O prezo de venda da vivenda libre subiu máis de 20% desde 2022 e a protexida 6%

O problema do acceso á vivenda na Galiza fechou 2025 sen visos de recuperación. Segundo os datos publicados esta mesma semana polo Instituto Galego de Estatística (IGE) relativos á construción da vivenda, accesibilidade e análise do sector da construción até setembro de 2025, a radiografía é a dun país que creou menos vivenda nova, 43,2% menos que no mesmo mes do ano anterior. Tamén se rehabilitaron menos vivendas e houbo máis demolicións. A consecuencia directa nos prezos foi que, cos datos do terceiro trimestre de 2025, os prezos da vivenda libre na Galiza aumentaron 13,4%, por riba da media do Estado español -onde o incremento foi de 12,8%-. A respecto dos prezos da vivenda no país, a evolución dos mesmos desde o ano 2022 e cos datos fechados do terceiro trimestre de 2025 colocan o prezo medio da vivenda na Galiza á alza en todas as categorías de inmóbeis. No caso da vivenda libe -enténdese por vivenda libre a que non se atopa suxeita a ningún réxime de protección pública e pode ser transmitida sen restrición entre partes- o prezo medio na Galiza pasou dos 1.256,7 euros por metro cadrado no ano 2022 a fechar o terceiro trimestre de 2025 cun prezo medio de 1.517,5 euros por metro cadrado, o que supuxo neste período un encarecemento da vivenda libre na Galiza de case 261 euros por cada metro cadrado (+20,75%). Valor taxado da vivenda na Galiza 2022-2025. Prezo medio (en euros) do metro cadrado. (Datos: IGE / Gráfico: Nós Diario) No que atinxe á vivenda usada, o maior dos encarecementos rexistrouse nas de menos de cinco anos. O prezo medio por metro cadrado destes inmóbeis era de 1.468,70 euros por metro cadrado no ano 2022 e subiu no terceiro trimestre de 2025 até os 1.785,4 euros, co que encareceu o prezo medio en 316,7 euros nos últimos catro anos. Para as vivendas usadas de máis de cinco anos de antigüidade tamén medraron os prezos neste período pasando de 1.249,20 euros por metro cadrado en 2022 aos 1.510,6 en setembro de 2025. O encarecemento da vivenda na Galiza afectou tamén á vivenda protexida. A pesar de ser inmóbeis con prezos máximos estabelecidos de venda ou renda e estar destinados a persoas con ingresos familiares que non excedan 5,5 veces o Indicador Público de Renda de Efectos Múltiples (Iprem) para as vivendas de prezo básico (VPPB) e de 7,5 do Iprem para as vivendas de prezo limitado (VPPL), na práctica o prezo medio por metro cadrado das vivendas protexidas na Galiza tamén aumentou nos últimos catro anos, até alcanzar os 1.096,7 euros por metro cadrado ao feche do terceiro trimestre de 2025. Estas mesmas vivendas tiñan no ano 2022 un prezo medio por metro cadrado de 1.028,1 euros, co que desde entón o seu prezo medio encareceuse en 68,6 euros (+6,6%). A Xunta porfía na compra de baixos fronte á crise da vivenda O esforzo financeiro para mercar vivenda na Galiza O incremento paulatino dos prezos da vivenda na Galiza nos últimos anos non rebaixa o esforzo financeiro que as galegas e os galegos teñen que facer para mercar unha vivenda no país, que é de 27,2% do salario, segundo os datos do IGE relativos ao terceiro trimestre de 2025. A análise dos datos do IGE desde o ano 2022 deste esforzo financeiro reflicte que ao feche de 2022 o esforzo financeiro da poboación para adquirir unha vivenda era de 23,9% do salario. Desde esa data este esforzo financeiro disparouse no ano 2023 até 28,7% do salario e baixou levemente en 2024 colocándose este esforzo financeiro para o acceso á vivenda en 27,6%. No que respecta ao acontecido durante o ano 2025 os últimos datos feitos públicos polo IGE -os tres trimestres pero sen feche anual aínda- este esforzo financeiro para mercar unha vivenda no país pasou de ser de 26,7% do salario no primeiro trimestre de 2025 até subir dúas décimas no segundo trimestre do ano pasado, colocándose en 26,9%, e volveu incrementarse no último trimestre do ano até 27,2%. Nos últimos catro anos tamén aumentou na Galiza en case 10 puntos porcentuais a exposición ao risco no mercado da vivenda, que é a porcentaxe do custo das vivendas con respecto ao prezo adquiríbel cun terzo do salario. No ano 2022 esta porcentaxe era na Galiza de 71,6% e ao feche do terceiro trimestre do 2025 o IGE eleva esta porcentaxe até 81,5%. O 30 de decembro o IGE publicaba o dato mensual correspondente a setembro do número de edificios e superficie a construír na Galiza. Segundo estes datos a construción de edificios aumentou en setembro na Galiza 12,6% cun total de 188 edificios de nova planta en 122.000 metros cadrados de superficie a edificar. No mesmo mes de setembro de 2025 o IGE sinala que se concederon 317 licenzas de obras en edificios en todo o país, das que 231 foron para edificios residenciais, 219 destinados a vivenda, 12 a residencias colectivas e outras 86 licenzas foron para edificios non residenciais. Sobre o terreo, a maioría das licenzas foron en concellos da provincia da Coruña -136-, seguidas polas 77 en Pontevedra, 65 en Lugo e 29 en Ourense. Sobe o emprego: O sector da construción aumentou en valor engadido O Instituto Galego de Estatística (IGE) publicou os últimos datos a respecto da situación do sector da construción na Galiza, referidos ao terceiro trimestre no ano 2025. Nese período, a construción na Galiza incrementou o seu Valor Engadido Bruto (VEB) en 7,6% en taxa interanual e tamén aumentou o emprego aínda que en menor medida, xa que quedou nun incremento de 2,6% en termos de postos de traballo equivalentes a tempo completo, até colocar as afiliacións á Seguridade Social neste sector en 83.773. O paro rexistrado no sector, destaca o informe, "estase reducindo máis de 10% en taxa interanual todos os meses desde maio de 2023", cun total de 6.829 persoas paradas neste sector no mes de novembro de 2025. No terceiro trimestre de 2025, cos resultados da análise do sector, o IGE recolle tamén os datos estatísticos elaborados polo INE para destacar que as compravendas de vivendas incrementáronse 7,6% segundo a Estatística de Transmisións de Dereitos da Propiedade do INE. Tamén destaca a análise realizada polo IGE que ao feche do terceiro trimestre de 2025 os prezos da vivenda aumentaron 13,4%, segundo o Índice de Prezos de la Vivenda do INE e que a superficie a construír reduciuse 1,4% segundo os últimos datos das licenzas municipais de obra.