularmente grave nun sector como o industrial, onde o tamaño é importante para aproveitar as economías de escala é favorecer a internacionalización.